قمر جلالوی شاید کچھ آگے آ گئے کوئے بتاں سے ہم ۔ قمر جلالوی

[فرخ منظور]

شاید کچھ آگے آ گئے کوئے بتاں سے ہم
اب یاد کر رہے ہیں کہ بھٹکے کہاں سے ہم
.
نکلے تھے جانے کیسی گھڑی گلستاں سے ہم
ایسے چھٹے کہ پھر نہ ملے آشیاں سے ہم
.
رودادِ حسن و عشق سنائیں کہاں سے ہم
شرمائیں گے حضور کہیں گے جہاں سے ہم
.
مجبور ہو کے ہاتھ میں ساغر اٹھا لیا
جب تنگ آ گئے ستمِ آسماں سے ہم
.
تھی اتفاقِ وقت ملاقات راہ کی
جانے وہ آ رہے تھے کہاں سے، کہاں سے ہم
.
کچھ اس قدر ہے ان دنوں پابندیِ قفس
ذکرِ چمن بھی کر نہیں سکتے زباں سے ہم
.
بس اس قدر ہیں ترکِ محبت کے واقعات
کچھ بدگماں سے وہ ہوئے کچھ بدگماں سے ہم
.
اچھا تو اب فسانہ سہی حسن و عشق کا
اول سے تم سناؤ کہیں درمیاں سے ہم
.
رودادِ حسن و عشق زمانہ غلط کہے
نام اپنا کاٹ دیں جو تری داستاں سے ہم
.
افسانۂ الم پہ وہ یہ کہہ کے سو گئے
اب تنگ آئے ہیں تری داستاں سے ہم
.
عرضِ کرم بھی جرم ہے اس کی خبر نہ تھی
سرکار کچھ بھی اب نہ کہیں گے زباں سے ہم
.
صیاد کچھ دن اور ہماری خطا معاف
واقف نہیں ہوئے ابھی تیری زباں سے ہم
.
دیر و حرم بھی ہوں گے مگر ہم کو کیا خبر
اٹھ کر کہاں گئے ہیں ترے آستاں سے ہم
.
بدلیں طرح طرح سے زمانے نے سرخیاں
لیکن جدا ہوئے نہ تری داستاں سے ہم
.
اب سوچتے ہیں مفت میں مٹی ہوئی خراب
آئے تھے کیوں زمیں پہ قمر آسماں سے ہم
.
قمر جلالوی​

 

[سید عاطف علی]

بدلیں طرح طرح سے زمانے نے سرخیاں
لیکن جدا ہوئے نہ تری داستاں سے ہم
کیا کمال ہے ۔ وااہ
شاد رہیں ۔فرخ بھائی ۔

 

[محمد خلیل الرحمٰن]

مندرجہ ذیل مصرع کے خالق کون ہیں؟

لو آگئے وہیں پہ چلے تھے جہاں سے ہم​

 

[سین خے]

بس اس قدر ہیں ترکِ محبت کے واقعات
کچھ بدگماں سے وہ ہوئے کچھ بدگماں سے ہم

.
افسانۂ الم پہ وہ یہ کہہ کے سو گئے
اب تنگ آئے ہیں تری داستاں سے ہم

.
عرضِ کرم بھی جرم ہے اس کی خبر نہ تھی
سرکار کچھ بھی اب نہ کہیں گے زباں سے ہم

.
صیاد کچھ دن اور ہماری خطا معاف
واقف نہیں ہوئے ابھی تیری زباں سے ہم

.
اب سوچتے ہیں مفت میں مٹی ہوئی خراب
آئے تھے کیوں زمیں پہ قمر آسماں سے ہم
​

واہ! لاجواب شراکت کے لئے شکریہ