مصطفیٰ زیدی گواہی ۔ مصطفیٰ زیدی

گواہی

خدا کی قسم
جو کہوں گا فقط سچ کہوں گا
کٹہرے کے پیچھے یہ انسان دراصل اک بھیڑیا ہے
بہت ہم نے اس کو سمجھایا ، حقیقیت کا رستہ دکھایا
ہر اک رنگ سے راستی پر بلایا
مگر یہ نہ آیا
یہاں تک کہ اک روز جب رات دن سے گلے مل رہی تھی
( ہوا چل رہی تھی ، کلی کھل رہی تھی )
میں اک چیخ سن کر کنوئیں پر جو پہنچا تو دیکھا
کہ یہ بھیڑیا ایک کمسن کے ساتھ اپنے آباؤ اجداد کی آبرو کا لہو کر رہا ہے

مصطفیٰ زیدی
( مَوج مِری صدف صدف )