عدیم ہاشمی شبِ ہجراں تھی جو بسر نہ ہوئی

[شیزان]

شبِ ہجراں تھی جو بسَر نہ ہوئی​

ورنہ کِس رات کی سحر نہ ہوئی​

​

ایسا کیا جرم ہو گیا ہم سے​

کیوں ملاقات عُمر بھر نہ ہوئی​

​

اشک پلکوں پہ مُستقل چمکے​

کبھی ٹہنی یہ بے ثمر نہ ہوئی​

​

تیری قُربت کی روشنی کی قسم​

صُبح آئی مگر سحر نہ ہوئی​

​

ہم نے کیا کیا نہ کر کے دیکھ لیا​

کوئی تدبیر کار گر نہ ہوئی​

​

کتنے سُورج نِکل کے ڈُوب گئے​

شامِ ہجراں ! تری سحر نہ ہوئی​

​

اُن سے محفل رہی ہے روز و شب​

دوستی اُن سے عُمر بھر نہ ہوئی​

​

یہ رہِ روزگار بھی کیا ہے​

ایسے بچھڑے کہ پھر خبر نہ ہوئی​

​

اِس قدر دُھوپ تھی جُدائی کی​

یاد بھی سایۂ شجر نہ ہوئی​

​

شبِ ہجراں ہی کٹ سکی نہ عدیم​

ورنہ کِس رات کی سحر نہ ہوئی​

​

نذرِ داغ​

​

عدیم ہاشمی​

 

[کاشف اکرم وارثی]

واہ بہت خوب۔۔ عمدہ انتخاب

 

[شیزان]

واہ بہت خوب۔۔ عمدہ انتخاب

پذیرائی پر مشکور ہوں کاشف صاحب