دیے کی آنکھ - مقبول عامر

[وہاب اعجاز خان]

باچا خان

باچا خان

بابا! تم ناراض نہ ہونا
اپنا تو دستور یہی ہے
شہرِستم میں جس کے لبوں پر
صدق و صفا کا نام آیا ہے
ہم نے اُسے آزار دیا ہے
اک تم پر موقوف نہیں ہے
تم تاریخ اٹھا کر دیکھو
جس نے بھی شہرِ خواب سرا میں
ذہنوں کو بیدار کیا ہے
جس نے بھی کوفے کی گلیوں میں
حرمت کا پرچار کیا ہے
ہم نے ایسے اہل دل کو
نذرِ طوق و دار کیا ہے


دیدہ و دل کے اندھیاروں میں
دیئے جلانا جرم ہے بابا!
زرتشتوں کے ایوانوں میں
پھول کھلانا جرم ہے بابا!


تم کس دنیا کے باسی تھے
کذت و ریا کے عہد میں رہ کر
صدق و صفا کا دم بھرتے تھے
بغض و عداوت کی بستی میں
الفت کی باتیں کرتے تھے


تم پر جو کچھ گزری، لیکن
اہلِ نظر اب جان گئے ہیں
زندانوں میں پلنے والے
اہل وفا کے اٹھ جانے پر
خلقِ خدا روئے نہ روئے
زنداں کی کالی دیواریں
برسوں تک آہیں بھرتی ہیں
زنجیریں ماتم کرتی ہیں

۔۔۔۔۔۔۔۔۔۔۔۔۔۔۔۔۔۔۔

 

[وہاب اعجاز خان]

غزل نمبر 17

غزل

ہاں کچھ تو مزاج اپنا جنوں خیز بہت ہے
اور کچھ یہ رہِ عشق دل آویز بہت ہے

مرنے کے لیے تیشہء فرہاد ہے کافی
جینے کے لیے حیلہء پرویز بہت ہے

اب کے نہ کوئی قصر نہ ایوان بچے گا
اب کے جو چلی ہے وہ ہوا تیز بہت ہے

آنکھوں میں دئیے،دل میں ستارے ہیں‌ فروزاں
ورنہ یہ شبِ تار غم انگیز بہت ہے

کچھ بزم کے آداب بھی ملحوظ تھے اس کو
اور کچھ وہ مزاجا بھی کم آمیز بہت ہے

تم رنگ ہو، خوشبوہو، ذرا دھیان میں رہنا
صحرائے محبت کی ہوا تیز بہت ہے
۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل 18

غزل

میری تعریف کرے یا مجھے بدنام کرے
جس نے جو بات بھی کرنی ہے سر عام کرے

زخم پر وقت کا مرہم تو لگا دیتی ہے
اور کیا اس کے سوا گردشِ ایام کرے

محتسب سے میں اکیلا ہی نمٹ سکتا ہوں
جس نے جرم کیا ہے وہ مرے نام کرے

وہ مری سوچ سے خائف ہے تو اس سے کہنا
مجھ میں اڑتے ہوئے طائر کو تہہ دام کرے

کون آئے گا پئے پرسشِ احوال یہاں
کس کی خاطر کوئی تزئینِ دروبام کرے

مجھ کو بھی ہو مری اوقات کا کچھ اندازہ
کوئی تو صورتِ یوسف مجھے نیلام کرے

۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل نمبر 19

غزل

چرواہا بستی والوں سے کہتا ہے
پربت کے اُس پار بھی کوئی رہتا ہے

جس دریا کے رستے میں دیوار نہ ہو
وہ دریا کس خاموشی سے بہتا ہے

مولا جیسی فطرت ہے اُس بندے کی
دیکھتا ہے سب کچھ لیکن چپ رہتا ہے

غم کی موجیں گھٹتی بڑھتی رہتی ہیں
دل کا سال دھیرے دھیرے ڈھتا ہے

میری بھیگی آنکھوں میں اس کا پیکر
جھیلوں میں مہتاب کی صورت رہتا ہے

چاند نے کل شب دریا سے سرگوشی کی
ساحل میرے بارے میں کیا کہتا ہے
۔۔۔۔۔۔۔۔۔۔۔۔۔۔۔
​

 

[وہاب اعجاز خان]

مرے خدا ، مرے دل!

مری سرشت ہے اُس تند خو کی طرح
جو سرکشی میں کناروں سے سر ٹپکتی ہے
جو اس امید پہ ساحل کی سمت بڑھتی ہے
کہ اس حصار کو ڈھا کر کہیں نکل جائے
نئی حدود، نئی منزلوں کو سر کر لے
اور اپنے جسم کی اک ایک بوند ٹپکا کر
پھٹی زمین کے پیاسے لبوں کو تر کر دے
یہ میری راہ میں جتنی کھڑی ہیں دیواریں
یہ جتنے دشت مرے راستے میں حائل ہیں
میں ایک جست میں ان کو پھلانگ سکتا ہوں
مگر یہ عجز کہ اس اختیار کے باوصف
میں اپنا جادہء مسلک بدل نہیں سکتا
ہر ایک مرحلہء غم عبور کر جاوں
مگر حصارِ وفا سے نکل نہیں سکتا
یہ جسم و جاں کی کشاکش، یہ اضطراب خدا
نہ جانے کیسے چکے گا ترا حساب خدا​

 

[وہاب اعجاز خان]

غزل

غزل

رنگ اور نور کی دنیا میں ذرا لے جائے
کوئی تو ہو جو مجھے شہرِ سبا لے جائے

وہ مجھے ڈھونڈنے نکلے تو اُسے کہہ دینا
دھوپ ہے تیز بہت، سر پہ گھٹا لے جائے

یوں تری یاد مجھے ساتھ لیے جاتی ہے
جیسے پھولوں کی مہک بادِ صبا لے جائے

تری محفل کی طرف جائے کہ مقتل کی طرف
ہم تو جائیں گے جدھر راہِ وفا لے جائے

کب سے ویران جزیرے پہ کھڑا ہوں عامر
کوئی موج آئے مجھے ساتھ بہا لے جائے
۔۔۔۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

غزل

غزل

ایک منزل کے ہمسفر چپ ہیں
چل رہے ہیں بہم مگر چپ ہیں

دل کی دھڑکن بھی گونج اٹھتی ہے
اس طرح گھر کے بام و در چپ ہیں

لوگ تو دیکھنے سے ہیں قاصر
آپ کیوں صاحبِ نظر چپ ہیں

جانے کس سمت اُڑ گئے ہیں طیور
صبح خاموش ہے شجر چپ ہیں

کون روئے ستم کے ماروں کو
خوف طاری ہے نوحہ گر چپ ہیں

میرے احباب، مصلحت اندیش!
واقفِ حال ہیں مگر چپ ہیں

۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

کب سے گم سم ہیں دروبام اے رات
کوئی مژدہ، کوئی پیغام اے رات

کیا سنائی نہیں دیتا مجھ کو
خلقتِ شہر کا کہرام اے رات

ایک یہ تیرہ نصیبی اپنی!
اُس پہ یہ جادہء آلام اے رات

جتنے بھی دکھ ہیں مری جھولی میں
سارے لکھے ہیں تیرے نام اے رات

کون آنکھوں میں بسا ہے اب تک
کس نے دیکھا تھا سرِ شام اے رات

یوں دھری ہے مرے آگے دنیا
جس طرح زہر بھرا جام اے رات

کب سے سجدے میں پڑا ہے عامر
کوئی آیت، کوئی الہام اے رات

۔۔۔۔۔۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

اپنے ہمزاد سے

اپنے ہمزاد سے

میں حیرت کدے میں کھڑا سوچتا ہوں
مجھے کیا طلب ہے،
میں کیا چاہتا ہوں!
کبھی دشت میں جاکے
تپتی ہوئی ریت پر دوڑنا چاہتا ہوں
کبھی موج بن کر
کناروں سے سر پھوڑنا چاہتا ہوں
کبھی شبنمی گھاس پر لیٹ کر
چاندنی اوڑھنا چاہتا ہوں
مجھے کیا طلب ہے
میں کیا چاہتاہوں!
کہیں یہ مری مضطرب روح کا
بانکپن تو نہیں ہے؟
کہیں دل نئی منزلوں کی طرف
گامزن تو نہیں ہے؟
۔۔۔۔۔۔۔۔۔۔۔۔۔۔۔۔۔۔

 

[وہاب اعجاز خان]

غزل

غزل

مجھے عزیز ہے کوئی بھی نور پارہ ہو
چراغِ شام ہو یا صبح کا ستارا ہو

ہمارے بیچ محبت کی نہر بہتی ہے
میں اک کنارہ ہوں تم دوسرا کنارہ ہو

اُفق میں دور ستارہ گرا تو ایسے لگا
کہ جیسے تم نے مجھے بام سے پکارا ہو

مجھے یقیں ہے کہ یہ بند ٹوٹ سکتا ہے
بس اک اُمڈتا ہوا تند و تیز دھارا ہو

کوئی تو ہو جو مجھے خود سے ماورا کر دے
کوئی تو ہو جو مجھے جان سے بھی پیارا ہو

میں مانتا ہوں اجل سے مفر نہیں عامر
مگر وہ شخص جیسے زندگی نے مارا ہو
۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

غزل

غزل

اندھیری رات ہے، رستہ سجھائی دے تو چلیں
کوئی کرن، کوئی جگنو دکھائی دے تو چلیں

رکے ہیں یوں تو سلاسل پڑے ہیں پاوں میں
زمین بندِ وفا سے رھائی دے تو چلیں

سفر پہ نکلیں مگر سمت کی خبر تو ملے
سرِ فلک کوئی تارا دکھائی دے تو چلیں

دیارِ گل سے تہی دست کس طرح جائیں
کوئی یہاں بھی غم آشنائی دے تو چلیں

ابھی تو سر پہ کڑی دوپہر کا پہرہ ہے
شفق زمین کو رنگِ حنائی دے تو چلیں

کسی طرف سے تو کوئی بلاوا آجائے
کوئی صدا سرِ محشر سنائی دے تو چلیں

۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

میر حدِ نظر وہاں تک ہے
روشنی کا سفر جہاں تک ہے

جانتا ہے یہ وقت کا سقراط
زہر کا ذائقہ زباں تک ہے

ہرطرف دھوپ کی عملداری
سائے کا راج سائباں تک ہے

اس سے آگے ہے بیکراں عالم
ساری تنگی حصارِ جاں تک ہے

پیاس، صحرا، سراب، سناٹا
جانے یہ سلسلہ کہاں تک ہے

رنگ جتنے ہیں سب زمیں پر ہیں
اک خلا ہے جو آسماں تک ہے

ذہن و دل کی یہ کشمکش ساری
بس ترے سنگِ آستاں تک ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

نیلسن منڈیلا

نیلسن منڈیلا




نیلسن! نیلسن!
تیرے زنداں کے روزن سے آتی ہوئی
روشنی کی کرن
کہہ رہی ہے تجھے
بندِ غم سے پرے
جتنی آنکھیں ہیں اور جس قدر ہاتھ ہیں
سب ترے ساتھ ہیں!
سارے اہل نظر
سارے اہل وفا
دھوپ اور چاندنی
روشنی اور ہوا
نیلگوں آسماں
اُس میں اڑتا ہوا طائرِ خوش نوا
لہلہاتی زمیں
پھول، خوشبو، صبا
سب ترے ہم نفس
سب ترے ہم نوا
ساعتیں بھی تری
گردشیں بھی تری
وقت کی قید میں جتنے دن رات ہیں
سب ترے ساتھ ہیں
رات کی تیرگی کتنی گھمبیر ہو
روشنی کو کوئی روک سکتا نہیں
وہ جو سیلِ رواں
آرہا ہے یہاں
کوئی جابر اُسے ٹوک سکتا نہیں
بس ذرا دیر ہے آمدِ حشر میں
ختم ہونے کو ہے ظلم کا سلسلہ
ہار جانے کو ہے لشکرِ اہرمن
ٹوٹ جانے کو ہیں تیرے طوق و رسن


نیلسن ! نیلسن!
تیرے زنداں کے روزن سے آتی ہوئی
روشنی کی قسم
میرے شعر و سخن
میرے لوح و قلم
کہہ رہے ہیں تجھے
ظلمت و نور کی
اس کڑی جنگ میں
تو اکیلا نہیں
ہم ترے ساتھ ہیں!
ہم ترے ساتھ ہیں!

 

[وہاب اعجاز خان]

غزل

غزل

کوئی تو عکس ہو ایسا جو معتبر ٹھہرے
کہیں تو جاکے بھٹکتی ہوئی نظر ٹھہرے

کوئی نہ ساتھ چلا، راستہ ہی ایسا تھا
مرے ہی نقشِ قدم میرے ہمسفر ٹھہرے

جو روشنی سے نگاہیں ملا نہیں سکتے
دیارِ شب میں وہی صاحبِ نظر ٹھہرے

زمانہ گزرا ہمیں ماہتاب دیکھے ہوئے
اُسے کہو کہ ذرا دیر بام پر ٹھہرے

کہیں عدو نے کہیں دوستوں نے روک لیا
رہِ وفا کے مسافر نگر نگر ٹھہرے

یہ چاندنی جو بھٹکتی ہے کو بہ کو عامر
خدا کرےکہ کسی رات میرے گھر ٹھہرے

۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

بلا کی دھوپ تھی ساری فضا دہکتی رہی
مگر وفا کی کلی شاخ پر چٹکی رہی

بچھڑتے وقت میں اُس کو دلاسہ دیتا رہا
وہ بے زباں تھی مجھے بے بسی سے تکتی رہی

اُسے خبر تھی کی ہم اہلِ دشت پیاسے ہیں
جبھی تو موج کناروں سے سر ٹپکتی رہی

الم نصیب تو رو رو کے سو گئے شاید
مگر ملول ہوا رات بھر سسکتی رہی

دمِ جدائی وہ مریم صلیب کی مانند
مرے گلے سے بڑی دیر تک لٹکتی رہی

میں ایسی راہ پہ نکلا کہ میری خوش بختی
تمام عمر مرے کھوج میں بھٹکتی رہی
۔۔۔۔۔۔۔۔۔۔۔۔۔۔۔۔۔۔۔۔۔۔

​

 

[وہاب اعجاز خان]

غزل

غزل

دیپ بن کر جلا بجھا ہوں میں
رات بھر جاگتا رہا ہوں میں

لوگ حیرت سے دیکھتے ہیں مجھے
جانے کیا بات کہہ گیا ہوں میں

مجھ سے ہو کر تجھے گزرنا ہے
تیری منزل کا راستہ ہوں میں

غم کی بارش میں گیلی چھت کے تلے
قطرہ قطرہ سلگ رہا ہوں میں

جانے کس دھن میں گھر سے نکلا تھا
پیچ رستے میں کھو گیا ہوں میں

زندگی ایک راز ہے عامر!
اور یہ راز جانتا ہوں میں

۔۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

بنجمن مولائس

بنجمن مولائس

ستمگروں سے ہمیں اس قدر ہی کہنا ہے
یہ طوق و دار تو اہل وفا کا گہنا ہے

رگِ گلو میں بہے یا وفا کی راہوں میں
لہو کی جوئے رواں ہے اسے تو بہنا ہے

سکوں انہیں بھی میسر نہ آسکے کبھی
ستمگروں نے بھی اس حشر گہ میں رہنا ہے
۔۔۔۔۔۔۔۔۔۔۔۔۔
​

 

[وہاب اعجاز خان]

ایک شعر

۔۔۔۔۔۔۔۔۔۔۔۔۔۔۔۔۔۔

جب سارا وقت تری فرقت کی آگ میں‌ جلتا ہے
تیرا عامر ٹھنڈی گھاس پہ ننگے پاوں چلتا ہے
۔۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

جانے کس وحشت کا سایہ سا مجھ پہ لہراتا ہے
دل بے چارہ دن ڈھلتے ہی ڈوبا ڈوبا جاتا ہے

میرے اندر محرومی کا جنگل سا اُگ آتا ہے
ابر میرے بنجر کھیتوں پر جب بھی مینہ برساتا ہے

تیرے غم کے نشے سے مرے نین نشیلے رہتے ہیں
تیری یاد کا جھونکا میرا سونا من مہکاتا ہے

دنیا والے چاند نکلنے کی جو بھی توجیہ کریں
میں تو کہتا ہوں یہ جاگنے والوں کو بہلاتا ہے

فرطِ غم سے میں اپنی زنجیریں کاٹنے لگتا ہوں
جب دیوار پہ بیٹھا کوئی پنچھی پر پھیلاتاہے

یہ آواز کا جادو ہے یا ذوقِ سماعت کا افسوں
اب تک تیرا گیت مرے گانوں میں رس ٹپکاتا ہے
۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

غزل

دل بہل جائے گا، اس کا مجھے اندازہ ہے
بات یہ ہے کہ مرا زخم ابھی تازہ ہے

جانے کس طرح صبا تیری خبر لائے گی
میرے زنداں میں نہ روزن ہے نہ دروازہ ہے

ہاں ترے جبر کی شہرت بھی بہت تھی لیکن
اب تو بستی میں مرے صبر کا آوازہ ہے

جتنے بھی دکھ تھے مجھے سونپ دیئے ہیں عامر
دینے والے کو مرے ظرف کا اندازہ ہے
۔۔۔۔۔۔۔۔۔۔۔۔۔۔۔۔۔۔۔
​