معاشیات پہ اشعار

[جاسمن]

سِکّے جو نہیں جیب میں پتھر ہی اُٹھا لوں
غُصّہ ہی چلو رونقِ بازار پہ اُترے
افضل خان

 

[جاسمن]

حصص میں بانٹ رہے ہیں مجھے مرے احباب
میں کاروبار شراکت میں مارا جاؤں گا

 

[جاسمن]

بازار عشق میں ہیں بہت دل جگہ جگہ
دیکھیں وہ مول لیتے ہیں کس کی دکان سے
داغؔ دہلوی

 

[جاسمن]

اور مل جائیں گے تاجر تمہیں بازاروں میں
ہم محبت میں تجارت نہیں کرنے والے
اعتبار ساجد

 

[جاسمن]

ہمیں تسلیم ہے گھر بیٹھ کے قیمت نہیں لگتی
تو کیا بازار میں خود کو سجا کے رکھ دیا جائے
اعتبار ساجد

 

[جاسمن]

چلتا رہوں چُپ چاپ تو گاہک نہیں آتے
آواز لگاتا ہوں تو قیمت نہیں رہتی!!!!

 

[جاسمن]

بازار میں بیٹھے ہوئے تاجر ہیں ہراساں
وہ میری دکاں کھولنے دیتے نہیں مجھ کو
اعتبار ساجد

 

[جاسمن]

اک دن سنو گے میرے عزیزو کہ شہر میں
شامیں ادھار مانگنے والا نہیں رہا!!!!!!
اعتبار ساجد

 

[جاسمن]

گھر کی دہلیز سے بازار میں مت آ جانا
تم کسی چشم خریدار میں مت آ جانا
اعتبار ساجد

 

[جاسمن]

دل سی چیک بک ہے ترے پاس تجھے کیا دھڑکا
جی کو بھا جائے تو پھر چیز کی قیمت پہ نہ جا
اعتبار ساجد

 

[جاسمن]

یہ تو دیکھو کہ تمہیں لوٹ لیا ہے اس نے
اک تبسم پہ خریدار کے گن گاتے ہو
اعتبار ساجد

 

[جاسمن]

نہیں ہے نرخ کوئی میرے ان اشعار تازہ کا
یہ میرے خواب ہیں خوابوں کی قیمت کون رکھتا ہے
اعتبار ساجد

 

[جاسمن]

تیرے بعد دکانوں پر میں جا کر پوچھتا رہتا ہوں
کیا وہ خوشبو مل سکتی ہے اب اس کی کیا قیمت ہے
اعتبار ساجد

 

[جاسمن]

عشق میں کیا نقصان نفع ہے ہم کو کیا سمجھاتے ہو
ہم نے ساری عمر ہی یارو دل کا کاروبار کیا
جانثار اختر

 

[سید عاطف علی]

میری تنخواہ کیجے ماہ بہ ماہ
تا نہ مجھ کو ہوزندگی دشوار
مرزا غالب ۔

 

[گُلِ یاسمیں]

کس ضرورت کو دباؤں کسے پورا کر لوں
اپنی تنخواہ کئی بار گِنی ہے میں نے

 

[گُلِ یاسمیں]

ایک تاریخ مقرر پہ تو ہر ماہ ملے
جیسے دفتر میں کسی شخص کو تنخواہ ملے
رنگ اکھڑ جائے تو ظاہر ہو پلستر کی نمی
قہقہہ کھود کے دیکھو تو تمہیں آہ ملے

 

[جاسمن]

دکانِ دل اسی امید پر کھلی رکھی
مزاج داں کوئی گاہک کبھی تو آئے گا
اعتبار ساجد

 

[جاسمن]

ہم دل کو لیے ہر دیس پھرے اس جنس کے گاہک مل نہ سکے
اے بنجارو ہم لوگ چلے ہم کو تو خسارا ہوتا ہے

دفتر سے اٹھے کیفے میں گئے کچھ شعر کہے کچھ کافی پی
پوچھو جو معاش کا انشاؔ جی یوں اپنا گزارا ہوتا ہے

ابنِ انشاء

 

[جاسمن]

جو بھی مانگو ادھار دوں گا میں
اس گلی میں دکان کر لی ہے
جون ایلیا