میر زباں رکھ غنچہ ساں اپنے دہن میں ۔ میر تقی میر

[فرخ منظور]

زباں رکھ غنچہ ساں اپنے دہن میں
بندھی مٹھی چلا جا اس چمن میں

نہ کھول اے یار! میرا گور میں منھ
کہ حسرت ہے مری جاگہ کفن میں

رکھا کر ہاتھ دل پر، آہ کرتے
نہیں رہتا چراغ ایسی پون میں

جلے دل کی مصیبت اپنی سن کر
لگی ہے آگ سارے تن بدن میں

نہ تجھ بن ہوش میں ہم آئے ساقی
مسافر ہی رہے اکثروطن میں

خردمندی ہوئی زنجیر، ورنہ
گزرتی خوب تھی دیوانہ پن میں

کہاں کے شمع و پروانے گئے مر
بہت آتش بجاں تھے اس چمن میں

کہاں عاجز سخن، قادر سخن ہوں
ہمیں ہے شبہ یاروں کے سخن میں

گدازِ عشق میں یہ بھی گیا میرؔ
یہی دھوکا سا ہے اب پیرہن میں

(میر تقی میرؔ)
​