محفل متراں دی

[فاروق احمد بھٹی]

اپنے بھرا نوں کیویں نا یاد رکھاں گے

تؤاڈا وڈا پن اے جی نوازش۔ مولا خوش رکھے۔

 

[فاروق احمد بھٹی]

ستایا ناس کر دتا جے لڑی دا!

تلمیذ پائی مقدس جے کدے پنجابی سکھنا چاہندی اے تے ایہدے وچ ہرج تے کوئی نئیں میرے خیا ل چ

 

[عبدالقیوم چوہدری]

ثواباں دی بھرویں فصل وی تے تسیں ای وڈھدے او ، سرکار۔
رب تعالےٰ تہاڈیاں جزاواں وچ ہور وادھاکرے۔ آمین!

آمین۔
ہوورے کسی کتاب چ پڑھیا ہیا کہ کسی کولوں سنیا ہیا۔۔کہ کوئی نمازی پرہیزی بندہ رب دے حضور پیش ہوندا اے تے حکم ہوندا اے کہ اینوں جنت وچ کسے نیویں درجے وچ جگہ دے دیو۔ اے گل سُنڑ کے تے بندہ بول پیندا اے کہ باری تعالیٰ میں تے سٹھ سال نمازاں پڑھیاں نیں تے تیری عبادت وچ کوئی کوتاہی نئی کیتی تے مینوں نیواں درجہ ملدا پیا اے۔ رب تعالیٰ فرماون دے کہ او میریا بندیا ۔۔۔جہیڑی تینوں میں اک اکھ دتی اے۔۔ تیریاں سٹھ سال دیاں عبادتاں صرف اس اک اکھ دی نعمت دا ورتاواں وی نئی ہو سکدیاں۔۔ حکم ہووے دا کہ اینوں دوزخ چ سٹ دیو۔۔ بندہ شرمسار ہو کے باری تعالیٰ کولوں معافی مانگن لگ پپئے دا تے رحمت خداوندی جوش چ آجاوے دی اور اپنڑے بندے نوں جنت چ اُچا درجہ دےدیوے دی۔ سبحان اللہ

رب سچا ای جانڑے ساڈے نال کی گزرے گی۔ اپنڑے ولوں تے بس کوشش ای کیتی جا سکدی اے تے او کردے پئے آں۔
جے میں تکاں عملاں ولے تے کُج نئی میرے پلے
جے میں تکاں تیری رحمت ولے تے بلے بلے بلے

 

[حامد ڈرائیور]

و

محفل وچ آن والے پنجابیاں دے لئی ایس لڑی نوں شروع کیتا اے کہ آنڈ گوانڈ دیاں اردو لڑیاں وچ پنجابی بول چال دے بارے اُلامے آن لگ پے نیں۔ جہیڑے کہ کسے حد تک صحیح وی نیں۔ نالے پنجابی فورم دا اُجاڑ پن پنجابیاں دے ہوندیاں ہویاں کج جچدا وی نئیں۔ تے میری تمام سجناں بیلیاں، پہناں بھراوں اگے بنتی آ کہ پنجابی وچ گل بات لئی ایس لڑی نوں ورتیا جاوے۔ تے جہیڑے میرے بہناں بھرا پنجابی نئیں جاندے اوہ وی کھلے دل نال ایس لڑی وچ گپ شپ وچ حصہ لے سکدے نیں۔ کسے دے آن جان تے کوئی پابندی نئیں۔ پنجابی دی لڑی ہووے تے پنجابی شاعری نہ ہووے اے کیویں ہو سکدا اے تے لو فیر کوٹ مٹھن دے پیرے دا سوہنا تے ودھیا کلام۔۔۔

کوئی بن گیا رونق پکھیاں دی
کوئی چھڈ کے شیش محل چلیا
کوئی پلیا ناز تے نخریاں وچ
کوئی ریت گرم تے تھل چلیا
کوئی بُھل گیا مقصد آون دا
کوئی کر کے مقصد حل چلیا
ایتھے ہر کوئی فرید مسافر اے
کوئی اج چلیا کوئی کل چلیا
​

محفل تے اسی لا دتی ہن متراں دا کم آ ایہنوں سجانا۔۔حقے پانی دا بندوبست وی ہےجے۔ تے آ جاؤ فیر

محترم محمد یعقوب آسی صاحب عبدالقیوم چوہدری تلمیذ اوشو غدیر زھرا نیرنگ خیال محمد اظہر نذیر دوست شمشاد لئیق احمد محمد احمد کامران چوہدری ادب دوست @[/QUOTEاسلام علیکُم!
بھائی جی بہت ودیاہ کوشش اے تواڈی اے۔بہت خوشی ہوئی ویکھ کہ۔
الله پاک سب دوستاں دی خفاظت فرمائے۔آمین

 

[فاروق احمد بھٹی]

دُوروں دُوروں نہ لے چسکے
آ جا کر لئیے پیار او دھسکے

اج کوئی نویں فٹیک اے پؤنی
تائیوں ایدے لاندا ایں مسکے

ساڈے لاگے بتھیری تھاں
غیراں وچ کیوں بیٹھاں پھس کے

میرے ول توں فیر ای آویں
پہلے اوہدروں ہویا نس کے

شاماں نوں اج دیر ہو جانی
گھر دیاں نوں توں آویں دس کے

سرمہ وی بڑا کھچ کے پایا
سَک وی اج تے ملیا کس کے

دل تیرے وچ جو مرضی اے
گوکے دے نال بولیں ہس کے

از مشاق احمد گوگا

 

[فاروق احمد بھٹی]

السلام علیکُم!
بھائی جی بہت ودیاہ کوشش اے تواڈی اے۔بہت خوشی ہوئی ویکھ کہ۔
الله پاک سب دوستاں دی خفاظت فرمائے۔آمین

وعلیکم السلام
پائی حامد داد دین لئی شکریہ تے توانوں اردو محفل تے اردو محفل دے پنجابی زمرے دی لڑی محفل متراں دی وچ جی آیاں نو ں کہنے آں۔
تواڈے لئی صلاح اے کہ تسی تعارف آلے زمرے دے وچ اپنا تعارف وی پیش کر دیو تا کہ توانوں محفل وچ آفیشلی طور تے وی خوش آمدید کہیا جاوے۔ مولا پاک توانوں خوش رکھے۔ آمین

 

[حامد ڈرائیور]

فاروق پائی میں تعارف کرا دتا اے فورم تے۔مینوں اس فورم تے اصل پنجابی پڑھن دا اتفاق ہویا۔اولیاء دے کلام بہت ودیاہ رونق لائی اے۔میں آپ پڑھیا لکھیا تے نئی آں پر پنجابی تے اپنڑی ماں بولی ہوئی تے اس واسطے میں چاہنا کم از کم پنجابی تے سئی جی سکھ لواں تساں پراواں دی صحبت توں۔

 

[فاروق احمد بھٹی]

فاروق پائی میں تعارف کرا دتا اے فورم تے۔مینوں اس فورم تے اصل پنجابی پڑھن دا اتفاق ہویا۔اولیاء دے کلام بہت ودیاہ رونق لائی اے۔میں آپ پڑھیا لکھیا تے نئی آں پر پنجابی تے اپنڑی ماں بولی ہوئی تے اس واسطے میں چاہنا کم از کم پنجابی تے سئی جی سکھ لواں تساں پراواں دی صحبت توں۔

حامد پائی تواڈا اپنا پن اے ۔ فورم تے تواڈا تعارف پڑھ کے توانوں اسی خوش آمدید وی کہہ دتا ۔ تے باقی رہئ گل پنجابی دی تے اسی وی پنجابی سکول، کالج چ تے کوئی نئیں پڑھی۔ بس شوق رکھی دا تھوڑا بوہت پنجابی دا۔ ایس لئی رونق لا لئی۔ تے تسی آؤ ست بسم اللہ رل مل کے بولاں گے وی تے سکھاں گے وی۔ اور شاعری وی نال نال چلدی رئے گی۔

 

[فاروق احمد بھٹی]

باغ بہاراں، تے گلزاراں، بن یاراں کس کاری؟
یار ملے، دکھ جان ہزاراں، شکر کراں لکھ واری

 

[سید شہزاد ناصر]

ماشاءاللہ چنگی رونق لائی اے
جیوندے رہو

 

[arifkarim]

تے فیر سارے پنجابی پھڑے گئے؟

 

[فاروق احمد بھٹی]

ماشاءاللہ چنگی رونق لائی اے
جیوندے رہو

میں کیا شہزاد پائی جی آیاں نوں توڈے اون نال رونق ہور ودھ گئی۔ جگ جگ جیوندے رہو تسی وی

 

[فاروق احمد بھٹی]

تے فیر سارے پنجابی پھڑے گئے؟

او کیویں

 

[سید شہزاد ناصر]

تیری راہواں وچ اَپڑی میں دل ہار وے
تنگی مینوں عشق دی چنگا مرنا اک وار وے

خوشیاں دے پل وچ جیون دا نئیں اعتبار وے
اَ جا بہہ جا ماہی حیاتی دا کر لے دیدار وے

پھلاں دھرتی سجائی سجدہ نہ ہووے بار وے
ٹکراں جے ہون تینوں دِلاں اُتے بھار وے

عاشق کھڑے بوہے تے ہتھ لے کے ہار وے
جانجی لے کے ٹُرے لاشے بے مہار وے

سکھاں دے پل وچ سودےنئیں اُدھار وے
غماں دا سُوا جوڑا پایا حیاتی سدا بہار وے

ڈھولاں تے سہیلیاں گاون اُجڑیا کیوں دیار وے
شہنائیاں جنازے اُٹھدے وچ دھمالاں لاڑے یار وے

بابل دے آنگن کھیڈاں خوشیاں غماں انتظار وے
رُس جاندی سی تے لگدا کھڈونیاں دا بازار وے

عشقاں مینوں چڑھ گئیاں جوانی وچ منجدھار وے
اللہ اللہ پڑھ دی ،بچ دی نہ میں عشق بہار وے

مائیں ہتھ جوڑے دل سانبھی ظالم سنسار وے
عشق محمود رب دا ، لاشہ رکھ لے بیکار وے​

 

[فاروق احمد بھٹی]

بابل دے آنگن کھیڈاں خوشیاں غماں انتظار وے
رُس جاندی سی تے لگدا کھڈونیاں دا بازار وے

میں کیا کی کہنے جناب مزہ آ گیا بابل پنجابی دا سوہنا تے پیار بھریا لفظ

 

[سید شہزاد ناصر]

اَگ وی ہمتوں بُہتی دِتّی، فیر وی بھانڈے پِلّے رئے
بھانبھڑ جئیّاں دُھپّاں وِچ وی میرے لیڑے گِلّے رئے

دوش دئیو نہ جھکڑاں اُتّے سِر توں اُڈّے تنبواں دا
کِلّے ٹھیک نئیں ٹھوکے، خورے ساتھوں رَسّے ڈِھلّے رئے

اِک دیہاڑے بَدّل وسیا، جشن منایا چوہدریاں
جُھگیاں دے فیر کئی دیہاڑے بالن، چُلّھے سِلّے رئے

میں وی دِھی سی ڈولے پانی، سُوہا جوڑا لین گئیا
ویکھ کے میری حالت وَلّے، ہسدے گوٹے تِلّے رئے

ایدھر گھبرو لاشاں ڈِگیاں، سینے پاٹن ماواں دے
اودھر ٹھیک نشانے بدلے لگدے تکمے بِلّے رئے

بابا نجمی​

 

[عبدالقیوم چوہدری]

بسمہ اللہ کراں اج تے ساڈے ویہڑے سید بادشاہ آئے نیں۔۔
شاہ جی ۔۔ جی آیاں نوں

 

[سید شہزاد ناصر]

بسمہ اللہ کراں اج تے ساڈے ویہڑے سید بادشاہ آئے نیں۔۔
شاہ جی ۔۔ جی آیاں نوں

آداب عرض اے تہاڈی محبت اے عبدالقیوم چوہدری صاحب

 

[عبدالقیوم چوہدری]

تے فیر سارے پنجابی پھڑے گئے؟

اے ادھا پنجابی وی آیا جے۔۔۔
آ جا منڈیا۔۔کوئی نوا کٹا کھولیے

 

[سید شہزاد ناصر]

سرمایہ دار دی بیوی؛

میرے نالوں وال وی تیرے لَمّے نیں
میرے نالوں رنگ وی تیرا چِٹّا اے
میرے نالوں اَکھ وی تیری چنگی اے
میرے نالوں نَک وی تیرا تِکھّا اے
پر مُٹیارے
دَس نی مینُوں، سِر تے پاٹی چَدّر کیوں؟
ریشم وَرگے جُثّے اُتّے کَھدّر کیوں؟
تیرے سِر تے جُوڑا کیوں نئیں؟
ہتّھیں رنگلا چُوڑا کیوں نئیں؟
کوکا کِتّھے تیرے نَک دا؟
بُلّاں اُتّے رنگ نئیں سَک دا
سِر توں لے کے پیراں تیکر
اِک مکمل تُوں تصویر
سَسّی، سوہنی، لگّیں ہِیر
حُلیہ مینُوں دَسّے تیرا
والی وارث کوئی نئیں تیرا؟

مزدور دی بیوی؛

اینج نہ کہو نی، خیری صَلّا
جُگ جُگ جِیوے میرا مَلّا
ایس دھرتی دا نُور نی اَڑیے
اوہدا ناں مزدور نی اَڑیے
جس دی میں آں حُور نی اَڑیے
اُس نُوں ایویں چنگی لگّاں
اُس نُوں ایویں چنگی لگّاں

بابا نجمی
​