سیماب اکبر آبادی سیماب اکبر آبادی --- ہَمَیں تو یوں بھی نہ جلوے تِرے نظرآئے

غزل
سیماب اکبر آبادی

ہَمَیں تو یوں بھی نہ جلوے تِرے نظرآئے
نہ تھا حجاب، توآنکھوں میں اشک بھرآئے

ذرا سی دیر میں دُنیا کی سیر کرآئے
کہ لے کے تیری خبر تیرے بے خبرآئے

اسِیر ہونے کے آثار پھر نظرآئے
قفس سے چھوٹ کر آئے تو بال وپرآئے

تجھے ملال ہے ناکامئ نظر کا فضول
نظر میں جو نہ سمائے وہ کیا نظرآئے

وہ جانتا ہے، میں پابندِ رسْم وراہ نہیں
فضول ٹھوکریں کھانے کو راہبرآئے

تمام عمْر یہ ناکامیاں قیامت ہیں
کبھی کبھی تو الٰہی، اُمید بر آئے

جسے تصرفِ تیرِ نظر نہ ہو معلوم
وہ تیرے سامنے لے کے دل و جگرآئے

شریکِ قسمتِ تنہائیِ فراق ہوں میں
اجل بھی کیوں تِرے آنے سے پیشترآئے

بلائے جاں ہے وہ نصفِ شباب کا عالم
کسی حَسِین کی جب زلف تا کمر آئے

نگاہِ جلوہ میں شاید سما گئے سیماب
کہ منتظِر گئے لوٹے تو منتظَر آئے

علامہ سیماب اکبر آبادی​

 

واہ
شریکِ قسمتِ تنہائیِ فراق ہوں میں
اجل بھی کیوں تِرے آنے سے پیشترآئے

 

کیا بات ہے۔ بہت خوب انتخاب۔ شکریہ طارق صاحب!

 

تشکّر سید صاحب اظہار خیال پر، خوشی ہوئی جو انتخاب پسند آیا
بہت خوش رہیں

 

فرخ صاحب!
اظہارِ خیال اور پذیرائیِ انتخاب کے لئے ممنون ہوں
خوشی ہوئی جو منتخبہ غزل آپ کو پسند آئی
تشکّر
بہت خوش رہیں

 

تمام عمْر یہ ناکامیاں قیامت ہیں
کبھی کبھی تو الٰہی، اُمید بر آئے

شریکِ قسمتِ تنہائیِ فراق ہوں میں
اجل بھی کیوں تِرے آنے سے پیشترآئے

اتنی اچھی غزل شیئر کرنے کا شکریہ۔

 

محسن وقار صاحب !
انتخاب پر اظہار خیال، داد اور پذیرائی کے لئے ممنون ہوں
خوشی ہوئی جو علامہ کی، مری یہ پیش کردہ غزل آپ کو پسند آئی
بہت خوش رہیں