شکیب بھائی کا انٹرویو

شکیب

محفلین
10) آپ کے گھر پر اردو ادب میں دلچسپی کس کس کو ہے؟ اپنے ہاتھ سے اردو کب لکھتے ہیں کیونکہ وہاں پر رائج زبان اور رسم الخط تو کچھ اور ہے؟
سبھی کو دلچسپی ہے، کیونکہ بچپن ہی سے گھر میں رسالے دیکھے ہیں اور سبھی شوق سے پڑھتے آئے ہیں۔ جیسے فہد اشرف نے بتایا، بچپن میں ماہنامہ امنگ، ہلال ہر گھر کی زینت ہوتے تھے۔ ماہنامہ نور البتہ لائبریری سے لے کر پڑھتے تھے کہ وہ مہنگی پڑتی تھی، لیکن اس کا معیار بہت زبردست تھا۔ ایک بار کوئی عمران سیریز کا بھی ناول اس میں شائع ہوا تھا جو شاید کسی اور نے لکھا تھا۔بعد میں ساتویں آٹھویں جماعت میں پہنچے تو ”نور“ کا معیار بھی اتنا خاص نہیں رہ گیا۔ اب کا پتہ نہیں۔
بڑوں کے لیے ماہنامہ پاکیزہ آنچل (پاکستان کے آنچل کا متبادل) اور ماہنامہ ھما(جاسوسی ڈائجسٹ کا متبادل) آتے تھے جو گھر پر اب تک پابندی سے آ رہے ہیں۔ تھوڑے اور بڑے ہوئے تو پہلے 'پاکیزہ آنچل' چوری چھپے پڑھا،پھر 'ھما' کی باری آئی۔ ابن صفی سے بھی واقفیت ھما کے ذریعے ہوئی، جس میں آخری ناول ابن صفی کا ہوتا تھا۔
کلاس میں لیکچر نوٹ کرتے وقت کام کی باتیں جلدی جلدی میں اردو میں ہی لکھتے تھے۔ انجینئرنگ میں ڈی بی ایم ایس ایک سبجیکٹ ہوتا تھا، اس میں ہم بہت ہوشیار تھے اور استانی کے پسندیدہ۔ اس کی نوٹ بک میں لیکچر کے دوران کانسپچول نکات کو اردو ہی میں نوٹ کرتے تھے کہ جلدی ہو جاتا ہے۔ اس قدر اردو کی بھرمار تھی کہ دوست اگر ہمارے نوٹس مامنگتے تو بلا جھجک وہ کاپی پکڑا دیتے۔ وہ الٹ پلٹ کر خود ہی واپس کر دیتا۔
ہفتے پندرہ دن میں جو کرانے کی لسٹ بنتی ہے وہ اردو ہی میں ہوتی ہے۔گھر میں موجود چھوٹے سے بلیک بورڈ پر ہر کوئی(بشمول والد صاحب) کچھ نہ کچھ لکھتا رہتا ہے، یاد دہانی کے نوٹس مثلاً ”کل یاد سے رپورٹ لانے جانا ہے“ وغیرہ۔ یوں سمجھیں کہ ہمیشہ اردو لکھتے ہیں۔ دیگر زبانوں کی تبھی ضرورت پڑتی ہے جب اگلا اردو سے واقف نہ ہو۔
رائج زبانیں ہندی اور مراٹھی ہیں جو دیوناگری رسم الخط میں لکھی جاتی ہیں، جو حسبِ ضرورت استعمال ہوتی ہیں۔ ذاتی طور پر میری کوشش رہی ہے کہ ہر جگہ خود کو اردو کے ساتھ متعارف کراؤں، چنانچہ انجینئرنگ میں ساتھی طلباء و اساتذہ (نوٹ بکس پر اردو کے استعمال کی وجہ سے)، amazon میں کلیگز اور مینیجرز(زیر مطالعہ کتب اور شاعری کی وجہ سے) اور APS میں طلباء ، ہر جگہ اردو والے کے طور پر جانا گیا اور اکثر نےاردو سیکھنے کی خواہش کا اظہار کیا۔
رائج رسم الخط سے کوئی فرق نہیں پڑتا۔
 
آخری تدوین:

شکیب

محفلین
11) عروض سے واقفیت کب اور کیسے ہوئی؟ شاعری اور نثر کتنے سال سے لکھ رہے ہیں۔۔۔
قدرت کا عطا کردہ یا وہبی عروض انجن بچپن ہی سے فٹ ہے۔ باقاعدہ عروض جماعت دہم سے اور تقطیع 11 کی اردو کتاب میں 'تقطیع' کے سوالوں سے متعارف ہوا۔ بعد میں علم میں اضافے کے لیےکچھ کتب پڑھیں۔ ویسےعروضی شعراء سےسخت بیزاری ہے جو فقط 0 ، 1 یا ہجائے بلند اور کوتاہ ناپتے رہتے ہیں۔ جلے کٹے، سڑے ہوئے، بھنے ہوئے عروضیے۔
کب سے:
جماعت ششم میں تھا تو شاعری کی پہلی کوشش پرسنل ڈائری کی شکل میں کی تھی ، جس میں کلاس کے ماحول، دوستوں کا ذکر وغیرہ تھا، اس میں الف، و، ی کے اسقاط اور بے تحاشا تلفظ کی غلطیوں کو اگر نظر انداز کیا جائے تو بحر ہندی استعمال کی گئی تھی۔ اس کو جس مخصوص طرز پر ہم گاتے تھے، اس میں ساری غلطیوں سے قطع نظر بحر کے مطابق ہی گاتے تھے بھلے ہی تلفظ کا تیاپانچہ ہو جائے۔
جماعت ششم ہی میں دو کہانیاں لکھی تھیں چھوٹی چھوٹی، چالاک خرگوش اور ایک شاید لومڑی کی۔ گھر پر ایک ایک کو پڑھایا۔بعد میں اسے 'امنگ' میں چھپنے کے لیے پوسٹ بھی کیا، پتہ نہیں چھپی یا نہیں۔ تمام چیزوں بطور یادگار کسی فائل میں لکھا ہوا بھی ہے، اور ان کی تصحیح بھی نہیں کی کہ گزرے دنوں کی یاد رہے۔

جماعت ششم عمر 11 سال میں پہلی (باقاعدہ) شاعری جس کے بعد تخلص کی فکر ہونے لگی تھی:
دن میں تو تم شریف بنتے ہو
رات میں کالا دھندا کرتے ہو
دیتے ہو سب کو دعوتیں دیں کی
کیا کبھی خود عمل بھی کرتے ہو؟
زندگی کی قدر نہیں معلوم
اور موت آ گئی تو ڈرتے ہو
نامۂ عمل میں نہیں نیکی
اور سخاوت کا چرچا کرتے ہو
11) ۔۔۔کبھی کچھ شائع کروایا؟
شائع کرانے کے معاملے میں لا پرواہ واقع ہوا ہوں، جبکہ احباب کتنی ہی بار کہہ چکے ہیں۔ آرٹیکلز سے ہٹ کر ایک ناول کی شروعات کی ہے، جو ایک مقامی رسالے میں قسط وار شائع ہو رہا ہے۔ چونکہ رسالہ چھوٹا ہے، اس لیے بہت مختصر اقساط دینی ہوتی ہیں۔ کل اسی کی 5ویں قسط لکھنے میں مصروف تھا اس لیے کوئی جواب یہاں نہ دے سکا۔
(پچھلے دنوں غزلیات اقبال کی الف بائی ترتیب کو اشاعت کے لیے بھیجنے کا تقاضہ ہوا تھا ، لیکن۔۔۔ ہم تو ہم ہیں۔)
 

شکیب

محفلین
12) آپ اردو محفل پر اپنی شاعری بہت کم شریک کرتے ہیں، اس کی کیا وجہ ہے؟ یہ بھی بتائیے کہ اب تک لگ بھگ کتنی غزلیں/نظمیں لکھ چکے ہیں؟
اول تو مابدولت زیادہ لکھتے نہیں، دوم یہ کہ ہر لکھے ہوئے کو قابل اشاعت نہیں گردانتے، سوم یہ کہ لاپرواہ ہیں، دوسرے لفظوں میں کوچۂ آلکساں کے ممبر ہیں، تو جو اشعار یا خیالات چلتے پھرتے ترتیب پاتے ہیں ان کو نوٹ کرنا بھول جاتے ہیں۔
تعداد نہ قطعی بتا سکتے ہیں نہ لگ بھگ۔
آخری بات کہ جب تک دل یکسو نہ ہواور لکھنے میں جذب کی کیفیت نہ بنے، کی فائدااا۔ مزہ نہیں آتا۔
 

شکیب

محفلین
13) آپ کا/کی پسندیدہ:
شاعر؟
اقبال، غالب
نثرنگار؟
محی الدین نواب، منظر امام
اداکار؟
عامر خان، مورگن فری مین
گلوکار؟
پتہ نہیں
سیاست دان؟
جو دوسرے کی زیادہ بے عزتی کرے
محفلین؟
الف عین
کتاب؟
جنت کے پتے، فینٹسی میں ہیری پوٹر سیریز
کھیل؟
فٹ بال، ان ڈور میں کیرم
فلم؟
سائنس فکشن میں دلچسپی ہے، اور موٹیویشنل...
ڈرامہ؟
غالب(رول نصیر الدین شاہ نے کیا ہے)، ذاتی دلچسپی کی بنا پر دیکھا تھا کالج میں...ویسے کوئی خاص دلچسپی نہیں۔ ایک دوست نے زبردستی کر کے پچھلے سال"مری ذات ذرۂ بے نشاں" پین ڈرائیو میں ڈال کر دیا ہے کہ ضرور دیکھنا۔اب تک پڑا ہے۔
قول؟
بلندیوں پہ پہنچنا کوئی کمال نہیں
بلندیوں پہ ٹھہرنا کمال ہوتا ہے

نعت؟
ہر اچھی نعت پسند ہے، خصوصاً جب اس کے الفاظ و تراکیب صنائع بدائع سےمزین ہوں۔ فی الحال ایک یاد آ رہی ہے۔"جبرئیلِ امیں کے پروں سے پرے ہے سجا مسندِ ارجمند آپ کا"
ایک لڑی بنائی جا سکتی ہے اس پر تو، پسندیدہ نعت کی۔ اچھا ذخیرہ ہوگا۔

گانا؟
دلچسپی نہیں
 

شکیب

محفلین
14) دنیا میں جتنا تخلیقی کام ہو رہا ہے اس میں سے کون سا کام آپ کو مسحور کر دیتا ہے؟
غیر مسلم بھائیوں میں دعوتِ اسلام۔

دنیاوی لحاظ سے: انٹر نیٹ پر موجودتقریبا ہر مسئلے کے لیے ٹیوٹوریلز۔ فورمز میں کسی بھی مقصد کے لیے رضا کارانہ طور پر کام کرنا۔
 

شکیب

محفلین
16) بر صغیر کی پارٹیشن کے ثمرات و نقصانات کے متعلق آپ کا کیا خیال ہے؟
نہیں ہونی چاہیے تھی۔ اثمہ اکبر من نفعہ۔ اب بھی یہاں اچھے اچھے شانت مزاج اشخاص کو اس بات پر بھڑکتے دیکھا ہے کہ ہمارے ہاں کی فلموں میں 'ان' کے فنکاروں کو کیوں شامل کیا جا رہا ہے، یا چونکہ ہیروئن پاکستانی ہے اس لیے ہم فلم نہیں دیکھیں گے وعلی ھذا القیاس۔

اب ہو گیا ہے تو محبتیں بڑھیں اور دوریاں ختم ہوں بس!

کاش اتنا پیار دونوں طرف کی فضا میں ہو
دلی کا دل دکھے تو کراچی تڑپ اٹھے

ویسے بھی عوام دونوں طرف کی محبت والی ہی ہے۔ کئی فورمز اور چینلز دلوں کو جوڑنے کا کام کر رہے ہیں۔ دعا ہے سب اچھا ہو جائے۔
 

شکیب

محفلین
20) کیا آپ کی اپنے ہم جماعت اور ہم عمر لوگوں سے ذہنی ہم آہنگی آسانی سے ہو جاتی ہے یا اس معاملے میں مشکل کا سامنا ہوتا ہے؟
آسانی سے۔محبت بانٹنے پر یقین رکھتا ہوں۔سلام دعا سب سے ہوتی ہے۔ جو ٹائپ کے نہیں لگتے انہیں مختلف ہتھکنڈوں سے بور کر دیتا ہوں۔ جن سے کیمسٹری میچ ہو ان کے لیےتو(کلیشے ڈائلاگز)
 
چند سوالات ۔۔۔ :)
مجید امجد کی زندگی بہاروں کے سوگ میں کٹی اور آپ کی ۔۔۔ ؟
غالب کے خطوط سے کبھی خود خط لکھنے کی تحریک ملی ۔۔۔۔ ؟
کس نثر نگار کے اسلوب سے متاثر ہیں ؟
اگر اصنافِ ادب میں سے کسی کا نمائندہ بننے کا موقع ملے تو کس کا انتخاب کریں گے ؟
غزل میں ترقی پسندیت کے قائل ہیں یا رومان کے ؟
آپ کی غزل کا دیوان کب تک متوقع ہے ؟
 

شکیب

محفلین
بس پھر آپ تو گئے کام سے! میں آپ کے چلنے سے پہلے بتانا بھول گئی تھی کہ وہاں تو سگنل ہی نہیں آتے! :p
وہ تو سوال ہی سے ظاہر ہے، اور محفل پر غالباً ہر ایک بندہ کتب ہی لے جانا چاہے گا... تو جواب بھی وہی! بسredundancy سے بچ رہا تھا ...
کتابوں سے اس حد تک عشق ہے کہ جنت کی نعمتوں میں ایک عدد لا متناہی لائبریری کو بھی شامل کرتا ہوں... :)
 
کتابوں سے اس حد تک عشق ہے کہ جنت کی نعمتوں میں ایک عدد لا متناہی لائبریری کو بھی شامل کرتا ہوں... :)
میں تو یہ تصور کرتا ہوں کہ جنت میں تخت پر گاؤ تکیہ سے ٹیک لگائے جیسے ہی یہ خیال ذہن میں آئے گا کہ دیوانِ غالب پڑھی جائے، تو آنکھوں کے سامنے دیوانِ غالب آ جائے گی، اور پڑھتا جاؤں گا۔ :)
 
Top