مصحفی شیخ غلام ہمدانی :::::: ہم تو سمجھے تھے کہ ناسورِ کُہن دُور ہُوئے::::: Shaikh Ghulam Hamdani Mushafi

[طارق شاہ]

غزل
غلام ہمدانی مُصحفیؔ امروہوی

ہم تو سمجھے تھے کہ ناسورِ کُہن دُور ہُوئے
تازہ اِس فصل میں زخموں کے پِھر انگُور ہُوئے

سَدِّ رہ اِتنا ہُوا ضُعف، کہ ہم آخرکار!
آنے جانے سے بھی اُس کُوچے کے معذُور ہُوئے

رشک ہے حالِ زُلیخا پہ، کہ ہم سے کم بخت
خواب میں بھی نہ کبھی وصل سے مسرُور ہُوئے

بیچ سے اُٹھ گئے ہم، آئنہ لے ہاتھ میں وے
آپھی ناظر ہُوئے اور آپ ہی منظُور ہُوئے

بس کہ سُنتا رہا مَیں نیش زنوں کے طعنے
پردۂ گوش مِرے خانۂ زنبُور ہُوئے

اشک تھم جاویں جو آنکھوں سے مِری، تو بہ طعن
مُجھ سے کہتا ہے کہ، "چنگے تِرے ناسُور ہُوئے"

لگ کے جِس نخلِ چَمن کے مَیں گَلے سے رَویا
شاخ و برگ اُس کے پُر از خوشۂ انگور ہُوئے

بن گیا داؤں مِرا مُصحفیؔ اُس دَم کیسا
جِس گھڑی رات نشے میں وہ بہت چُور ہُوئے

غلام ہمدانی مُصحفیؔ​

 

[محمد خلیل الرحمٰن]

بیچ سے اُٹھ گئے ہم، آئنہ لے ہاتھ میں وے
آپھی ناظر ہُوئے اور آپ ہی منظُور ہُوئے

کیا اچھا ہے