طارق شاہ
محفلین
فراق گورکھپوری
غزل
کچھ اپنا آشنا، کیوں اے دلِ ناداں نہیں ہوتا
کہ آئے دن، یہ رنگِ گردشِ دَوراں نہیں ہوتا
ریاضِ دہرمیں جُھوٹی ہنْسی بھی ہم نے دیکھی ہے
گُلِستاں دربغل ہر غنچۂ خنداں نہیں ہوتا
یقیں لائیں تو کیا لائیں، جو شک لائیں توکیا لائیں
کہ باتوں میں تِری سچ جُھوٹ کا اِمکان نہیں ہوتا
سُکوں نا آشنا رہتے ہیں رو کر بھی تِرے وحشی
کہ دامانِ بیاباں دامنِ جاناں نہیں ہوتا
قسم تیری، تجھے پا کربھی تجھ کو پا نہیں سکتے
یہ عُقدہ حل بھی ہو کر عُقدۂ آساں نہیں ہوتا
خلوصِ عشق برحق ، دِیدۂ پُرنم بجا ، لیکن
غمِ ہجراں بھی سُنتے ہیں، غمِ جاناں نہیں ہوتا
نِگاہِ اہلِ دل کے اِنقلاب آئے ہیں دُنیا میں
یقیں رکھ عشق اِتنا بے سرو ساماں نہیں ہوتا
فضائِل لاکھ ہوں لیکن محبّت ہی نہیں جس میں
فرشتہ ہو، خُدا ہو، کچھ بھی ہو، اِنساں نہیں ہوتا
نِگاہیں آشنا کیوں جان کر انجان بنتی ہیں
کئے جا اپنی سی تدبیر، میں شاداں نہیں ہوتا
اُمڈ آئے جو آنسو، اِنقلاب اِس کو نہیں کہتے
کہ ناداں! ہر تموجِ بحر کا طوفاں نہیں ہوتا
فراق اِک اِک سے بڑھ کرچارہ سازِ درد ہیں، لیکن
یہ دُنیا ہے ، یہاں ہر درد کا درماں نہیں ہوتا
رگھوپتی سہائے، فراق گورکھپوری
آخری تدوین:
