طارق شاہ
محفلین
غزلِ
فراق گورکھپوری
اُداسی، بے دِلی، آشفتہ حالی میں کمی کب تھی
ہماری زندگی! یارو ہماری زندگی کب تھی
علائق سے ہُوں بیگانہ ولیکن اے دلِ غمگِیں
تجھے کچھ یاد تو ہوگا، کسی سے دوستی کب تھی
حیاتِ چند روزہ بھی، حیاتِ جاوِداں نِکلی !
جو کام آئی جہاں کے، وہ متاعِ عارضی کب تھی
یہ دُنیا، کوئی پلٹا لینے ہی والی ہے اب شاید
حیاتِ بے سُکوں کے سر میں یہ شورِیدگی کب تھی
مِرے نغموں نے اے دُنیائے غم! چمکا دیا تجھ کو
تِرے ظُلمت کدے میں زندگی کی روشنی کب تھی
فِراق اب اِتفاقاتِ زمانہ کو بھی کیا کہیے !
محبّت کرنے والوں سے، کسی کو دشمنی کب تھی
فرق گورکھپوری
(رگھوپتی سہائے )