دیے کی آنکھ - مقبول عامر

[وہاب اعجاز خان]

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

باہر سے بنجر ہوں لیکن اندر سے شاداب
شبنم جیسی سوچیں میری، پھولوں جیسے خواب

۔۔۔۔۔۔۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

رخِ حیات کو رنگ نشاط مل جائے
کبھی جو تو زرہِ التفات مل جائے

میں اس امید پہ صحرا میں آگے بڑھتا ہوں
کہ اگلے موڑ پہ شاید فرات مل جائے

یہ ٹوٹ پھوٹ ہے میرے وجود کا خاصہ
میں مرنہ جاوں جو مجھ کو ثبات مل جائے

میں اپنی ساری بہاریں نثار کردوں گا
دیارِ گل کو خزاں سے نجات مل جائے

میں اپنے حال پہ قانع رہوں خداوندا
جنہیں طلب ہے انہیں کائنات مل جائے

۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

زمبابوے

زمبابوے

ہے لوحِ وقت پہ کندہ وہ داستان کہ جب
مسافرانِ شبِ تار مشعلیں لے کر
سحر کی کھوج میں‌ لمبے سفر پہ نکلے تھے
مہیب رات تھی چاروں طرف اندھیرا تھا
ستمگروں نے ہراک راستے کو گھیرا تھا
کہیں پہ آگ کا دریا۔ کہیں پہ کوہِ الم
مگر جنوں تھا کہاں ہار ماننے والا
رواں دواں ہی رہا لے کے روشنی کا علم
سفر کھٹن تھا مگر آخرش تمام ہوا
زمانے والوں نے دیکھا کہ اہل صدق و صفا
ستم کے سارے مراحل عبور کرنے کے بعد
اس اہتمام سے پہنچے وفا کی منزل پر
کہ آفتاب افق کے جلو سے نکلا تھا
فضا میں چاروں طرف رنگ و نور بکھرا تھا
اک ایسا نور کہ یاروں کے مضمحل چہرے
ستارہ سحری کی طرح دمکنے لگے!
دلوں کے زخم گلوں کی طرح مہکنے لگے
۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

غزل

غزل

اب اس کے بعد ترا اور کیا ارادہ ہے
کہ میرا صبر ترے جبر سے زیادہ ہے

تو بوئے گل کی طرح اُڑ رہا ہے اور کوئی
تری تلاش میں برسوں سے پا پیادہ ہے

میں جنگ جیت کے تم کو معاف کردوں گا
تمہاری سوچ سے بڑھ کر یہ دل کشادہ ہے

غریب شہر سمجھتی ہے جس کویہ دنیا
وہ شخص خواب جزیروں کا شہزادہ ہے

میں‌ سرگراں تھا مگر اتنا مضطرب تو نہ تھا
رگوں میں‌ آگ رواں ہے کہ موجِ بادہ ہے

جدا نہیں مری رنگ زمین سے عامر
یہ اڑتی دھول مرے جسم کا لبادہ ہے

۔۔۔۔۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

خزاں کی رت میں‌ بھی نقشِ بہار باقی ہے
کہ ایک پھول سرِ شاخسار باقی ہے

ترے فریب کا جادو ابھی نہیں ٹوٹا
ابھی تو تجھ پہ مرا اعتبار باقی ہے

گھروں کو لوٹ گئے لوگ شام ڈھلتے ہی
بس ایک شخص سرِ رہگزار باقی ہے

ندی سے چاند نے سرگوشیوں میں پوچھ لیا
اب اور کتنی شبِ انتظار باقی ہے

جبینِ سنگ پہ دو نام کس نے لکھے ہیں
یہ کیسا نقش سرِ کوہسار باقی ہے

وہ قافلہ تو کبھی کا چلا گیا ہے مگر
نظر کے سامنے اب تک غبار باقی ہے

میں مر گیا ہوں وفا کے محاظ پر عامر
پسِ شکست بھی میرا وقار باقی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

جواز

۔۔۔۔۔۔۔۔۔

جواز

ملائکِ خیر و شر سے کہنا
کہ میری جتنی بھی نیکیاں ہیں
انہیں وہ دریا کی نذر کردیں
کہ میں نے جو بھی بھلائی کی ہے
کسی صلے یا جزا کی امید پر نہیں کی
مگر جہاں تک مری خطاوں کا ہے تعلق
میں ان سے منکر کبھی نہ ہوں گا
حساب کا دن جب آئے گا تو
میں ان کا اقرار خود کروں گا
کہ میرے پاس اپنی ہر خطا کا
جواز بھی ہے!
جواب بھی ہے!

۔۔۔۔۔۔۔۔۔۔۔۔۔۔۔۔۔۔۔

 

[وہاب اعجاز خان]

ملاح کا گیت

۔۔۔۔۔۔۔

ملاح کا گیت


مدھر سروں میں‌گیت سناو
دل کی بات زباں پر لاو
لہروں کا انداز اپناو

دریا فطرت میں جوگی ہے
دریا کے من میں موتی ہے
اس جوگی سے میل بڑھاو
لہروں کا انداز اپناو

پیار ہے دھرتی، پیار گگن ہے
پیار ہی مایہ، پیار ہی من ہے
پیار کا روشن رکھنا الاو
لہروں کاانداز اپناو

شاخ پہ پنچھی بول رہا ہے
کانوں میں رس گھول رہا ہے
دل یوں ڈولے جیسے ناو
لہروں کا انداز اپناو

لہروں میں ہلچل سی مچی ہے
پانی میں اک آگ لگی ہے
تم بھی من میں جوت جگاو
لہروں کا انداز اپناو

۔۔۔۔۔۔۔۔۔۔۔۔۔۔۔۔۔

 

[وہاب اعجاز خان]

غزل

غزل

اُسے بلاو کہ جس کے چہرے پہ چاند تارے سجے ہوئے ہیں
کہ اپنی دھرتی کے آسمان پر سیاہ بادل تنے ہوئے ہیں

یہ کس مسافر کے منتظر ہیں کہ میری بستی کےلوگ سارے
ہتھیلیوں پر چراغ لے کر روش روش پر کھڑے ہوئے ہیں

شجر بھی شاید پکار اٹھیں، حجر بھی شاید زبان کھولیں
مگر ہم اہلِ صفا کے ہونٹوں پہ جیسے تالے پڑے ہوئے ہیں

میں کس سے پوچھوں کہ میری بستی کو کون تاراج کر گیا ہے
تمام خلقت بریدہ سر ہے تمام خیمے جلے ہوئے ہیں


۔۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

ایک شعر

۔۔۔۔۔۔۔۔


زندگی دوڑ رہی ہے عامر
وقت کی دھول اڑتی جاتی ہے

۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

زندگی کا ماآل۔ تنہائی
حاصلِ ماہ و سال تنہائی

رات بھر میرے ہمرکاب رہے
چاند، صحرا، غزال، تنہائی

تیری اقلیم سے نکل جائے
کس کی اتنی مجال، تنہائی

زندگی پر محیط ہیں دونوں
موسمِ گل برشگال، تنہائی

میں بھی موجود ہوں کہ ناموجود
اے مری بے مثال تنہائی!

بخت والوں کو راس آتے ہیں
عشق، بادِ شمال، تنہائی
۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

جان ملٹن

جان ملٹن

وہ نابینا تھا لیکن دیدہ ور تھا
بلادِ علم تھا، بابِ ہنر تھا

اسے معلوم تھی لفظوں کی حرمت
وہ تقدیسِ قلم سے باخبر تھا

وہ اپنے عہد کی تاریک شب میں
افق پر پھیلتا نورِ سحر تھا

اُسے پڑھتے ہوئے میں سوچتا ہوں
یقینا وہ کوئی فوق البشر تھا

صلیب جبر پر بھی سچ کا حامی!
وہ شاعر کس قدر شوریدہ سر تھا

۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

ہو پوری خواہش پرواز کیسے
تہہ گنبد اڑے شہباز کیسے

ہمارے درمیاں حائل خلا ہے
تجھے پہنچے مری آواز کیسے

سبھی کچھ ہے تمہاری دسترس میں
تمہیں کوئی کرے ناراض کیسے

مقامِ انتہا پرسوچتا ہوں
کیا تھا یہ سفر آغاز کسیے

ترا پیکر بنا ہے خوشبووں سے
بنے گا تو مرا ہمراز کیسے

کوئی دیوار صحرا میں نہیں‌ تو
پلٹ آئی مری آواز کیسے

اسے بھی فاش کر دے گا زمانہ
رہے گا زندگانی راز کیسے

۔۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

نہ تیری دسترس میں‌کچھ نہ میرے اختیار میں
کہ ہم سبھی گھرے ہوئے ہیں جبر کے حصار میں

کسی نے جیسے روک لی ہو روزو شب کی گردشیں
ہمارے ساتھ وقت بھی رہا ہے انتظار میں

ہوائے دہر سے اماں ملی ہےکس کو جانِ جاں
تمارا رنگ اُڑ گیا تو ہم ہیں کس شمار میں

وہ جن کے دم سے رنگ و روشنی ہمیں عزیز ہیں
وہ سارے عکس چھپ گئے ہیں وقت کے غبار میں

جواں دلوں کی خواہشیں کچھ اس طرح‌ اجڑ گئیں
کہ جیسے کاٹ دے کوئی ہرے شجر بہار میں

ترے سمندروں کی بھی سنا ہے کوئی حد نہیں
مگر بلا کی وسعتیں ہیں میرے ریگزار میں

۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

دیکھ تو یہ کیا ہوا
وقت کیوں ٹھہر گیا

گونج اٹھا سکوتِ شب
درد ایسے بول اُٹھا

کیسے کیسے دکھ سہے
کتنا سخت جان تھا

ایسی یخ ہوا چلی
زخم پھر ہرا ہوا

مدتوں سے چپ تھا وہ
بول اٹھا تو رو پڑا

اب وہ ولولے کہاں
وقت تھا گزر گیا

بادلوں کی گود میں
چاند تھک کے سو گیا
۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

نظم

۔۔۔۔۔۔۔۔۔۔۔۔

ایک جنگجو قبیلے کے شاعر کا گیت

یہ حرب کرب کی فضا
یہ کشت و خوں کا سلسلہ
ہر ایک آنکھ میں چھپی
ہوئی ہے ایک شعلگی
ٹنگے ہوئے ہیں چار سو
کمان، تیغ اور تبر
لگا ہے ہر مکان پر
لہو میں تربتر علم
مگر مری متاع جاں
بس اک چراغ، اک قلم
مرے خدا کو ہے خبر
مری رگوں میں بھی رواں
یہی لہو، یہی اثر
جوان ہوں، دلیر ہوں
پر اس کے باوجود میں
سفیر امن و خیر ہوں
مگر یہ میرے اردگرد
شر کی قدرومنزلت!
مرے خدا میں کیا کروں!
مرے خدا میں کیا کروں!

۔۔۔۔۔۔۔۔۔۔۔۔۔۔۔

 

[وہاب اعجاز خان]

غزل

غزل
وہ خود بھی پیاس کے سوکھے نگر میں بستا ہے
جو ابر بن کے مرے دشت پر برستا ہے

چھلک نہ جائے یہ پیمانہ اس کشاکش میں
کہ خون موج میں ہے اور دل شکستہ ہے

نظر اٹھاوں تو منزل کا فاصلہ ہے وہی
پلٹ کے دیکھوں تو پیچھے طویل رستہ ہے

یہ زہر کس نے انڈیلا ہے میری نس نس میں
یہ کون ہے جو مجھے انگ انگ ڈستا ہے

مرا کسی سے تعلق نہیں تو پھر عامر
یہ کس کا درد مری دھڑکنوں میں بستا ہے

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

بس ایک دھن تھی اُسی دھن میں‌شعر کہتے رہے
تمام عمر ترے غم کی رو میں‌ بہتے رہے

گھر آگئے تو کوئی منتظر نہ تھا ان کا
جو لوگ دربدری کے عذاب سہتے رہے

زمانے والے جسے سوچنے سے خائف تھے
وہ بات اہل جنوں محفلوں میں‌کہتے رہے

میں جتنی دیر ندی کے کنارے بیٹھا رہا
ردائے آب پہ تازہ گلاب بہتے رہے

خود اپنے آپ سے باتوں کے شوق میں‌عامر
ہم ایک عمر گھنے جنگلوں میں رہتے رہے

۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

فصل گل ہے تو بے اثر کیوں ہے
تن برہنہ مرا شجر کیوں ہے

چاند ہے کیوں مرے تعاقب میں
چاندنی میری ہمسفر کیوں ہے

گل پرستی شعار تھا جس کو
اُس بدن پر قبائے زر کیوں ہے

میں کھڑا ہوں ہوا کے رخ پہ تو پھر
وہ مرے غم سے بے خبر کیوں ہے

کون اترے گا ان نشیبوں میں
اتنی گہری تری نظر کیوں ہے

میں ترا دھیان کرکے سوچتا ہوں
زندگی اتنی مختصر کیوں ہے

۔۔۔۔۔۔۔۔۔۔۔۔۔۔۔​

 

[وہاب اعجاز خان]

دھنک

۔۔۔۔۔۔۔۔۔۔۔۔۔۔۔۔۔۔۔۔۔


دھنک


فضا تیز بارش کے بعد
آئینے کی طرح
جھلملانے لگی ہے!
ہوائیں‌معطر ہیں
اور نور کی ایک چادر
افق تا افق تن گئی ہے
دریچوں کو وا کرکے
باہر تو جھانکو
دلوں میں‌ بسی آرزو
رنگ بن کر
دھلے آسماں پر دھنک بن گئی ہے

۔۔۔۔۔۔۔۔۔۔۔۔۔۔۔۔

 

[وہاب اعجاز خان]

گیت

دیارِ سبزہ و گل

دیارِ سبزہ و گل! میری چاہتوں کے نگر
ترے جمال نے بخشا ہے مجھ کو حسنِ نظر

صبا سے رقص کناں تیرے سبز ٹیلوں میں
فلک سے چاند اُترتا ہے تیری جھیلوں پر
دھنک کے رنگ میں ڈوبے ہیں تیرے شام سحر
دیار سبزہ و گل! میری چاہتوں کے نگر

یہ تیری دھوپ کی زرتار روشنی ، یہ فضا
گلوں کی باس چراتی یہ عطر بیز ہوا
یہ نغمہ ریز پرندے، یہ کھیتیاں، یہ شجر
دیارِ سبزہ و گل! میری چاہتوں کے نگر

ہمیشہ تیرے دروبام جگمگائیں گے
تیرے سپوت لہو کے دیئے جلائیں گے
تری جبیں سے ابھرتے رہیں‌گے شمس وقمر
دیارِ سبزہ و گل! میری چاہتوں کے نگر

۔۔۔۔۔۔۔۔۔۔۔۔۔۔۔۔۔۔۔​