گرافکس گمپ ۔ ایک مختصر تعارف ۔

کیفیت
مزید جوابات کے لیے دستیاب نہیں

جہانزیب

محفلین
گمپ
گمپ انٹرفیس اور اوزاروں‌ کا مختصر اور جامع تعارف​

ُٰپی ڈی ایف ای بک ڈاؤن لوڈ کریں

آپ کے تبصرے


2753444387_4521411a33.jpg

اس مضمون میں صرف گمپ کے بنیادی ٹولز کا جائزہ لیا گیا ہے، مستقبل میں تمام ٹوٹیوریل یا اسباق میں ان کا بہتر استعمال دکھایا جائے گا، جس کے لئے یہ مضمون کلیدی حثیت رکھتا ہے ۔
مضمون میں مختصراً تمام اوزار کا جائزہ لیا گیا ہے، لیکن اگر آپ کسی اوزار کو اس مضمون کی مدد سے سمجھ نہیں پائے، تو اوزار کے موضوع پر کلک کر کے گمپ کی مرکزی ویب سائٹ پر اس اوزار کے متعلق پڑھ سکتے ہیں، کسی بھی اوزار کو تفصیل میں پڑھنے کے لئے بھی یہی طریقہ اختیار کیا جائے گا ۔

امید ہے کہ یہ مضمون، آپ کو گمپ سمجھنے میں مدد کرے گا، خصوصی طور پر ان خواتین و حضرات کو جو فوٹوشاپ سے گمپ پر آنا چاہتے ہیں، اور اوزاروں کے معمولی فرق سے دلبرداشتہ ہو جاتے ہیں ۔

ان اوزار کے علاوہ گمپ میں، Filters ہیں، جن کا احاطہ یہاں نہیں کیا گیا، بلکہ ہر فلٹر کو ایک عدد ٹوٹیوریل کی مدد سے موضوع بحث بنایا جائے گا ۔ بشرطِ زندگی ۔
 

جہانزیب

محفلین
گمپ GNU Image Manipulation Program کا مخفف ہے ۔ جیسا کہ نام سے ہی ظاہر ہے گمپ تصاویر کو بہتر بنانے، تصاویر کا حجم کم یا زیادہ کرنے اور ان کے فائل فارمیٹ بدلنے وغیرہ کے کام آتا ہے ۔ گمپ ایک اوپن سورس سافٹ وئیر ہے اور تقریباً ہر طرح کے آپریٹنگ سسٹم پر چلایا جا سکتا ہے ۔
گمپ کو تصاویر بہتر بنانے کے علاوہ پینٹ اور گرافکس کے سادہ اور پیچیدہ ہر طرح کے کام کے لئے استعمال کیا جا سکتا ہے، سب سے بہترین بات یہ ہے کہ گمپ استعمال کے لئے بالکل مفت دستیاب ہے ۔ اگر آپ فوٹوشاپ سے آگاہ ہیں، تو گمپ فوٹو شاپ جیسا ایک سافٹ وئیر ہے ۔

بہت سے لوگ یہ بھی سوال کرتے ہیں کہ اگر گمپ مفت دستیاب ہے اور اس میں فوٹوشاپ کی طرح کے سب کام کئے جا سکتے ہیں تب یہ فوٹوشاپ کی طرح مقبولِ عام کیوں نہیں ہے ۔ اس بات کا جواب گمپ کے شروع کے ورژن ہیں، آغاز میں گمپ، فوٹوشاپ کی طرح مختلف لئیرز کو سپورٹ نہیں کرتا تھا، بلکہ اس کے علاوہ صرف ایک ہی لئیر ہوتی تھی، اور ایک فنکشن جو کہ اب بھی گمپ میں موجود ہے فلوٹنگ سلیکشن کے نام سے سب کام اس پر کرنا پڑتا تھا ۔ جو کہ بہرحال دشوار کام تھا ۔ لیکن گمپ ۲ کے بعد سے گمپ میں لئیرز کی سپورٹ کا اضافہ کیا گیا تب سے گمپ کی مقبولیت میں انتہائی تیزی سے اضافہ ہوا ہے ۔ اور نئے آنے والے ورژن 2.6 کو مزید بہتر کر کے فوٹو شاپ کے قریب تر بنا دیا گیا ہے ۔
 

جہانزیب

محفلین
جب آپ گمپ کو پہلی دفعہ چلاتے ہیں تو اوپر والی تصویر میں سوا درمیان والی ونڈو کے گمپ شروع ہوتا ہے ۔ بائیں طرف والی ونڈو کو گمپ میں اصل اہمیت حاصل ہے، اور اسکو بند کرنے سے گمپ میں کھلی تمام دستاویزات، تصاویر اور گمپ بند ہو جاتا ہے ۔
درمیانی ونڈو، وہ ونڈو ہے جس میں تصویر یا گرافکس پر کام کیا جاتا ہے ۔ اور دائیں طرف والی ونڈو کو ڈاک کہا جاتا ہے ۔اگر آپ نے گمپ کے ساتھ چھیڑ چھاڑ نہیں کی تو گمپ کا مجوزہ ڈاک ونڈو جو کہ اوپر تصویر میں موجود ہے، وہی کھلے گی، لیکن آپ اس کو اپنی مرضی کے مطابق ڈھال سکتے ہیں ۔ سب سے بہتر یہی مجوزہ ڈاک ہی ہے ۔
اب تصویر میں، میں نے مختلف نمبر لگائے ہیں، ہم بالترتیب ان کا جائزہ یہاں لیتے ہیں ۔

1 ۔ یہ گمپ کے مرکزی اختیارات(Menu) ہیں ۔ یہاں بہت سے اختیارات ایسے ہیں جو کہ تصویر والی ونڈو میں موجود نہیں ہوتے اور صرف یہاں ہی پائے جاتے ہیں ۔ جیسے گمپ کی تراکیب، مدد اور چہرے وغیرہ کو بدلنا وغیرہ ۔

2 ۔ سب سے اہم چیز جو آپ گمپ میں استعمال کریں گے وہ یہی ہے ۔ یہ گمپ میں استعمال ہونے والے اوزاروں کی شکلیں ہیں، جن کو منتخب کر کے آپ منتخب شدہ اوزار سے کام لیں گے ۔

3 ۔ یہ امیج ونڈو میں استعمال ہونے والا بیک گراؤنڈ اور فورگراؤنڈ کا رنگ ہے ۔ جب گمپ کو شروع کیا جاتا ہے تو بیک گراؤنڈ ہمیشہ سفید اور فورگراؤنڈ کالا رنگ ہو گا، جِسے آپ اپنی ترجیحات کے حساب سے بدل سکتے ہیں ۔

4۔ یہاں منتخب اوزار کی اہم ترجیحات شامل ہوتی ہیں، جو ہر اوزار کے لئے مختلف ہیں ۔

5 ۔ یہ امیج ونڈو کی ترجیحات ہیں، اس میں رنگ، لئیر، سلیکشن غرض ہر وہ کمانڈ موجود ہے جو آپ کسی بھی تصویر پر استعمال کر سکتے ہیں ۔

6 ۔ یہ مرکزی کام کرنے والی ونڈو ہے، جہاں آپ تصویر یا کسی گرافکس پر کام کر رہے ہوتے ہیں ۔

7 ۔ یہاں سے تصویر جس پر آپ کام کر رہے ہیں کو چھوٹا یا بڑا کر کے دیکھا جا سکتا ہے ۔

8 ۔ یہ سٹیٹس بار ہے، جو کہ جس تصویر پر آپ کام کر رہے ہوتے ہیں اس کے بارے میں معلومات بتاتی ہے، اس کے علاوہ جب آپ کسی اوزار کو منتخب کرتے ہیں تو اس کے استعمال کے بارے میں بنیادی مشورے بھی یہاں مل جاتے ہیں ۔

9 ۔ جس تصویر پر آپ کام کر رہے ہوتے ہیں، یا منتخب لئیر اس کا نام یہاں ظاہر ہوتا ہے ۔

10 ۔ یہاں لئیرز کا موڈ بدلا جا سکتا ہے ۔

11 ۔یہ لئیر، چینل اور پاتھ دکھانے کے کام آتا ہے ۔ ایک تصویر کو گمپ ایک کتاب کی صورت دیکھتا ہے، جس کا ہر صحفہ ایک لئیر کہلاتا ہے ۔ مزید ایک لئیر مختلف چینل سے مل کر بنتی ہے ۔ ان سب کی معلومات کہ تصویر میں کتنی لئیر ہیں وغیرہ یہاں سے دیکھ جا سکتی ہیں ۔

12 ۔ اوزاروں کے بعد سب سے زیادہ اہمیت اسی کی ہے، یہاں تصویر میں موجود سب لئیرز موجود ہوتی ہیں.

13 ۔آپ نئی لئیر بنا سکتے ہیں، لئیرز کو اوپر نیچے کر سکتے ہیں، خذف، نقل وغیرہ وغیرہ سب کام یہاں انجام دیے جاتے ہیں ۔

14 ۔ یہاں ، گریڈانٹ، برش ، رنگ اور پیٹرن منتخب کئء جا سکتے ہیں، بنیادی طور پر یہ سب ہم نمبر 4 میں بھی انجام دے سکتے ہیں ۔
 

جہانزیب

محفلین
گمپ میں استعمال ہونے والے اوزاروں کو ہم مزید چار ذیلی زمروں میں تقسیم کر سکتے ہیں ۔ جو کہ مندرجہ ذیل ہیں ۔

1۔ گمپ سلیکشن ٹولز
ان کی مدد سے ہمتصاویر میں مختلف حصوں کو منتخب کر سکتے ہیں ۔

2۔ گمپ پینٹ ٹولز
ان کی مدد سے منتخب کردہ حصوں یا پوری تصویر یا لئیر کو رنگ کیا جا سکتا ہے، یا رنگوں کو بدلا جا سکتا ہے ۔تصاویر کو میں برش، پنسل وغیرہ کا استعمال کیا جا سکتا ہے ۔

3۔ ٹرانسفارم ٹولز
ان کی مدد سے تصاویر کی ظاہری ہیت کو بدلا جا سکتا ہے، تصاویر چھوٹی بڑی کی جا سکتی ہیں وغیرہ وغیرہ ۔

4 ۔ کلر ٹولز
ان ٹولز کی مدد سے رنگوں کو بہتر کرنا، بدلنا وغیرہ ممکن ہے ۔
 

جہانزیب

محفلین
ریکٹٰینگل اور الپس ٹولز ۔

گمپ میں تصویر کو منتخب کرنے کے لئے کوئیک ماسک کے علاوہ آٹھ عدد اوزار ہیں جن سے کسی حصہ کو منتخب کیا جا سکتا ہے ۔ بقول گمپ دستاویزات کے اگر کوئی ان اوزار پر مہارت حاصل کر لے تو اس کا مطلب ہے، اسے ستر فی صد گمپ کا استعمال آ گیا ہے ۔ ہم ذیل میں اِن کا فرداً فرداً جائزہ لیں گے ۔

ریکٹیگل سلیکٹ ٹول(
2754154124_5320315244_o.png
) اور الپس سلیکٹ ٹول(
2753321381_ab470fc6d4_o.png
)

جیسا کہ نام سے ظاہر ہے ریکٹینگل سلیکٹ ٹول کسی مستطیلی یا مربع کو منتخب کرنے اور الپس دائرہ یا بیضوی شکل کو منتخب کرنے کے کام آتا ہے ۔ اگر آپ فوٹوشاپ استعمال کرتے رہے ہوں تو سلیکشن ٹولز سب سے پہلے اوزار ہوں گے جن پر آپ کو غصہ آئے گا ۔ برعکس فوٹو شاپ کے گمپ میں سیکشن ٹولز کی مدد سے کسی حصہ کو منتخب کر لینے کے باوجود اس کا مطلب کچھ نہیں ہو گا جبتکہ آپ منتخب شدہ حصہ میں کوئی کام نہیں کر لیتے، جیسا کہ رنگ بھرنا وغیرہ ۔
جب آپ ان دو اوزاروں میں سے کسی ایک کو منتخب کر کے کسی حصہ کو منتخب کرتے ہیں تو ذیل کی طرح کی ایک شکل سامنے آئے گی ۔

2767039418_b70d6baa49_o.png

جب آپ ماؤس کو جامنی رنگ کے خانہ پر لے جائیں گے تو ذیل کی شکل بن جائے گی، جہاں آپ منتخب شدہ حصے کو چھوٹا بڑا کر سکتے ہیں ۔

2767039386_56b0901cd0_o.png

منتخب حصہ سے مطمعن ہونے کے بعد آپ سلیکشن کے اندر کلک کریں گے تو رینگتی چیونٹیاں آپ کو نظر آنے لگیں گیں ۔ یہ آپ کا منتخب کردہ حصہ ہے ۔ اس میں ہم رنگ کر سکتے ہیں۔

2767039288_9bc5137255_o.png

جب تک یہ رینگتی چیونٹیاں رہیں گی، آپ اس حصہ کے باہر کوئی بھی کام نہیں کر سکتے ۔ یہ بات انتہائی اہم ہے خاص طور پر جب فوٹوشاپ سے گمپ پر آئیں تو بعض اوقات لوگ پاگل ہو جاتے ہیں کہ میں پینٹ کرتا ہوں اور کچھ ہوتا ہی نہیں ہے ۔ کیونکہ جب تک یہ حصہ سلیکٹ ہے اس کے باہر ہم کچھ نہیں کر سکتے ۔

لیکن اِن اوزاروں کا یہ نہایت سادہ استعمال ہے، ان کو بہتر طور پر استعمال کرنے کے لئے ہم اِن اوزاروں کی ترجیحات کو دیکھیں گے ۔یہ ترجیحات زیادہ تر سلیکشن ٹولز کے لئے بعینہ استعمال ہوتی ہیں اس لئے بعد میں ان کا احاطہ نہیں کیا جائے گا ۔

2767039466_43a12fffa6_o.png

ترجیحات میں سب سے اوپر سلیکشن موڈ ہے۔ اس تصویر میں جو موڈ اس وقت منتخب ہے یہ گمپ کا مجوزہ ہے، اس کا مطلب ہے ہر دفعہ سلیکشن ٹول کے استعمال سے جب سلیکشن کی جائے تو ازسرِ نو سلیکشن بنے گی ۔
دوسرے نمبر پر جو ترجیح ہے جس میں دونوں خانے سرخ ہیں، اس کو منتخب کر کے ہم پہلے سے بنی سلیکشن میں اضافہ کر سکتے ہیں ۔ جیسے ہمارے پاس اوپر والی تصویر میں جو سلیکشن موجود ہے ہم اس میں الپس ٹول سے ایک دائرہ بنا کر اس کا اضافہ کر سکتے ہیں، ذیل میں ملاحظہ کریں ۔

2767039168_7c1e3609b3_o.png

2766191805_fd7bb733f0_o.png
اب ہر دفعہ تو ٹولز آپشن میں جا کر یہ کرنے سے بڑا وقت ضائع ہوتا ہے اس لئے کی بورڈ شارٹ کٹ یاد کرتے جائیں، یہی سب آپ Shift دبا کر اور سلیکشن کر کے کر سکتے ہیں ۔

اب اگلی ترجیح تصویر کے حساب سے جس میں ایک مربع سرخ اور ایک سفید ہے، اس کو منتخب کر کے جب ہم کسی موجودہ سلیکشن میں ایک اور سلیکشن بنائیں تو وہ منفی ہو جائے گی ۔ ذیل میں دیکھیں ۔

2766191739_e85e91313b_o.png

2766191611_c4dcc0c79d_o.png

یہ سب کرنے کے لئے کی بورڈ پر Ctrl دبا کر بھی کر سکتے ہیں ۔

اس کے بعد جو اگلی ترجیح ہے اس کو منتخب کر کے جب ہم کسی موجودہ سلیکشن میں ایک اور سلیکشن بنائیں گے تو جتنا حصہ ایک دوسرے سے ملتا ہے وہ منتخب ہو جائے گا باقی سلیکشن ختم ہو جائے گی ۔ ذیل میں دیکھیں ۔

2766191481_b218f670df_o.png

2766191373_59196ace32_o.png


اس سب کو کی بورڈ سے کرنے کے لئے Shift+Ctrl دبا کر سلیکشن منتخب کریں ۔

اس کے علاوہ جب آپ ریکٹیگل ٹول منتخب کیا ہو تو بجائے چوکور کونوں کے آپ کونوں کو گولائی میں بھی کر سکتے ہیں، ایسا کرنے کے لئے Rounded Corner کے سامنے ٹِک لگائیں اور وہاں مناسب سائز میں کونوں کی گولائی منتخب کر سکتے ہیں ۔
اب Feather Edges, جب آپ گولائی میں کونے بنائیں اور اُس میں رنگ بھریں تو کونوں کے پاس سے رنگ باہر نکل نکل جائے گا، اس سے بچنے کے لئے اس ترجیح کا استعمال کیا جاتا ہے۔ عبارت لکھ کر جب اس منتخب کر کے بڑا چھوٹا کیا جائے تو وہ بھی ناہموار لگتی ہے، تب بھی ہم اس کا استعمال کر سکتے ہیں ۔ اس کے بعد والی ترجیحات نام سے ہی پہچانی جا سکتی ہیں اور آپ خود تجربات کر کے اُن کو سیکھ سکتے ہیں ۔ اہم باتیں یہی تھیں جو اوپر بیان کی گئی ہیں ۔ اور تقریباً تمام سلیکشن ٹولز میں ایسے ہی استعمال ہوتی ہیں ۔
 

شمشاد

لائبریرین
بہت خوب جہانزیب بھائی۔ بہت ہی کارآمد ٹیوٹوریل لکھا ہے آپ نے۔ بہت شکریہ۔
 

جہانزیب

محفلین
فری سلیکٹ(
2754150828_abb3c68121_o.png
)، فزی سلیکٹ (
2754150764_6714c62396.jpg
) اور کَلر سلیکٹ ٹولز (
2753321669_8cc55e6880.jpg


ہم نے اوپر ریکٹینگل اور الپس سلیکٹ ٹولز کا جائزہ لیا ہے، یہ دونوں ٹولز زیادہ تر ویب گرافکس بناتے وقت استعمال ہوتے ہیں، جیسے ویب سائٹ کا سانچہ بناتے وقت، ویب سائٹ مینو، بٹنز، بینر اور اسی قسم کے تمام کام جن میں جیومیٹری کی بنیادی اشکال کا استعمال ہوتا ہے ۔
لیکن جب تصاویر پر کام کرنا پڑے تو وہاں سوا جیومیٹری کی اشکال کے ہر طرح کے حصے ہوتے ہیں جنہیں ہم اوپر والے دونوں اوزار استعمال کر کے منتخب نہیں کر سکتے ہیں ۔یہ کام ہم دیگر سلیکٹ ٹولز کی مدد سے زیادہ آسانی سے انجام دے سکتے ہیں ۔ تو آئیے اِن کا بنیادی طور پر جائزہ لیتے ہیں ۔

فری سلیکٹ ٹول ۔
2754150828_abb3c68121_o.png

جب آپ نے "اَنے واہ" کسی قسم کی سلیکشن کرنی ہو تو اس اوزار کا استعمال کیا جاتا ہے۔اس کو استعمال کرنے کے لئے سب سے اہم بات ماؤس پر آپ کا کنٹرول ہے، جتنا بہتر کنٹرول آپ کا ہو گا اتنی آسانی سے اس کا استعمال آپ کر سکتے ہیں۔ اس ٹول کو بجائے کسی بڑے حصہ پر استعمال کرنے کے چھوٹے حصوں پر استعمال کرنا بہتر ہے ۔ مثال کے طور پر یہ تجریدی سلیکشن میں نے اس کی مدد سے بنائی ہے ۔

2768271904_b432b458c6.jpg

اس کو استعمال کرنے کا طریقہ یہ ہے کہ ٹول کو منتخب کر کے تصویر میں ماؤس کا بایاں بٹن دبا کر رکھیں اور سلیکشن ختم کر کے بٹن چھوڑ دیں، تو رینگتی چیونٹیاں ظاہر ہو جائیں گی۔ اس ٹول کا اصل کام تصاویر پر ہوتا ہے جیسے ذیل کی تصویر میں ہم باز کو بیک گراؤنڈ سے الگ کر کے کسی دوسرے بیک گراؤنڈ پر لگانا چاہتے ہیں ۔

2767423571_ba429be37f.jpg

ایسا کرنے کے لئے باز کے گرد آپ ماؤس کا بایاں بٹن دبا کر سلیکشن مکمل کریں ۔ اب ہمارے پاس باز منتخب ہے، حالانکہ یہ تھوڑی بڑی سلیکشن تھی پھر بھی میں نے کر ہی لی، اس کا نقصان یہ ہے کہ جہاں ماؤس کا بٹن آپ سے چھوٹا وہاں کہانی ختم، اس لئے اس ٹول سے صرف چھوٹے چھوٹے حصے منتخب کرنے کا کام ہی لیں ۔

2767423937_a0ffc33a35.jpg

یہ کرنے کے بعد اب امیج مینو میں سلیکٹ ر جا کر وہاں Invert منتخب کر کے ڈیلیٹ کا بٹن دبائیں تو ہمارے پاس باز بغیر کسی بیک گراؤنڈ کے موجود ہو گا ۔اور اب ہم نے وہاں سفید رنگ بھر دیا ہے ۔

2767423721_7e7b2c5282.jpg

فزی سیلیکٹ ٹول ۔
2754150764_6714c62396.jpg

فزی سیلیکٹ ٹول سے موجودہ لئیر یا کسی تصویر کے رنگوں کی مطابقت کے حساب سے سلیکشن کی جا سکتی ہے ۔ اس ٹول کو فوٹوشاپ میں "میجک وانڈ" کے نام سے پکارا جاتا ہے ۔ اس کو استعمال کرنے کے لئے سب سے اہم بات آپ کا نقطہ آغاز ہے، نقطہ آغاز کی مناسبت سے سلیکشن مختلف طرز کی ہو سکتی ہے ۔ اسے استعمال کرنے کے لئے جس حصہ کو آپ منتخب کرنا چاہتے ہیں، وہاں ماؤس سے کلک کریں ۔ اس حصے میں جو رنگ استعمال ہو رہا ہوگا وہ سب منتخب ہو جائے گا ۔ اگر آپ کی سلیکشن میں کمی بیشی ہے تو آپ سلیکشن میں Shift دبا کر کلک کرنے سے اضافہ اور Ctrl دبا کر کمی کر سکتے ہیں ۔
عموماً اس کو استعمال کر کے آپ کافی بہتر سلیکشن بنا سکتے ہیں لیکن اگر shift اور Ctrl
کے استعمال کا نہیں پتہ ہو تو ایک دردِ سر بن جاتا ہے ۔ ہماری اوپر والی تصویر میں ہمارے پاس زیادہ رنگ نہیں ہیں، میں نے تصویر کے کالے رنگ والے حصہ پر کلک کیا تو ذیل کی سلیکشن ہمارے پاس آ گئی ہے ۔

2767424253_b4b504e867.jpg

2767424085_ab1709ce4a.jpg


کَلر سیلکٹ ٹول ۔
2753321669_8cc55e6880.jpg

کلر سیلکٹ ٹول استعمال میں بالکل فزی سیلکٹ ٹول جیسا ہے، جو کہ رنگوں کی مطابقت کے لحاظ سے تصویر میں کسی حصہ کو منتخب کرتا ہے ۔ ان دونوں میں جو اہم فرق ہے وہ یہ ہے کہ جب فزی سیلیکٹ کے ذریعے کسی جگہ ایک رنگ پر کلک کیا جائے تو ہمیشہ آپس میں جڑے ہوئے رنگ کو منتخب کرے گا، اور چاہے وہی رنگ تصویر میں کہیں اور موجود ہو لیکن جہاں آپ نے کلک کیا ہے اس کے ساتھ جڑا نہیں ہوا، تو وہ منتخب نہیں ہو گا ۔
جبکہ کلر سیلکٹ ٹول میں کسی ایک رنگ پر کلک کرنے سے وہ رنگ تصویر میں چاہے جہاں بھی موجود ہو منتخب ہو جائے گا۔ ذیل میں مثال دیکھیں ۔

فزی سیلکیٹ کی مدد سے ہم نے نچلے سفید حصہ پر کلک کیا تو صرف وہی منتخب ہے، جبکہ باقی سفید حصے ویسے ہی موجود ہیں ۔

2768270914_e2baae5b76.jpg

کلر سیلیکٹ ٹول سے کسی سفید حصہ میں کلک کرنے سے تمام سفید خانے منتخب ہو گئے ہیں ۔

2768270740_491163dfe5.jpg
 

جہانزیب

محفلین
انٹیلیجنٹ سیزر (
2753325695_bff721dd85.jpg
) اور فور گراؤنڈ سلیکٹ ٹولز (
2754150896_cbdbeee641.jpg
) ۔

اوپر ہم نے فری سلیکٹ، فزی سلیکٹ اور کلر سلیکٹ ٹولز کے متعلق پڑھا ہے ۔ جو کہ کسی تصویر کو منتخب کرنے کے لئے رنگوں کی مطابقت اور فری سلیکٹ کی صورت میں تصویر کے گرد حاشیہ لگانے سے کسی حصہ کو منتخب کر سکتے ہیں ۔ لیکن اگر ہمارے پاس کوئی ایسی تصویر ہو جس میں تقریباً ایک ہی جیسے رنگوں کا استعمال ہو تو ہم ان کو آسانی سے استعمال نہیں کر سکتے ۔ ایسی صورت میں ان سب اوزاروں کے امتزاج سے بنا ایک اور اوزار استعمال کیا جاتا ہے ۔ اب ہم اس کے بارے میں پڑھیں گے ۔

انٹیلجنٹ سیزر ٹول (
2753325695_bff721dd85.jpg
) ۔
جسیا کہ اوپر بیان کیا ہے، انٹیلجنٹ سیزر ٹول بالا تین ٹولز کا امتزاج ہے، اس کا مطلب یہ ہوا کہ یہ رنگوں کی مطابقت کے حساب سے کسی حصہ کو منتخب کرتا ہے اور ساتھ ہی فری سلیکٹ کی طرح حاشیہ بھی لگا سکتا ہے ۔ فری سلیکٹ سے یہ اس لئے بہتر ہے کہ فری سلیکٹ کے بر عکس اس میں ماؤس چھوڑنے سے کوئی فرق نہیں پڑتا، اس لئے ہم زیادہ آسانی سے اسے بڑے حصہ پر استعمال کر سکتے ہیں ۔ اس ٹول کو استعمال کرنے کے لئے تصویر کے جس حصہ کو منتخب کرنا چاہتے ہیں وہاں پر ماؤس کا بایاں بٹن دبانے سے ایک نقطہ بن جاتا ہے جسے "کنٹرول نوڈ" کہا جاتا ہے ، اس کے بعد ہم مناسب فاصلے پر حاشیہ کی صورت بناتے ایک دفعہ پھر بایاں ماؤس کا بٹن دبائیں گے تو تصویر میں موجود رنگوں کی مطابقت اور کونوں کے حساب سے دونوں نقاط کے بیچ میں ایک لائن ظاہر ہو جائے گی ۔ اسی طرح کرتے ہم مکمل تصویر پر نقاط لگاتے جائیں گے ۔ اگر تو آپ خوش قسمت ہوئے تو پہلی دفعہ میں ہی بالکل درست حاشیہ منتخب حصہ کے گرد لگ جائے گا ۔ بصورت دیگر آپ سوا پہلے اور آخری نوڈ کے آپ باقی نوڈز پر کلک کر منتخب شدہ حصے کو کم یا زیادہ کر سکتے ہیں، اسی طرح اخیر میں سلیکشن مکمل کرنے کے لئے آپ دوبارہ سے پہلے نوڈ پر جا کر بایاں ماؤس کا بٹن دبائیں گے ۔ کسی کمی بیشی کو درست کرنے کے لئے نوڈز پر کلک کر کے انہیں آگے پیچھے کر لیں اور اگر پھر بھی بات نہیں بنے تو کسی بھی دو نوڈز کے درمیان ماؤس کا بایاں بٹن دبا کر نیا نوڈ بنا سکتے ہیں اور اسے آگے پیچھے کر سکتے ہیں ۔اس سب سے مطمعن ہونے کے بعد آپ منتخب شدہ حصہ کے درمیان کہیں بھی کلک کریں گے تو رینگتی چیونٹیاں ظاہر ہو جائیں گی ۔

2769610824_797e466997.jpg


2768762923_5d70b49751.jpg



فور گراؤنڈ سلیکٹ ٹول (
2754150896_cbdbeee641.jpg
) ۔
بہت سے لوگ، کسی بھی تصویر کو بیک گراؤنڈ سے علیحدہ کرنے کے اس اوزار کا استعمال کرتے ہیں ۔ اور اگر تصویر میں جس حصے کو آپ الگ کرنا چاہتے ہیں اسکا رنگ دیگر حصوں سے مختلف ہے تو یہ نہایت سرعت کے ساتھ ان کو الگ کر دیتا ہے ۔ اس اوزار کے استعمال کو تین درجوں میں تقسیم کیا جا سکتا ہے ۔

پہلے حصہ میں جس حصہ کو آپ نے الگ کرنا ہوں، اس کے گرد ایک حاشیہ لگا دیں، اس کا درست ہونا ضروری نہیں، صرف اس حصے کو حاشیہ کے اندر ہونا چاہیے جسے آپ الگ کرنا چاہتے ہیں ۔ ایسا کرنے سے باقی تصویر کے اوپر نیلا رنگ آ جائے گا ۔

2769611304_54401d3a14.jpg


دوسرے مرحلہ میں تصویر پر رنگ کریں گے، اور کوشش ہونی چاہیے کہ تصویر میں موجود تمام رنگ آپ کے پینٹ کے نیچے سما جائیں ۔

2769611150_f07d9ca9b1.jpg

اور آخری مرحلے میں جب آپ نتائج سے مطمعن ہو جائیں تو Enter دبا دیں ۔

2769611468_fdb932b475.jpg
 

جہانزیب

محفلین
پاتھ ٹول یا بیزئیر ٹول گمپ کا نہایت طاقتور اوزار ہے، جس کی مدد سے سے آپ سیدھی لکیر، ٹیڑھی سطریں، کسی بھی قسم کی شکل یا سلیکشن بنا سکتے ہیں ۔ گمپ ویکٹر گرافک پروگرام نہیں ہے بلکہ ریسٹر امیج پروگرام ہے، لیکن پاتھ ٹولز کی مدد سے بنائے گئے پاتھ ویکٹر ہوتے ہیں ۔
آسان لفظوں میں ایسی تصویر جس کی اکائی پکسل ہو، وہ ریسٹر امیج کہلاتی ہے جبکہ ویکٹر امیج ریاضی کے اصولوں کے مطابق تصویر کے سائز کی مناسبت سے کم یا بڑھتے ہیں ۔ یہاں تفصیل میں بات نہیں کی جائے گی، تفصیل آپ یہاں ملاحظہ کر سکتے ہیں ۔

کوئی بھی پاتھ دو طریقوں سے بنایا جا سکتا ہے، پہلا طریقہ پاتھ ٹول کا استعمال کر کے، اور دوسرا طریقہ کسی بھی سلیکشن کو ہم پاتھ میں بدل سکتے ہیں ۔پاتھ اور سلیکشن میں بنیادی فرق یہ ہے کہ برعکس سلیکشن کے پاتھ کا بند ہونا ضروری نہیں ہے، پاتھ کھلا(جیسے سیدھی لکیر) اور بند (مربع، مستطیل) کوئی بھی شکل کا ہو سکتا ہے ۔
یہ حصہ لکھنے سے پہلے سوچتے ہوئے مجھے تقریباً دو دن لگے ہیں کہ اس پاتھ ٹول کے متعلق کیسے اور کہاں سے شروع کیا جائے، اور کہاں تک بتا کر اسے ختم کر دیا جائے، اس لئے اس حصہ میں، میں صرف اسی بات ہر دھیان دوں گا کہ ایک پاتھ کیسے بناتے ہیں، پاتھ کے حصے کون کون سے ہوتے ہیں، اور پھر پاتھ کو سلیکشن میں کس طرح بدلا جا سکتا ہے ۔
تفصیل میں پاتھ کو پڑھنے کے لئے موضوع پر کلک کریں ۔

پاتھ بنانے کے لئے ہم آغاز انٹیلجنٹ سیزر ہی طرح کرتے ہیں، تصویر میں کسی حصہ پر جا کر ماؤس کا بایاں بٹن کلک کریں، اس کے بعد جہاں آپ دوسری دفعہ کلک کریں گے، تو دو نقاط کے درمیان ایک لائن بن جائے گی ۔

2773114204_f6b9a8cdae.jpg

اوپر والی تصویر میں کھلے اور بند پاتھ کی ایک مثال ہے ۔ لیکن کسی بھی پاتھ کو ایسے ہی بند نہیں کیا جا سکتا ہے، پاتھ کو بند کرنے کے لئے آپ Ctrl دبا کر پہلے نقطہ پر کلک کریں گے ۔
یہ بہت ہی سادہ پاتھ کی مثال تھی، پاتھ میں موجود نقاط کو ہم "نوڈ" کہتے ہیں، اور ہر نوڈ دو مزید ہینڈل پر مشتمل ہوتا ہے، جو ظاہر نہیں بلکہ چھپے ہوئے ہوتے ہیں ۔ اِن ہینڈل کو ظاہر کرنے کے لئے کسی نوڈ پر پہلے کلک کریں، پھر Ctrl دبا کر ماؤس سے کنٹرول پوائنٹس کو نقطہ سے باہر کھینچ لیں ۔

2772265861_98fa64c173.jpg

اِن نوڈ سے ہم پاتھ کی شکل بدل سکتے ہیں ۔

2772265665_955a2747ac.jpg

اِسی طرح پاتھ میں کہیں بھی کلک کر کے ہم نئے نوڈ کا اضافہ کر سکتے ہیں، اور کسی موجودہ نوڈ کو Shift+Ctrl دبا کر اور ماؤس سے نوڈ پر کلک کر کے ختم کر سکتے ہیں ۔ پاتھ بنانے کے یہی مراحل ہیں۔

2772265459_82fb4bf7dd.jpg

اِن سے اگلے مراحل طے کرنے کے لئے ہمیں گمپ کی دائیں طرف والی ونڈو پر آنا پڑے گا، جِسے ڈاک کہتے ہیں ۔

2773114754_6bec2944cc.jpg
2772266489_3df12223f2.jpg

ڈیفالٹ ڈاک ہمیشہ لئیرز کو دکھاتی ہے، اس کے بعد اگلا بٹن چینلز کا اور اس سے اگلا بٹن پاتھ کا ہوتا ہے ۔ جب ہم کوئی پاتھ بنا کر پاتھ والے ڈائیلاگ میں جاتے ہیں تو ہمارا پاتھ وہاں موجود ہو گا ۔
اس کے سب سے نیچے دیکھیں، تو پہلا بٹن نیا پاتھ بنانے کے لئے ہے، اس سے اگلا بٹن اگر پہلے ہی ایک سے زیادہ پاتھ موجود ہیں تو ان کو اوپر کرنے، اس سے اگلا کسی پاتھ کو نیچے کرنے، اگلا بٹن پاتھ کی نقل بنانے، اگلا سرخ رنگ کا بٹن پاتھ کو سلیکشن میں بدلنے ، اس سے اگلا بٹن کسی سلیکشن کو پاتھ میں بدلنے کے لئے، اگلا برش کےنشان والا بٹن پاتھ کو کسی رنگ یا پٹرن سے سٹروک کرنے کے لئے اور سب سے آخری بٹن پاتھ کو خذف کرنے کے لئے ہوتا ہے ۔

پاتھ کے بہت سے مقاصد ہو سکتے ہیں لیکن بنیادی طور پر شکلیں بنانے یا آسانی سے کسی تصویر کے حصے کو منتخب کر کے اسے سلیکشن میں بدلنے کے لئے جاتے ہیں ۔ کسی بھی پاتھ کو سلیکشن میں بدلنے کے لئے سرخ رنگ والا بٹن دبائیں تو پاتھ سلیکشن میں بدل جاتا ہے، مثال کے طور پر ہم اپنے بنائے گئے پاتھ کو سلیکشن میں بدلتے ہیں تو ذیل کی شکل سامنے آئے گی ۔
آپ نے دیکھا کہ جو کھلا پاتھ ہے، سلیکشن میں بدلنے کے بعد وہ بند ہو گیا ہے، کیونکہ سلیکشن اوپن لوپ نہیں ہو سکتی ۔ جبکہ بند پاتھ ویسے کا ویسا ہی رہا ہے ۔

اب اس بحث کا اختتام کہ جب ہمارے پاس سلیکشن ٹولز ہیں پھر پاتھ سے سلیکشن کس لئے کی جائے؟ اس کے کئی ایک جواب ہو سکتے ہیں کہ آسانی اور مہارت سے سلیکشن بنائی جا سکتی ہے، اور کسی خرابی کی صورت میں نہایت آسانی سے کنٹرولنگ پوائنٹس کے ذریعے سلیکشن کو درست کیا جا سکتا ہے ۔ دوسری وجہ کہ جب آپ کوئی بھی سلیکشن ٹولز استعمال کر کے سلیکشن بناتے ہیں، اور غلطی سے کوئی دوسرا ٹول منتخب کر لیتے ہیں تو سلیکشن ختم ہو جاتی ہے، اسی طرح اگر رات کے بارہ بجے آپ کسی تصویر پر کام کر رہے ہیں، اور نیند سے برا حال ہے، تب آپ اپنا کام ختم کرنا چاہتے ہیں، مگر اتنی محنے سے بنائی گئی سلیکشن آپ مخفوظ نہیں کر سکتے ۔ اس کے برعکس پاتھ لئیرز کی صورت کام کرتا ہے، آپ جب چاہیں اپنا کام چھوڑ کر دوبارہ وہیں سے شروع کر سکتے ہیں، اور کسی غلطی کی صورت میں جب چاہیں اس میں ترمیم کر سکتے ہیں ۔ اور اخیر میں ایک دفعہ پھر یہ صرف تعارف ہے، جو آپ کو کسی بھی ٹول کے بارے میں آغاز فراہم کرنے کے لئے کافی ہے، بعد میں استعمال کے لئے براہ مہربانی تفصیلات یا مختلف ٹیوٹوریل دیکھتے رہیں ۔ انشااللہ یہاں محفل پر بھی ایڈوانس استعمال کے لئے ٹیوٹوریل لکھے جائیں گے، جس سے آپ مزید سیکھ سکیں گے ۔
 

جہانزیب

محفلین

سلیکشن کرنے کے لئے ہم کوئیک ماسک کو استعمال کر سکتے ہیں ۔ کوئیک ماسک موڈ میں جانے کے لئے تصویر والی ونڈو میں نیچے کی جانب ایک چوکور ڈبہ پر کلک کر کے جایا جاتا ہے ۔

2812968972_9eddcbabdd.jpg

ایسا کرنے سے تصویر پر سرخ رنگ غالب آ جائے گا۔کوئیک ماسک موڈ کو بحال کرنے کے بعد اگلا قدم پینٹ برش ٹول
2754151554_76be8f07cf.jpg
حصہ پر رنگ کر کے سلیکشن بنائی جا سکتی ہے ۔ کوئیک ماسک میں دو رنگ بنیادی ہیں، ایک سفید اور دوسرا کالا، جس حصہ پر سفید رنگ کیا جائے گا وہ سلیکشن کا حصہ بن جائے گا، اور کالا رنگ کرنے سے سلیکشن سے نفی ہو جائے گا ۔ اب کوئیک ماسک کو کیسے استعمال کیا جا سکتا ہے ۔

2812119515_6e24385d62.jpg

۱۔ کوئیک ماسک موڈ بحال کریں ۔
۲۔ پینٹ برش ٹول کو منتخب کریں ۔
۳۔ مطلوبہ حصہ پر سفید رنگ کریں ۔
۴۔ دوبارہ کوئیک ماسک پر کلک کرنے سے مطلوبہ حصہ منتخب ہو جائے گا ۔

لیکن باقی سب سلیکشن ٹولز کی موجودگی میں کوئیک ماسک کی کیا ضرورت ہے؟ کسی بھی سلیکشن ٹول سے بنائی گئی سلیکشن میں ایک خامی رہ جاتی ہے، وہ ہے تصویر کے کونے یا آؤٹ لائن نہایت تیکھی ہوتی ہے، جسے درست کرنے کے لئے دیگر مراحل جیسے سلیکشن کو تھوڑا دھندلا کرنا پڑتا ہے تا کہ تصویر میں تیکھے یا Sharp Edges سے چھٹکارا حاصل کیا جا سکے ۔
دوسری وجہ اگر ایک تصویر میں بہت سے مختلف حصوں کو منتخب کرنا ہو تو سلیکشن ٹولز کی نسبت کوئیک ماسک میں یہ کام انتہائی سرعت سے انجام دیا جا سکتا ہے ۔ بہتر سلیکشن کے لئے سب سے بہتر طریقہ یہ ہے کہ کوئی سلیکشن ٹول استعمال کر کے حصہ منتخب کیا جائے اور پھر کوئیک ماسک میں اس کو درست کیا جائے ۔ مثلاً اوپر کی تصویر میں ہم اس کا استعمال کر کے بسکٹ کو منتخب کریں گے ۔

سب سے پہلے ہم نے فری سلیکٹ ٹول کی مدد سے بسکٹ کے گرد ایک حاشیہ لگایا ہے ۔

2812969662_cc19b1df3f.jpg

دوسرے مرحلہ میں ہم نے نیچے دیے گئے ڈبے پر کلک کر کے کوئک ماسک کو بحال کیا ہے ۔

2812120265_3935142ed0.jpg

تیسرے مرحل میں پینٹ برش ٹول کو منتخب کر کے کالا رنگ منتخب کر کے، جو حصے مطلوبہ نہیں ہیں وہاں پر رنگ کیا ہے ۔ بہتر طور پر ایسا کرنے کے لئے تصویر کے سائز کو بڑھا لینا اہم ہے ۔ ہم اس تصویر کو تین سو فی صد بڑا کر کے ایسا کرتے ہیں، تا کہ بہتر نتائج حاصل کر سکیں ۔

2812969374_6995c269b0.jpg

2812119989_52a8400a15.jpg

اس کے بعد دوبارہ کوئیک ماسک کے ڈبے پر کلک کرنے سے ہمارے پاس سلیکشن موجود ہو گی ۔

2812969128_38829966e6.jpg
 

جہانزیب

محفلین

گمپ میں سلیکشن کو ایک جگہ سے دوسری جگہ منتقل کیا جا سکتا ہے، ایسا کرنے کے لئے دو طریقے ہیں، کہ صرف سلیکشن کو ایک سے دوسری جگہ منتقل کرنا، جس میں منتخب شدہ حصہ بغیر تبدیلی کے وہیں موجود رہے ۔
ایسا ہم صرف ریکٹینگل ٹول اور الپس ٹول کی مدد سے بنائی گئی سلیکشن کے ساتھ کر سکتے ہیں، کسی دوسرے ٹول کی مدد سے بنائی گئی سلیکشن پر یہ کام نہیں کرتا ۔

جب ہم ریکٹینگل یا الپس ٹول کی مدد سے کوئی سلیکشن بناتے ہیں، تو ماؤس کو اس سلیکشن پر لے جانے سے مستقل لکیر ظاہر ہوتی ہے، یا اگر آپ نے سلیکشن بنا لی ہوئی ہے تو اس میں کلک کر کے دوبارہ سے یہیں پہنچ جائیں گے ۔ اس تصویر میں سلیکشن کے کونوں میں ڈبے دیکھیں ۔

2815651690_f6b84f2a13.jpg

اس کے بعد جب آپ ماؤس کو سلیکشن کے درمیان لے کر جائیں گے تو کرسر کا نشان بدل کر + ہو جائے گا ۔ ماؤس سے کلک کر کے آپ اس سلیکشن کو کسی دوسری جگہ لے جا سکتے ہیں ۔

2815651468_57ee97bc29.jpg

اوپر کی تصویر میں دیکھیں کہ صرف سلیکشن کا لگایا گیا حاشیہ ہی ایک سے دوسری جگہ منتقل ہوا ہے، اور تصویر پر کوئی فرق نہیں پڑا ۔

اب ہم سلیکشن کو اس طرح منتقل کرنا چاہتے ہیں کہ منتخب شدہ حصہ بھی ساتھ منتقل ہو۔ ایسا ہم تمام سلیکشن ٹولز کی مدد سے بنائی گئی سلیکشن کے ساتھ کر سکتے ہیں ۔ اور ایسا کرنے کے بھی دو مختلف طریقے ہیں ۔ پہلے طریقہ میں منتخب شدہ حصہ کو اس طرح منتقل کرنا کہ وہاں خالی جگہ رہ جائے ۔ ایسا کرنے کے لئے Ctrl اور Alt کے بٹن دبا کر ماؤس کی مدد سے سلیکشن کو منتقل کریں ۔

2815650888_73ffebcfd4.jpg

اوپر کی تصویر میں ہم نے سیارے کی جگہ بدل دی ہے، اور جہاں سیارہ موجود تھا وہاں جگہ خالی رہ گئی ہے ۔ دوسرے الفاظ میں بنیادی طور پر یہاں سلیکشن کو Cut کر کےدوسری جگہ Paste کر دیا گیا ہے ۔

دوسرے طریقہ میں سلیکشن کو اس طرح منتقل کیا جاتا ہے، کہ سلیکشن اور منتخب شدہ حصہ بھی منتقل ہو جائے اوراصل تصویر بھی ویسی ہی رہے ۔ ایسا کرنے کے لئے Shift اور Alt کے بٹن دبا کر ماؤس کی مدد سے سلیکشن کو منتقل کر لیں ۔نیچے کی تصویر میں دیکھیں، سیارہ کی ایک جگہ سے دوسری جگہ یوں منتقل کیا گیا ہے کہ اصل سیارہ وہیں موجود رہا ہے ۔

2814800345_5dc742bba8.jpg

نوٹ ۔ Shift اور Ctrl کے ساتھ Alt دباتے وقت پہلے Alt کا بٹن دبائیں ۔
 

جہانزیب

محفلین

گمپ میں سلیکشن ٹولز کی طرح تیرہ مختلف قسم کے پینٹ ٹولز میسر ہیں ۔ پینٹ ٹولز کو عرف عام میں برش ٹولز بھی کہا جاتا ہے، اور مندرجہ ذیل برش ٹولز گمپ میں میسر ہیں ۔

2816241016_62c637168a_o.png

ان ٹولز کے بارے میں تفصیلات سے پڑھنے کے لئے موضوع پر کلک کر کے پڑھا جا سکتا ہے ۔ بنیادی استعمال کا جائزہ ہم فرداً فرداً اختصار سے اگلی تحاریر میں لیں گے ۔

اگر آپ ذیل کی ویڈیو کی طرح‌ کی کوئی ویڈیو یا ڈرائنگ دیکھنے کے بعد اپنے آپ کو کوسنا شروع کر دیں‌ کہ آپ ایسا کیوں‌ نہیں‌ کر سکتے، تو پریشان مت ہوں‌کیونکہ ایسا کرنے کے لئے گرافکس ٹیبلٹ‌ کا استعمال کیا جاتا ہے، ماوس سے بھی یہ سب کیا جا سکتا ہے، لیکن نتائج اتنے بہتر نہیں‌ ہوں‌ گے ۔برش ٹولز ٹٰبلٹس کے ساتھ بہترین کام کرتے ہیں‌ ۔

[ame]http://www.youtube.com/watch?v=XeqbndmY2YI[/ame]
 

جہانزیب

محفلین

ان تینوں اوزار کا استعمال تقریباً ایک جیسا ہی ہے، اس لئے ہم ان تینوں پر ایک ہی مضمون پر بات کریں گے ۔ نیچے کی تصویر میں ایک ہی سائز کے برش سے تینوں اوزار سے ایک لائن بنائی گئی ہے، جس سے ان اوزار کا فرق واضح ہو جاتا ہے ۔

2856971152_4d60f852c7.jpg

پنسل سے بنائی گئی لائن سب سے کھردری اور تیکھی ہے، پینٹ برش سے بنائی گئی لائن اتنی کھردری نہیں ہوتی، اور ان تینوں اوزار میں سب سے زیادہ استعمال ہونے والا اوزار ہے ۔ جبکہ ائیر برش سے بنائی گئی لائن سب سے مدھم ہے، اور اس کو آسانی سے کنٹرول کیا جا سکتا ہے، علاوہ ازیں ائیر برش سے پینٹ کرتے ہوئے، سٹروکس اس بات پر بھی انحصار کرتے ہیں کہ کتنی تیزی اور کتنے دباؤ کا استعمال کیا گیا ہے ۔ ائیر برش کو ماؤس کی بجائے اگر آپ کے پاس گرافکس ٹیبلیٹ ہے تو زیادہ بہتر نتائج حاصل ہوتے ہیں، بلکہ گرافکس ٹیبلیٹ استعمال کرنے والے زیادہ تر اسی کا استعمال کرتے ہیں ۔

ان تینوں اوزار کی ترجیحات بھی ایک جیسی اور استعمال ہونے والے برش بھی ایک جیسے ہیں، بنیادی استعمال کے لئے اوزار کو منتخب کریں، پھر ترجیحات میں اپنی مرضی کا برش منتخب کر کے تصویر پر رنگ کر سکتے ہیں، اگر تو تصویر چھوٹی ہے تو پنسل ٹول سے بہتر نتائج حاصل ہوتے ہیں ۔

2856971058_23b8bcb5f9_o.png

ترجیحات کو تفصیل سے پڑھنے کے لئے آپ یہاں سے مدد لے سکتے ہیں ۔
 

جہانزیب

محفلین
اِنک ٹول گمپ کا کیلگرافی یا خطاطی کے لئے استعمال کیا جانے والا اوزار ہے ، لیکن بری خبر یہ ہے کہ اگر آپ کے پاس گرافکس ٹیبلیٹ نہیں ہے تو آپ کو اس کا کوئی فائدہ نہیں، ہاں اگر آپ کا ماؤس پر کنٹرول بہت زیادہ ہے اور خوشخط بھی ہیں، تب آپ اس کا استعمال بخوبی کر سکتے ہیں، نہیں تو اس سے کم از کم آپ پینٹ برش کا کام لے سکتے ہیں، ایک عام استعمال کنندہ کے لئے یہ اوزار بے کار ہی ہے ۔

اس ٹول کی ترجیحات نام سے ہی واضح ہو جاتی ہیں ۔

2857097082_4dee9f2bf0_o.png

Size : اس سے قلم کی نب کی چوڑائی کا سائز کم یا زیادہ کیا جا سکتا ہے ۔

Angle: اس سے قلم کا صحفہ پر کس زاویہ سے لکھنا ہے ۔

اس کے بعد Sensitivity میں

Tilt : اس سے قلم کے جھکاؤ کو درست کیا جاتا ہے ۔
Speed : لکھنے کی رفتار کو کم یا زیادہ کیا جا سکتا ہے، جتنی تیزی سے لکھیں گے اتنی ہی لکھائی کی موٹائی کم ہو گی ۔
اور سب سے آخر میں قلم کی تین مختلف قسمیں ہیں جو شکل سے ہی ظاہر ہیں ۔

لیکن اگر آپ کے پاس گرافکس ٹیبلیٹ نہیں ہے تو شاذ ہی آپ اس کا استعمال کریں گے ۔
 

جہانزیب

محفلین
اس ٹول کی مدد سے ہم پوری تصویر یا تصویر میں منتخب کردہ حصوں میں دل کھول کر یا بالٹی بھر کر ایک ہی دفعہ میں رنگ بھر سکتے ہیں ۔ اس ٹول کو استعمال کرنے کے لئے اسے منتخب کریں، جو رنگ بھرنا چاہتے ہیں، اسے منتخب کر کے سلیکشن یا پھر پوری تصویر میں جہاں رنگ بھرنا ہو، وہاں کلک کر دیں ۔ یہ اس کا بنیادی استعمال ہے، اس کی مختلف ترجیحات کے لئے یہاں تفصیل سے پڑھا جا سکتا ہے ۔

یہ گرافکس کے لئے انتہائی مفید اوزار ہے، اس کی مدد سے ہم دو رنگوں کے امتزاج سے کسی سلیکشن یا پوری تصویر کو بھر سکتے ہیں ۔ ایسا کرنے کے لئے اسے منتخب کریں، اپنے رنگ منتخب کریں، اس کے بعد جس سمت میں آپ رنگوں کا امتزاج حاصل کرنا چاہتے ہیں وہاں ماؤس کا بایاں کلک کر کے بٹن دبا کر رکھیں اور جس سمت میں امتزاج چاہتے ہیں اس طرف ماؤس کو لے جا کر کے چھوڑ دیں ۔

2952662531_6e74f19397.jpg

2953513562_fc5e06bd05.jpg


گمپ میں اس اوزار کو منتخب کر کے اس کی ترجیحات میں پہلے سے بنے بنائے کئی امتزاج موجود ہیں، اس کے علاوہ آپ آسانی سے اپنے مزاج کے مطابق نئے بلنڈ بھی تیار کر سکتے ہیں ۔

اس کے علاوہ امتزاج کی تیرہ مختلف اشکال بھی ترجیحات میں شامل ہیں، جہاں آپ اپنی سلیکشن کی مناسبت سے کسی ایک کو منتخب کر سکتے ہیں ۔ زیادہ استعمال ہونے والی اشکال میں Linear یا یک سمتی اور Radial یا دائروی شکل میں اس کا استعمال ہے ۔
ان ترجیحات کو تفصیل میں پڑھنے کے لئے یہاں مزید پڑھا جا سکتا ہے ۔

اس اوزار کا استعمال نہایت آسان اور بنیادی ہے ۔ یہ کسی گرافک یا تصویر کی لئیر میں موجود حصوں یا پھر کسی سلیکشن میں موجود حصوں کو مٹانے کے کام آتا ہے ۔
استعمال کے لئے اسے منتخب کریں، ترجیحات میں سے تصویر کے مطابق اس کا سائز منتخب کر کے، جو حصے مٹانا مقصود ہوں وہاں پر ماؤس کا بایاں بٹن دبا کر انہیں خذف کر دیں ۔
اس اوزار کا یہی بنیادی مقصد ہے لیکن اسے ہم ایک برش کے طور پر بھی استعمال کر سکتے ہیں، جس کے لئے اس کی ترجیحات کو مزید یہاں پڑھا جا سکتا ہے ۔
 

جہانزیب

محفلین
کئی لوگوں کے چہرے پر کیل مہاسے ہوتے ہیں، اور میرے جیسے کہتے ہیں کہ تصویر تو دکھاؤ وہ پریشان ہو جاتے ہیں، کہ اب کیا کروں۔ تصویر میں ہم ایسی خامیاں بڑی آسانی کے ساتھ درست کر سکتے ہیں ۔ اس مقصد کے لئے ہم ہیلنگ ٹول کا استعمال کرتے ہیں ۔
اسے استعمال کرنے کے لئے اوزاروں میں اسے منتخب کریں، جس حصہ کو درست کرنا ہے اس کی مناسبت سے کسی برش کو پہلے منتخب کر لیں ۔اس کے بعد تصویر کے جس حصہ کو درست کرنا ہے اس جیسے یا اس کے قریب تر حصہ جو درست حالت میں موجود ہو پر ماؤس لے جا کر Ctrl دبا کر وہاں کلک کریں، اور پھر جو حصہ درست کرنا ہو وہاں پر جا کر ماؤس کا بایاں کلک کر دیں ۔ لو جی بن گئی بات ۔

2953589086_196f2c934d.jpg
2953589262_0800166e31.jpg

لیکن اس اوزار کا صرف یہی ایک مقصد نہیں ہے، اس کی ترجیحات بدل کر بہت سے کام کئے جا سکتے ہیں ۔ انہیں تفصیلاً پڑھنے کے لئے یہاں مزید پڑھا جا سکتا ہے ۔
 

جہانزیب

محفلین
کلون ٹول کا استعمال بھی ہیلنگ ٹول جیسا یے، اور کام بھی ہیلنگ ٹول والا ہے ۔ ان میں کچھ فرق مندرجہ ذیل ہیں، کلون ٹول کی مدد سے ہم جب کوئی حصہ منتخب کرتے ہیں تو بعینہ وہی حصہ اور اس میں موجود پکسلز ہی کاپی ہوتے ہیں، جتنا کہ برش کا سائز ہوتا ہے ۔ جبکہ ہیلنگ ٹول کی مدد سے برش کے گھیراؤ کے ارد گرد کے پکسلز بھی کاپی ہوتے ہیں ۔
اس لئے ہیلنگ ٹول کی مدد سے کسی تصویر کی درستگی سے قدرتی پن کا احساس باقی رہتا ہے، جبکہ بے اختیاطی سے پکسلز کو منتخب کرنے سے کلون ٹول میں یہ واضح طور پر نظر آتے ہیں ۔
علاوہ ازیں کلون ٹول کی مدد سے ہم نا صرف جس تصویر پر کام کر رہے ہوتے ہیں وہیں سے پکسلز منتخب کر سکتے ہیں، بلکہ اگر چاہیں تو تصویر میں پٹرن منتخب کر کے، کلون کی مدد سے انہیں پینٹ کر سکتے ہیں، جو کہ ہیلنگ ٹول میں ممکن نہیں ہے ۔ ان سب باتوں کا خلاصہ کہ اگر آپ تصویر میں موجود چھوٹی خامیاں درست کرنا چاہتے ہیں تو ہیلنگ ٹول بہتر نتائج دیتا ہے ۔

اس کو استعمال کرنے کا طریقہ بھی ہیلنگ ٹول جیسا ہے، پہلے Ctrl دبا کر تصویر میں کوئی جو حصہ کاپی کرنا ہو وہاں برش کا سائز منتخب کر کے بایاں ماؤس کا کلک کریں، اس کے بعد جہاں ان پکسلز کو پینٹ کرنا ہو وہاں جا کر بایاں کلک کر دینے سے وہ پکسلز وہاں چسپاں ہو جائیں گے ۔

جیسا کہ ہیلنگ ٹول اور کلون ٹول کی مدد سے ہم تصویر کاایک حصہ کاپی کر کے، کسی دوسری جگہ چسپاں کر سکتے ہیں ۔ لیکن بعض اوقات تصویر کا تناسب اس طرح کا ہوتا ہے کہ کاپی اور چسپاں کدہ حصے مصنوعی لگتے ہیں، کیونکہ ان دونوں ٹولز سے جتنے پکسلز کاپی ہوتے ہیں بعینہ وہی چسپاں ہو جاتے ہیں، فرض کریں آپ ایک گھر کی تصویر میں ایک کھڑکی جو کہ تصویر میں قریب ہے کو کاپی کر کے کسی ایسی جگہ چسپاں کرنا چاہتے ہیں جو کہ تصویر میں تناسب کے لحاظ سے دور ہے، تو ظاہری بات ہے کہ دوری کی وجہ سے کھڑکی کو چھوٹا نظر آنا چاہیے ۔
اس مقصد کے لئے ہم پرسپیکٹوِو کلون ٹول کی مدد لیتے ہیں ۔ اسے استعمال کرنے کا طریقہ تھوڑا مختلف ہے ۔ سب سے پہلے اس ٹول کو منتخب کریں، اس کے بعد ٹول کی ترجیحات میں جا کر Modify Perspective کو منتخب کر لیں، ایسا کرنے کے بعد تصویر پر کلک کرنے سے تصویر کے کونوں پر چار عدد نوڈ یا کنٹرول پوائینٹ ظاہر ہو جائیں گے ۔ ان کی مدد سے آپ نے جس حصہ کو کاپی اور پیسٹ کرنا ہے اس کا تناسب منتخب کر لیں ۔ مثلاً ذیل کی تصویر میں گملوں کے حساب سے تناسب منتخب کیا گیا ہے ۔

2962741150_291002ab5e.jpg

2962740964_fd2081065b.jpg


اگلے مرحلہ میں اوزار کی ترجیحات میں سے، Perspective Clone کو منتخب کر لیں، ایسا کرنے کے بعد جس حصہ کو کاپی کرنا ہے وہاں Ctrl دبا کر کلک کریں، اور بعد میں جہاں چسپاں کرنا ہے، وہاں بایاں کلک دبا کر پینٹ برش کی طرز پر پینٹ کرنا شروع کر دیں ۔ ایک بات جو ذہن نشین رکھنے کی ضرورت ہے، کہ جب آپ پینٹ کر رہے ہوں تو جس حصے کو آپ نے کاپی کیا تھا وہاں ایک جمع کا نشان نظر آئے گا، جو ماؤس ہلانے کی صورت میں ہلے گا، آپ نے اس پر نظر رکھنی ہے، کیونکہ جہاں یہ جمع کا نشان ہو گا وہ حصہ دوسری جگہ پر چسپاں ہو گا ۔ ذیل میں اب نئے گملے کو اور تناسب کے حساب سے اس کے حجم کو دیکھیں ۔

2962740742_0eeba7b4ba.jpg
 

جہانزیب

محفلین
جیسا کہ اس اوزار کے نام سے ظاہر ہے، یہ تصویر میں کسی حصے کو دھندلا یا تیکھا بنانے کے کام آتا ہے ۔ لیکن اگر آپ کو تصویر میں موجود مکمل لئیر یا پھر مکمل تصویر کو دھندلا یا شارپن کرنا مقصود ہو تو پھر فلٹرز کے ذریعے ایسا کرنا زیادہ سود مند ثابت ہوتا ہے ۔ اس اوزار کا استعمال تبھی کرنا چاہیے جب لئیر یا تصویر میں کسی ایک حصہ کو دھندلا یا تیکھا بنانا مقصود ہو ۔
اس کو استعمال کرنے کا طریقہ یہ ہے کہ اوزار کو منتخب کریں، اس کے بعد جس حصہ کو دھندلانا یا تیکھا کرنا مقصود ہو، ترجیحات میں اس کی مناسبت کے حساب سے برش کا حجم یا شکل منتخب کریں ۔ اگر تو کسی حصے کو دھندلا کرنا مقصود ہو تو Blur کو منتخب کریں، اور جب تیکھا کرنا مقصود ہو تو Sharpen کو منتخب کر کے مطلوبہ حصے پر ماؤس کا بایاں بٹن دبا کر پینٹ برش کی طرز پر برش کریں ۔

اس اوزار کی مدد سے تصویر میں موجود رنگوں کو آپس میں گڈ مڈ کیا جا سکتا ہے، اور دھواں جیسا ایفیکٹ حاصل کیا جا سکتا ہے ۔
اس کو استعمال کرنے کا طریقہ یہ ہے کہ اسے منتخب کریں، ترجیحات میں سے مرضی کا برش منتخب کریں، اور ماؤس کا بایاں بٹن دبا کر رنگوں کے اوپر جس ترتیب سے انہیں گڈ مڈ کرنا ہو کے حساب سے پینٹ کرنے کی طرز پر ماؤس کو چلائیں ۔اس میں جٹر Jitter کی مقدار کم زیادہ کر کے آپ نہایت بہتر نتائج حاصل کر سکتے ہیں ۔

2964910951_15701c588a_m.jpg
2964911069_851f36e0ab_m.jpg

اس اوزار کے استعمال سے ہم تصویر کے رنگوں کو تیکھا یا پھیکا کر سکتے ہیں ۔ تیکھا کرنے کے لئے ترجیحات میں burn کو منتخب کریں اور رنگوں کو پھیکا کرنے کے لئے Dodge کو منتخب کریں ۔
اس کے علاوہ ترجیحات میں تین مختلف قسم کے موڈ بھی موجود ہیں، جو کہ درج ذیل ہیں ۔
shadows . اس کو منتخب کرنے کے بعد جب اوزار کا استعمال کیا جائے تو ان کا اطلاق صرف گہرے رنگوں پر اثر انداز ہو گا ۔
Midtones . اس کو منتخب کرنے سے تصویر میں موجود اوسط درجے کے رنگ ، جو نہ تو گہرے ہوں نہ ہی روشن پر اس اوزار کا اطلاق ہو گا ۔
Highlights . اس ترجیح کو منتخب کرنے سے اوزار کا اطلاق تصویر میں موجود روشن رنگوں پر ہو گا ۔
اوزار استعمال کرنے کے لئے اسے منتخب کر کے ماؤس کا بایاں بٹن دبا کر مطلوبہ حصے پر ماؤس کو چلائیں ۔
مثال کے طور پر آپ کی تصویر میں کوئی سایہ دار جگہ ہے، جہاں اندھیرا زیادہ ہے تو ترجیحات میں shadows اور dodge کو منتخب کر کے وہاں ماؤس چلانے سے وہ جگہ تھوڑی روشن ہو جائے گی ۔
 

جہانزیب

محفلین

تصاویر کی ہیت بدلنے کے لئے ٹرانسفارم ٹولز کا استعمال کیا جاتا ہے ۔ گمپ میں آٹھ عدد ٹرانسفارم ٹولز موجود ہیں، جن کا استعمال نہایت سادہ اور بنیادی ہے ۔

2972846828_4ff35d1ddb_o.png

ان تمام اوزاروں کی خصوصیات میں کچھ باتیں مشترک ہیں، ہم مختصر طور پر اُن کا جائزہ یہاں لیتے ہیں ۔ مندرجہ ذیل تصویر اوزاروں کی ترجیحات یا خصوصیات کو ظاہر کرتی ہے ۔

2971999637_a10836bc6b.jpg

سب سے پہلی قطار میں ہمیں Transform لکھا نظر آتا ہے، اور اس کے سامنے تین اشکال بنی ہیں ۔

پہلی شکل
2971999565_09cc0357ed.jpg
کو منتخب کرنے سے اوزار جِس لئیر یا پرت پر آپ کام کر رہے ہیں، صرف اسی پر کام کر سکتے ہیں۔ لیکن تصویر کی جس پرت پر آپ کام کر رہے ہوں اس میں کوئی سلیکشن موجود ہو گی تو پرت میں موجود سلیکشن میں کام کر سکتے ہیں، سلیکشن کی نا موجودگی میں پوری پرت پر اوزار کا اثر ہو گا ۔

دوسرے ڈبے
2972846476_67287fd022.jpg
کو منتخب کرنے سے اوزار صرف اور صرف موجود سلیکشن پر اثر انداز ہو گا، قطع نظر اس کے کہ سلیکشن کس پرت میں موجود ہے ۔

تیسرے ڈبے
2972846644_59e3cf53c8.jpg
کو منتخب کرنے سے اگر آپ کی تصویر میں کوئی پاتھ موجود ہے تو اوزار صرف اسی پر اثر انداز ہو گا ۔

آغاز کے اِن ترجیحات کو ذہن میں رکھیں، باقی ترجیحات انشااللہ عملی اسباق میں زیر بحث آئیں گی ۔
 

جہانزیب

محفلین
مُوو ٹول ۔

جیسا کہ نام سے ظاہر ہے، یہ اوزار کسی سلیکشن، پرت یا پوری تصویر کو ایک جگہ سے دوسری جگہ منتقل کرنے کے کام آتا ہے ۔
اس کو استعمال کرنے کے لئے اوزار کو منتخب کریں، ماؤس کا بایاں بٹن دبا کر جہاں منتقل کرنا ہو، اُس طرف ماؤس چلانے سے تصویر، تصویر میں موجود پرت، یا کوئی سلیکشن وہاں منتقل ہو جائے گی ۔
یاد دہانی : کسی پرت یا سلکیشن کی منتقلی کے دوران ایک بات ذہن میں رکھیں، جب آپ اس اوزار کو منتخب کر کے متعلقہ پرت یا سلیکشن کے اندر جب ماؤس کو لائیں گے تو کرسر کا نشان جمع + کی شکل میں بننا چاہیے، تب بایاں کلک دبا کر منتقلی کا عمل انجام دیں، اس نشان کے ظاہر نا ہونے کی صورت میں اوزار کا اثر مکمل تصویر پر اثر انداز ہو گا ۔ اور یہ آغاز میں کافی مشکلات کرتا ہے ۔ اس لئے اسے ذہن نشین کر لیں ۔

ائلائن ٹول ۔

اس اوزار کی مدد سے ہم ہم تصویر میں موجود پرتوں یا لئرز کو ایک قطار میں لا سکتے ہیں، عموماً یہ کام ہم موو ٹول سے کر لیتے ہیں، اور میرے خیال میں ایسا کرنا زیادہ آسان ہے ۔
استعمال کے لئے اس کو منتخب کرنے سے اس اوزار کی ترجیحات کھل جائیں گی، جو کہ مندرجہ ذیل ہیں

2972977786_2aa784caef.jpg

سب سے پہلے ترجیحات میں ہمیں بتانا ہو گا کہ ہم کس طرح تصاویر کو قطار میں لانا چاہتے ہیں؟ اگر Relative to پر کلک کریں تو اس میں ہمیں ترجیحات مل جائیں گی، کہ آیا آپ تصویر میں موجود کسی سلیکشن کے حساب سے تمام پرتوں کو یکجا کرنا چاہتے ہیں؟ تصویر میں موجود کسی ایک پرت کے لحاظ سے ایسا کرنا چاہتے ہیں، مکمل تصویر کے حساب سے ایسا کرنا چاہتے ہیں، تصویر میں موجود کسی پاتھ کے لحاظ سے یا پھر تصویر کے کسی ایک چینل کے حساب سے ایسا کرنا چاہتے ہیں ۔
اس کو منتخب کر کے دئے گئے تیروں کے نشان پر کلک کرنے سے تمام پرتیں ایک قطار میں آ جائیں گی ۔ مثال میں تصویر دیکھیں

2972120373_112516d8bf_m.jpg

اس میں چار تہیں موجود ہیں، ایک سفید بیک گراؤنڈ کی، ایک کالے ڈبے والی، ایک پیلے ڈبے اور ایک سرخ ڈبے والی ۔
ہم نے مکمل تصویر کی مناسبت سے ان تمام پرتوں کو تصویر کے مرکز میں جمع کرنا ہے ۔ ہم Shift کے ساتھ کلک کر کے تمام پرتوں کو اکھٹا کر سکتے ہیں، یا آسان طریقہ یہ ہے کہ تمام اوزار کو منتخب کر کے ایک سلیکشن کی طرز پر ڈبہ بنایا جائے جس میں تمام پرتیں سما جائیں ۔

2972968208_f4a0b662e0_m.jpg

ایسا کرنے سے تمام پرتیں منتخب ہو جائیں گی، اب ہم ترجیحات میں مکمل تصیر کے لحاظ سے ان تمام پرتوں کو مرکز میں جمع کرنا چاہتے ہیں، تو Relative to میں Image منتخب کر کے درمیان والے تیر پر کلک کرنے سے تمام پرتیں تصویر کے مرکز میں اکٹھی ہو جائیں گی۔

2972968100_5f89cb2bb9_m.jpg

لیکن کسی ایک پرت کو بلحاظ دوسری پرت کے درست کرنا ہو تو زیادہ مناسب موو ٹول کا استعمال ہے ۔
 
کیفیت
مزید جوابات کے لیے دستیاب نہیں
Top