وصال۔ علامہ اقبال سے معذرت کے ساتھ

[محمد خلیل الرحمٰن]

وصال​

محمد خلیل الرحمٰن​

(علامہ اقبال سے معذرت کے ساتھ)​

​

جستجو تیری ہی تڑپاتی تھی جب دیکھوں تجھے​

کھڑکیوں کی اوٹ سے یا روزنَ دیوار سے​

​

ہم جماعت ساتھیوں کو خود ہی اُکساتا تھا میں​

تجھ کو پر جب سامنے پاتا تھا، شرماتا تھا میں​

​

پوچھتے ہیں سب ہی یہ کیسے ہوا، کیونکر ہوا​

کس طرح برباد و بے آباد میرا گھر ہوا​

​

’’میرے پہلو میں دل مضطر نہ تھا، سیماب تھا‘‘​

’’ارتکاب جرم الفت کے لیے بے تاب تھا‘‘​

​

پھر اچانک یوں ہوا اک روز تو مل بھی گئی​

آرزوؤں کی کلی اک روز یوں کھل بھی گئی​

​

نامرادی ہم جماعتوں میں مری مشہور تھی​

کیونکہ تو بھی اُن دنوں کچھ اور ہی مغرور تھی​

​

سامنے آیا تو حاصل مجھ کو آزادی ہوئی​

تجھ سے اظہارَ محبت میری بربادی ہوئی​

​

جوں ہی میں نے ہاتھ پکڑا اور کچھ کہنے لگا​

تو نے زنّاٹے کا اک تھپّڑ ہی مجھ پر جڑ دیا​

​

اب تاثر کے جہاں میں ہے پشیمانی مری​

ہم جماعتوں پر گراں ہے گو غزل خوانی مری​

​

’’عشق کی گرمی سے شعلے بن گئے چھالے مرے‘‘​

دوستوں میں ہوگئے مشہور اب نالے مرے​

​

الف عین ۔ محمد وارث، محمد یعقوب آسی، یوسف-2، فرحت کیانی

 

[نایاب]

بہت خوب

 

[محمد خلیل الرحمٰن]

بہت خوب

جزاک اللہ نایاب بھائی

 

[محسن وقار علی]

 

[محمد خلیل الرحمٰن]

جزاک اللہ محسن وقار علی بھائی

 

[شمشاد]

جوں ہی میں نے ہاتھ پکڑا اور کچھ کہنے لگا
تو نے زنّاٹے کا اک تھپّڑ ہی مجھ پر جڑ دیا

چچ چچ چچ، یعنی کہ اس نے ہتھ ہولا نہیں رکھا۔
بہت داد قبول فرمائیں جناب۔

 

[الف عین]

علامہ کی روح بھی خوش ہوئی ہو گی ہم سب کی طرح

 

[یوسف-2]

علامہ کی روح بھی خوش ہوئی ہو گی ہم سب کی طرح

سر جی میرے پاس تو ”خبر“ کچھ اور ہے۔
آن بی ہاف آف روحِ علامہ اقبال، محمد خلیل الرحمٰن بھائی کی ’معذرتِ وصال‘ قبول کی جاتی ہے۔

 

[محمد خلیل الرحمٰن]

سر جی میرے پاس تو ”خبر“ کچھ اور ہے۔
آن بی ہاف آف روحِ علامہ اقبال، محمد خلیل الرحمٰن بھائی کی ’معذرتِ وصال‘ قبول کی جاتی ہے۔

جرنلسٹ جو ٹھہرے۔ دور کی کوڑی اور اندر کی خبر لاتے ہیں آپ۔

 

[مہ جبین]

جوں ہی میں نے ہاتھ پکڑا اور کچھ کہنے لگا
تو نے زنّاٹے کا اک تھپّڑ ہی مجھ پر جڑ دیا
ایسے "مریضوں " کے " مرض " کا ایک ہی شافی علاج ہے " زناّٹے دار تھپڑ"
بہت خوب محمد خلیل الرحمٰن بھائی

 

[سید شہزاد ناصر]

لگتا ہے مریض محبت کو پہلی خوراک ہی کافی زوردار ملی ہے
بہت خوب لکھا صبح کا آغاز بہت ہی خوشگوار رہا
اللہ کرے زور قلم زیادہ

 

[محمد وارث]

بہت خوب خلیل صاحب

 

[محمد یعقوب آسی]

اچھی کوشش ہے تاہم اس میں بہت ساری گنجائشیں بھی ہیں۔

 

[محمد یعقوب آسی]

جستجو تیری ہی تڑپاتی تھی جب دیکھوں تجھے
کھڑکیوں کی اوٹ سے یا روزنَ دیوار سے

میری گزارشات:
تڑپاتی تھی، اور دیکھوں ۔۔ فعل میں ظاہراً عدم مطابقت ہے۔
اوٹ پردے کی ہوتی تو بہتر تھا، کھڑکیوں کی اوٹ ؟؟۔
روزنَ دیوار ۔۔ ٹائپو ہے! زیر کی جگہ زبر لکھا گیا۔

 

[محمد یعقوب آسی]

ہم جماعت ساتھیوں کو خود ہی اُکساتا تھا میں
تجھ کو پر جب سامنے پاتا تھا، شرماتا تھا میں

کس بات پہ اکساتا تھا؟

 

[محمد یعقوب آسی]

پوچھتے ہیں سب ہی یہ کیسے ہوا، کیونکر ہوا
کس طرح برباد و بے آباد میرا گھر ہوا

سب ہی ۔۔ کسی قدر گرانی کا احساس پیدا کر رہا ہے۔
۔۔۔ سب کہ یہ کیسے ہوا ۔۔۔

یہاں تک (میری کم علمی سمجھ لیجئے کہ) میں تسلسل کو نہیں پا سکا۔

 

[محمد یعقوب آسی]

پھر اچانک یوں ہوا اک روز تو مل بھی گئی
آرزوؤں کی کلی اک روز یوں کھل بھی گئی

ذوق اپنا اپنا ۔۔ مجھے ’’اک روز‘‘ کی تکرار میں کشش محسوس نہیں ہوئی۔ اور ’’یوں‘‘ یعنی تیرے ملنے سے، دوسرے مصرعے میں ’’اک روز‘‘ کا لزوم ہٹا کر اس ’’یوں‘‘ کو قوی کرنے والے الفاظ لائے جا سکتے ہیں۔

 

[محمد یعقوب آسی]

نامرادی ہم جماعتوں میں مری مشہور تھی
کیونکہ تو بھی اُن دنوں کچھ اور ہی مغرور تھی

عین گر گیا صاحب! ’’کیونکہ‘‘ اور ’’کچھ اور ہی‘‘ محلِ نظر ہیں۔

 

[محمد یعقوب آسی]

سامنے آیا تو حاصل مجھ کو آزادی ہوئی
تجھ سے اظہارَ محبت میری بربادی ہوئی

کیا سامنے آیا؟ یا کون سامنے آیا؟
آزادی اور بربادی میں ربط کیونکر بنتا ہے، کوئی اہلِ نظر میری مدد کریں گے؟

 

[محمد یعقوب آسی]

جوں ہی میں نے ہاتھ پکڑا اور کچھ کہنے لگا
تو نے زنّاٹے کا اک تھپّڑ ہی مجھ پر جڑ دیا

اس میں ’’ہی‘‘ کا کیا مقام ہے؟
ایک زناٹے کا تھپڑ اس نے ۔۔۔۔ یا ۔۔۔ تو نے ۔۔۔۔ توجہ فرمائیے گا۔