طارق شاہ
محفلین
اکبرالہٰ آبادی
زیرِ گیسُو رُوئے روشن جلوہ گر دیکھا کِئے
شانِ حق سے، ایک جا شام وسحر دیکھا کِئے
گُل کو خنداں، بُلبُلوں کو نوحہ گر دیکھا کِئے
باغِ عالم کی دو رنگی عمر بھر دیکھا کِئے
جُنْبشِ ابرو ہی کافی تھی، ہمارے قتل کو !
آپ تو، ناحق سُوئے تیغ وتبر دیکھا کِئے
صبْرکر بیٹھے تھے پہلے ہی سے ہم تو جانِ زار
عشق نے جو کچھ دِکھایا بے خطر دیکھا کِئے
دیکھئے اب کیا دِکھائے قسمتِ بد بعدِ مرگ !
رنج و اندوہ و الم تو عمر بھر دیکھا کِئے
خوابِ غفلت سے نہ چونْکے اہلِ عالم ہےغضب
گو بہت، نیرنگیِ شام و سحر دیکھا کِئے
حسرت و حرمان و اندوہ و غم و رنج و الم
جو دِکھایا آسماں نے عمر بھر دیکھا کِئے
وعدۂ شب پر گُمانِ صِدق سے، سوئے نہ ہم
راہ اُس پیماں شِکن کی رات بھر دیکھا کِئے
یاد میں رُخسارِ تابانِ صنم کی رات بھر !
دیدۂ حسرت سے ہم، سُوئے قمر دیکھا کِئے
اکبرالہٰ آبادی
× "حسرت و حرمان و اندوہ و غم و رنج و الم "
نمایاں مقتدین و متوسطین اردو شعرا، میں سے اکثریت مصرع میں دو تین ترکیبِ اضافت
سے تجاوز کرنے کو خلافِ محاورہ و روزمرہ گردانتے تھے ، کہ یہ حُسنِ بیان اور
روانی متاثر کرتی ہے
آخری تدوین:
