نظر لکھنوی غزل: یہ کون مجھ کو صلِّ علیٰ یاد آ گیا ٭ نظرؔ لکھنوی

[محمد تابش صدیقی]

یہ کون مجھ کو صلِّ علیٰ یاد آ گیا
یکتائیوں کے ساتھ خدا یاد آ گیا

غربت میں جب وطن کا مزا یاد آ گیا
لوگوں کا مجھ کو بختِ رسا یاد آ گیا

دل اپنا اس کا تیرِ جفا یاد آ گیا
بیٹھے بٹھائے ہائے یہ کیا یاد آ گیا

اس رات مجھ کو نیند نہ آئی تمام رات
جس رات خوابِ زلفِ دوتا یاد آ گیا

اس دورِ اضطراب میں سب کچھ غلط مگر
اتنا ہے سچ کہ سب کو خدا یاد آ گیا

بے اختیار آنکھ سے آنسو نکل پڑے
ماضی کا حال تا بہ کجا یاد آ گیا

رکھتا نظرؔ کہیں کا نہ مجھ کو جنونِ شوق
لیکن ثباتِ اہلِ وفا یاد آ گیا
٭٭٭
محمد عبد الحمید صدیقی نظرؔ لکھنوی​