میں نے پایا محبت کو فقیری میں ۔۔۔۔۔۔ برائے تنقید و اصلاح

[loneliness4ever]

السلام علیکم

امید ہے احباب خیر سے ہونگے
ایک کوشش برائے تنقید و اصلاح لایا ہوں


میں نے پایا محبت کو فقیری میں
زندگی دوست ہوتی ہے غریبی میں

سانس آتی ہے مخمل پر مگر گن کر
زندگی تنگ پڑتی ہے امیری میں

پایا ہے محفلوں میں بھی فرشتوں کو
رابطے دیکھے ہیں ایسے فقیری میں

حال ایسا محمد صلی اللہ علیہ وآلہ وسلم کے غلاموں کا
دسترس آسماں تک ہے اسیری میں

بزم ِ قیصر سے کیا ہو واسطہ اس کو
جو ہے سلطاں مدینے کی فقیری میں

س ن مخمور

بحر کے اراکین
فاعلاتن مفاعیلن مفاعیلن

 

[الف عین]

بحر کے بارے میں تو میں جاہل مطلق ہوں۔ عزیزی مزمل شیخ بسمل بتایں گے کہ یہ بحر کون سی ہے۔
میں وہی کہوں گا کہ ایسی نا مانوس بحروں کو استعمال کرتے ہوئے ساتذہ کو بھی ہر مصرع کی بندش دیکھنی پڑتی ہے، اس لئے مبتدیوں کو بہر حال اس سے بچنا چاہئے۔

 

[محمد یعقوب آسی]

بحر کے بارے میں تو میں جاہل مطلق ہوں۔ عزیزی مزمل شیخ بسمل بتایں گے کہ یہ بحر کون سی ہے۔
میں وہی کہوں گا کہ ایسی نا مانوس بحروں کو استعمال کرتے ہوئے ساتذہ کو بھی ہر مصرع کی بندش دیکھنی پڑتی ہے، اس لئے مبتدیوں کو بہر حال اس سے بچنا چاہئے۔

مکمل اتفاق کرتا ہوں۔

حوالہ: "تعارف" از: ارشد کاکوی (ڈھاکہ) جون 1960 ۔۔۔ کتاب کا نام: "رہنمائے سخن" از: محمد معز الدین ۔۔۔ ناشر : نیشنل بک فاؤنڈیشن اسلام آباد 2009

 

[محمد یعقوب آسی]

علمِ عروض کو شاعر اور قاری دونوں کے لئے معاون ہونا چاہئے۔ اپنے طور پر کوئی ’’بحر بنا لینا‘‘ اور اس میں سخن کرنا چنداں مفید نہیں۔ اس سے کہیں بہتر ہے کہ اپنے لئے بھی اور قاری کے لئے بھی آسانی پیدا کی جائے، نہ کہ قاری کو امتحان میں ڈالا جائے۔

 

[محمد اسامہ سَرسَری]

قوافی شائگاں ہیں۔

 

[loneliness4ever]

تمام اساتذہ کرام کی آمد اور توجہ پر ممنون ہوں
اللہ پاک آپ احباب کے علم و عمل میں اضافہ فرمائے
مجھ سے خاکساروں پر رہنمائی کا سلسلہ یوں ہی قائم رکھیں

اللہ آباد و خوشحال رکھے ۔۔۔۔۔۔۔۔۔آمین