احمد مشتاق :::: نہیں زخم دل اب دکھانے کے قابل -- Ahmed Mushtaq

طارق شاہ

محفلین


غزلِ
احمد مشتاق

نہیں زخمِ دل اب دِکھانے کے قابل
یہ ناسُور ہے بس چُھپانے کے قابل

تِرے رُو برُو آؤں کِس منہ سے پیارے
نہیں اب رہا منہ دِکھانے کے قابل

وفورِ غم و یاس نے ایسا گھیرا
نہ چُھوڑا، کہیں آنے جانے کے قابل

شبِ ہجر کی تلخِیاں کچُھ نہ پُوچھو
نہیں داستاں یہ، سُنانے کے قابل

یہ، ٹُھکرا کے دل پھر، کہا مُسکرا کر !
نہ تھا دل یہ، دل سے لگانے کے قابل

جو دیکھا مجھے، پھیر لِیں اپنی آنکھیں
نہ جانا مجھے، منہ لگانے کے قابل

تِری بزْم میں، سینکڑوں آئے بیٹھے
ہمیں ایک تھے کیا، اُٹھانے کے قابل

یہ کافر نِگاہیں، یہ دلکش ادائیں
نہیں کچُھ رہا اب، بچانے کے قابل

دیارِ محبّت کے سُلطاں سے کہہ دو !
یہ ویراں کدہ ہے بسانے کے قابل

کِیا ذکر دل کا، تو ہنس کر وہ بولے !
نہیں ہے یہ د ل رحم کھانے کے قابل

نِگاہِ کرَم یُونہی رکھنا خُدارا
نہ میں ہُوں، نہ دِل آزمانے کے قابل

نشانِ کفِ پائے جاناں پہ یا رب
ہمارا یہ سر ہو جُھکانے کے قا بل

کبھی قبرِ مُشتاق پر سے جو گزُرے
کہا، یہ نِشاں ہے مِٹانے کے قابل

احمد مشتاق

 
آخری تدوین:

کاشفی

محفلین
نشانِ کفِ پائے جاناں پہ یا رب
ہمارا یہ سر ہو جُھکانے کے قا بل
بہت خوب جناب! شکریہ شیئر کرنے کے لیئے۔۔
 
جناب والا یہ غزل احمد مشتاق کی نہیں
پیر سید غلام معین الدین گیلانی تخلص مشتاق رح (والد محترم پیر سید غلام نصیر الدین نصیر گیلانی رح گولڑہ شریف) کی ہے
 
Top