زباں پہ حرف ِ ملائم بھی، دل میں کینہ بھی

[محمد فائق]

زباں پہ حرف ِ ملائم بھی، دل میں کینہ بھی
عجیب شخص ہے، اچھا بھی ہے، کمینہ بھی
لہو تو خیر کہاں کا، یہ جاں نثار ترے
بہائیں گے نہ کبھی بوند بھر پسینہ بھی
وہاں گزار دیے زندگی کے اتنے برس
جہاں نہ مجھ کو ٹھہرنا تھا اک مہینہ بھی
جلا بروز ِ ازل جو بنام ِ رب ِ سخن
اُسی چراغ سے روشن ہے میرا سینہ بھی
درون ِ دل انہی متروک سلسلوں میں کہیں
چھپا ہُوا ہے تری یاد کا خزینہ بھی
تمہارا ذوقِ سخن ہے خیال تک محدود
ہمیں تو چاہیے اظہار میں قرینہ بھی
بس ایک پل کو جو دربان کی نظر چوکے
مری نگاہ میں وہ بام بھی ہے، زینہ بھی
تلاش ِ ہست میں معدوم ہو، کہ ممکن ہے
عدم کی تہہ سے برآمد ہو یہ دفینہ بھی

سوال یہ ہے کہاں سے نتھر کے آیا ہے
یہ ایک اشک ہی پانی بھی ہے، نگینہ بھی
ملی گی کونسی بستی میں دل زدوں کو پناہ
کہ اہل ِ درد سے خالی ہُوا مدینہ بھی
وہ خواہ ساحل ِ فرقت ہو یا جزیرہءِ وصل
کسی کنارے تو لگ جائے یہ سفینہ بھی
عرفان ستار صاحب