منتخب اشعار برائے بیت بازی!

[الف نظامی]

جناب کم از کم آپکے شعر دوبارہ کہہ دینے میں کوئی مضائقہ نہیں ،
یاد عہد رفتہ میری خاک کو اکسیر ہے
میرا ماضی میرے استقبال کی تفسیر ہے

 

[شمشاد]

یا مجھے افسرِ شاہانہ بنایا ہوتا
یا میرا تاج گدایانہ بنایا ہوتا
خاک سری کے لیئے گرچہ بنایا تھا مجھے
کاش خاکِ درِ جاناں نہ بنایا ہوتا
(بہادر شاہ ظفر)

 

[الف نظامی]

اپنی ملت پر قیاس اقوام مغرب نہ کر
خاص ہے ترکیب میں قومِ رسولِ ہاشمی

 

[شمشاد]

یا رب غمِ ہجراں میں اتنا تو کیا ہوتا
جو ہاتھ جگر پہ ہے وہ دستِ دعا ہوتا
اک عشق کا غم آفت اور اُس پہ یہ دل آفت
یا غم نہ دیا ہوتا یا دل نہ دیا ہوتا
(چراغ حسن حسرت)

 

[الف نظامی]

اے رہرو فرزانہ ، رستے میں اگر تیرے
گلشن ہے تو شبنم ہو، صحرا ہے تو طوفاں ہو

 

[شمشاد]

وفا کا خواب، محبت کا آسرا لے جا
اگر چلا ہے تو جو کچھ مجھے دیا لے جا
(احمد فراز)

 

[الف نظامی]

امینِ راز ہے مردانِ حر کی درویشی
کہ جبرئیل سے ہے اس کو نسبتِ خویشی

 

[تیشہ]

یہی محسوس ہو جیسے کئی صدیاں گزاری ہیں
فقط اِک پل کی فرقت میں،اذیت ہو تو ایسی ہو،

 

[الف عین]

وفا کیسی کہاں کا عشق جب سر پھوڑنا ٹھہرا
تو پھر اے سنگ دل تیرا ہی سنگ آستاں کیوں ہو؟
پھر و۔۔۔

 

[MANSOOR REYAAN]

وہی کارواں ‘وہی راستے‘وہی زندگی وہی مرحلے
مگر اپنے اپنے مقام پر کبھی تم نہیں کبھی ھم نہیں
۔۔۔۔۔ ن۔۔۔۔۔

 

[الف عین]

نام آج کوئی یاں نہیں لیتا ہے انھوں کا
جن لوگوں کے کل ملک یہ سب زیر نگیں تھا

 

[MANSOOR REYAAN]

الٹی ہی چال چلتے دیوانگانِ عشق
کرتے ہیں بند آنکھوں کو دیدار کیلئے

 

[شمشاد]

یہ الگ بات ہے ساقی کہ مجھے ہوش نہیں
ہوش اتنا ہے کہ میں تجھ سے فراموش نہیں

 

[MANSOOR REYAAN]

نہ جانے خلق خدا کون سے عذاب میں ھے
ھوائیں چیخ پڑیں التجا کے لہجے میں
۔۔۔۔۔ ن۔۔۔۔۔۔

 

[شمشاد]

یارب اب تیری فردوس پہ حق ہے میرا
تُو نے اس دور کے دوزخ میں جلایا ہے مجھے

 

[الف نظامی]

یہ موجِ نفس کیا ہے؟ تلوار ہے
خودی کیا ہے ؟ تلوار کی دھار ہے
خودی کیا ہے ؟ رازِ درونِ حیات
خودی کیا ہے ؟ بیداریِ کائنات

 

[الف عین]

ترا نام دن کے نصاب میں، ترا نام رات کے خواب میں
ترا نام لوں تو میں سو سکوں، ترا نام لے کے جگا کروں۔

 

[الف نظامی]

نکل کے صحرا سے جس نے روما کی سلطنت کو الٹ دیا تھا
سنا ہے یہ قدسیوں سے میں نے وہ شیر پھر ہوشیار ہوگا

 

[الف عین]

ان آنکھوں کی سازشیں عجب ہیں
اے سادہ دلی! گواہ رہیو

 

[الف نظامی]

وہ دانائے سبل، ختم الرسل ، مولائے کل جس نے
غبارِ راہ کو بخشا فروغِ وادی سینا