دیوان (ناصر کاظمی)

[وہاب اعجاز خان]

غزل

تیری نگاہ کے جادو بکھرتے جاتے ہیں
جو زخم دل کو ملے تھے وہ بھرتے جاتے ہیں

ترے بغیر وہ دن بھی گزر گئے آخر
ترے بغیر یہ دن بھی گزرتے جاتے ہیں

لیے چلو مجھے دریائےشوق کی موجو
کہ ہمسفر تو مرے پار اترتے جاتے ہیں

تمام عمر جہاں ہنستے کھیلتے گزری
اب اس گلی میں بھی ہم ڈرتے ڈرتے جاتے ہیں

میں خواہشوں کے گھروندے بنائے جاتاہوں
وہ محنتیں مری برباد کرتے جاتے ہیں

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

کب تلک مدعا کہے کوئی
نہ سنو تم تو کیا کہے کوئی

غیرت عشق کو قبول نہیں
کہ تجھے بے وفا کہے کوئی

منتِ ناخدا نہیں منظور
چاہے اس کو خدا کہے کوئی

ہر کوئی اپنے غم میں ہے مصروف
کس کو درد آشنا کہے کوئی

کون اچھا ہے اس زمانے میں
کیوں کسی کو برا کہے کوئی

کوئی تو حق شناس ہو یارب
ظلم کو ناروا کہے کوئی

وہ نہ سمجھیں گے ان کنایوں کو
جو کہے برملا کہے کوئی

آرزو ہے کہ میرا قصہء شوق
آج میرے سوا کہے کوئی

جی میں آتا ہے کچھ کہوں ناصر
کیا خبر سن کے کیا کہے کوئی

۔۔۔۔۔۔۔۔۔۔۔۔۔​

 

[وہاب اعجاز خان]

غزل

دل بھی عجیب عالم ہے نظر بھر کے تو دیکھو
نقشے کبھی اس اجڑے ہوئے گھر کے دیکھو

اے دیدہ درد دیدہء پرنم کی طرف بھی
مشتاق ہو لعل و زر و گوہر کے تو دیکھو

بے زادِ سفر جیب تہی شہر نوردی
یوں میری طرح عمر کے دن بھر کے تو دیکھو

کہتے ہیں غزل قافیہ پیمائی ہے ناصر
یہ قافیہ پیمائی ذرا کرکے تو دیکھو

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

پیارے دیس کی پیاری مٹی
سونے پرہے بھاری مٹی

کیسے کیسے بوٹے نکلے
لال ہوئی جب ساری مٹی

دکھ کے آنسو سکھ کی یادیں
کھاری پانی کھاری مٹی

تیرے وعدے میرے دعوے
ہوگئے باری باری مٹی

گلیوں میں اڑتی پھرتی ہے
تیرے ساتھ ہماری مٹی

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

اہل دل آنکھ جدھر کھولیں گے
اک دبستانِ ہنر کھولیں گے

وہیں رک جائیں گے تاروں کے قدم
ہم جہاں رختِ سفر کھولیں گے

بحر ایجاز خطرناک سہی
ہم ہی اب اس کے بھنور کھولیں گے

کنج میں بیٹھے ہیں چپ چاپ طیور
برف پگھلے گی تو پر کھولیں گے

آج کی رات نہ سونا یارو
آج تو ساتواں در کھولیں گے

۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

اس دنیا میں اپنا کیا ہے
کہنے کو سب کچھ اپنا ہے

یوں تو شبنم بھی دریا ہے
یوں تو دریا بھی پیاسا ہے

یوں تو ہر ہیرا بھی کنکر
یوں تو مٹی بھی سونا ہے

منہ دیکھے کی باتیں ہیں سب
کس نے کس کو یاد کیا ہے

تیرے ساتھ گئی وہ رونق
اب اس شہر میں کیا رکھا ہے

بات نہ کر صورت تو دکھادے
تیرا اس میں کیا جاتا ہے

دھیان کے آتش دان میں ناصر
بجھے دِنوں کا ڈھیر پڑا ہے

۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

تو ہے یا ترا سایا ہے
بھیس خدائی نے بدلا ہے

دل کی حویلی پر مدت سے
خاموشی کا قفل پڑا ہے

چیخ رہے ہیں خالی کمرے
شام سے کتنی تیز ہوا ہے

دروازے سر پھوڑ رہے ہیں
کون اس گھر کو چھوڑ گیا ہے

تنہائی کو کیسے چھوڑوں
برسوں میں ایک یار ملا ہے

رات اندھیری ناو ساتھی
رستے میں دریا پڑتا ہے

ہچکی تھمتی ہی نہیں ناصر
آج کسی نے یاد کیا ہے

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

دل کے لیے دردبھی روز نیا چاہیئے
زندگی تو ہی بتا کیسے جیا چاہیئے

میری نوائیں الگ، میری دعائیں الگ
میرے لیے آشیاں سب سے جدا چاہیے

نرم ہے برگِ سمن، گرم ہے میرا سخن
میری غزل کے لیے ظرف نیا چاہیے

سر نہ کھپا اے جرس، مجھ کو مرا دل ہے بس
فرصتِ یک دو نفس مثلِ صبا چاہیے

باغ ترا باغباں، تو ہے عبث بدگماں
مجھ کو تو اے مہرباں ، تھوڑی سی جا چاہیئے

خوب ہیں گل پھول بھی تیرے چمن میں مگر
صحن ِ چمن میں کوئی نغمہ سر چاہیے

ہے یہی عین وفا دل نہ کسی کا دکھا
اپنے بھلے کے لیے سب کا بھلا چاہیئے

بیٹھے ہو کیوں ہار کے سائے میں دیوار کے
شاعرو، صورت گرو کچھ تو کیا چاہیے

مانو مری کاظمی تم ہو بھلے آدمی
پھر وہی آوارگی کچھ تو حیا چاہیے

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

شعلہ سا پیچ وتاب میں دیکھا
جانے کیا اضطراب میں دیکھا

گل کدوں کے طلسم بھول گئے
وہ تماشا نقاب میں دیکھا

آج ہم نے تمام حسنِ بہار
ایک برگِ گلاب میں دیکھا

سر کھلے، پابرہنہ، کھوٹے پر
رات اُسے ماہتاب میں دیکھا

فرصتِ موسمِ نشاط نہ پوچھ
جیسے اک خواب، خواب میں دیکھا

۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

جو گفتنی نہیں وہ بات بھی سنادوں گا
تو ایک بار تو مل، سب گلے مٹادوں گا

مجال کیا ہے کوئی مجھ سے تجھے جدا کر دے
جہاں بھی جائے گا تو میں تجھے صدا دوں گا

تری گلی میں بہت دیر سے کھڑا ہوں مگر
کسی نے پوچھ لیا تو جواب کیا دوں گا

مری خموش نگاہوں کو چشم کم سے نہ دیکھ
میں رو پڑا تو دلوں کے طبق ھلا دوں گا

یونہی اداس رہا میں تو دیکھنا اک دن
تمام شہر میں تنہائیاں بچھا دوں گا

بہ پاس صحبتِ دیرینہ کوئی بات ہی کر
نظر ملا تو سہی میں تجھے دعا دوں گا

بلاوں گا نہ ملوں گا نہ خط لکھوں گا تجھے
تری خوشی کے لیے خود کو یہ سزا دوں گا

وہ درد ہی نہ رہا ورنہ اے متاعِ حیات
مجھے گماں بھی نہ تھا میں تجھے بھلا دوں گا

ابھی تو رات ہے کچھ دیر سو ہی لے ناصر
کوئی بلائے گا تو میں تجھے جگا دوں گا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

زمیں چل رہی ہے کہ صبحِ زوالِ زماں ہے
کہو اے مکینو کہاں ہو یہ کیسا مکاں ہے

پریشان چیزوں کی ہستی کو تنہا نہ سمجھو
یہاں سنگ ریزہ بھی اپنی جگہ اک جہاں ہے

کبھی تیری آنکھوں کے تل میں جو دیکھا تھا میں نے
وہی ایک پل محملِ شوق کا سارباں ہے

کہیں تو مرے عشق سے بدگماں ہو نہ جائے
کئی دن سے ہونٹوں پہ تیرے نہیں ہے نہ ہاں ہے

خدا جانے ہم کس خرابے میں آخر بسے ہیں
جہاں عرضِ اہل ہنر نکہتِ رائیگاں ہے

جہانوں کے مالک زمانوں سے پردہ اٹھا دے
کہ دل ان دنوں بے نیازِ بہارو خزاں ہے

ترے فیصلے وقت کی بارگاہوں میں دائم
ترے اسم ہر چار سو میں مگر تو کہاں ہے

خمارِ غریبی میں بے غم گزرتی ہے ناصر
درختوں سے بڑھ کر مجھے دھوپ کا سائباں ہے

۔۔۔۔۔۔۔۔۔۔۔۔۔​

 

[وہاب اعجاز خان]

غزل

درد کانٹا ہے اس کی چھبن پھول ہے
درد کی خامشی کا سخن پھول ہے

اڑتا پھرتا ہے پھلواریوں سے جدا
برگِ آوارہ جیسے پون پھو ل ہے

اس کی خوشبو دکھاتی ہے کیا کیا سمے
دشتِ غربت میں یادِ وطن پھو ل ہے

تختہ ء ریگ پر کوئی دیکھے اسے
سانپ کے زہر میں رس ہے پھن پھول ہے

میری لے سے مہکتے ہیں کوہ و دمن
میرے گیتوں کا دیوانہ پن پھول ہے

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

کارواں‌سست رہبر خاموش
کیسے گزرے گا یہ سفر خاموش

تجھے کہنا ہے کچھ مگر خاموش
دیکھ اور دیکھ کے گزر خاموش

یوں ترے راستے میں‌ بیٹھا ہوں
جیسے ایک شمعِ رہگزر خاموش

تو جہاں ایک بار آیا تھا
ایک مدت سے ہے وہ گھر خاموش

اس گلی کے گزرنے والوں کو
تکتے رہتے ہیں بام و در خاموش

اٹھ گئے کیسے کیسے پیارے لوگ
ہو گئے کیسے کیسے گھر خاموش

یہ زمیں کس کے انتظار میں ہے
کیا خبر کیوں ہے یہ نگر خاموش

شہر سوتا ہے رات جاگتی ہے
کوئی طوفاں ہے پردہ در خاموش

اب کے بیڑا گزر گیا تو کیا
ہیں ابھی کتنے ہی بھنور خاموش

چڑھتے دریا کا ڈر نہیں یارو
میں ہوں ساحل کو دیکھ کر خاموش

ابھی وہ قافلے نہیں آئے
ابھی بیٹھیں نہ ہم سفر خاموش

ہر نفس اک پیام تھا ناصر
ہم ہی بیٹھے رہے مگر خاموش

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

چھپ جاتی ہیں آئینہ دکھا کر تری یادیں
سونے نہیں دیتیں مجھے شب بھر تیری یادیں

تو جیسے مرے پاس ہے اور محوِ سخن ہے
محفل سی جما دیتی ہیں اکثر تیری یادیں

میں کیوں نہ پھروں تپتی دوپہروں میں ہراساں
پھرتی ہیں تصور میں کھلے سر تری یادیں

جب تیز ہوا چلتی ہے بستی میں سرِ شام
برساتی اطراف سے پتھر تیری یادیں



۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

میں ہوں رات کا ایک بجا ہے
خالی رستہ بول رہا ہے

آج تو یوں خاموش ہے دنیا
جیسے کچھ ہونے والا ہے

کیسی اندھیری رات ہے دیکھو
اپنے آپ سے ڈر لگتا ہے

آج تو شہر کی روش روش پر
پتوں کا میلہ سا لگا ہے

آو گھاس پہ سبھا جمائیں
میخانہ تو بند پڑا ہے

پھول تو سارے جھڑ گئے لیکن
تیری یاد کا زخم ہرا ہے

تو نے جتنا پیار کیاتھا
دکھ بھی مجھے اتنا ہی دیا ہے

یہ بھی ہے ایک طرح کی محبت
میں تجھ سے تو مجھ سے جدا ہے

یہ تری منزل وہ مرا رستہ
تیرا میرا ساتھ ہی کیا ہے

میں نے تو اک بات کہی تھی
کیا تو سچ مچ روٹھ گیا ہے

ایسا گاہک کون ہے جس نے
سکھ دے کر دکھ مول لیا ہے

تیرا رستہ تکتے تکتے
کھیت گگن کا سوکھ چلا ہے

کھڑکی کھول کے دیکھ تو باہر
دیر سے کوئی شخص کھڑا ہے

ساری بستی سو گئی ناصر
تو اب تک کیوں جاگ رہا ہے​

 

[وہاب اعجاز خان]

غزل

گا رہا تھا کوئی درختوں میں
رات نیند آگئی درختوں میں

چاند نکلا افق کے غاروں سے
آگ سی لگ گئی درختوں میں

مینہہ برسا تو برگ ریزوں نے
چھیڑ دی بانسری درختوں میں

یہ ہوا تھی کہ دھیان کا جھونکا
کس نے آواز دی درختوں میں

ہم ادھر گھر میں ہو گئے بے چین
دور آندھی چلی درختوں میں

لیے جاتے ہے موسموں کی پکار
اجنبی اجبنی درختوں میں

کتنی آبادیاں ہیں شہر سے دور
جاکے دیکھو کبھی درختوں میں

نیلے پیلے سفید لال ہرے
رنگ دیکھے سبھی درختوں میں

خوشبووں کی اداس شہزادی
رات مجھ کو ملی درختوں میں

دیر تک اُس کی تیز آنکھوں میں
روشنی سی رہی درختوں میں

چلتے چلتے ڈگر اجالوں کی
جانے کیوں مڑ گئی درختوں میں

سہمے سہمے تھے رات اہل چمن
تھا کوئی آدمی درختوں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

کہیں اجڑی اجڑی سی منزلیں کہیں ٹوٹے پھوٹے سے بام و در
یہ وہی دیار ہے دوستو جہاں لوگ پھرتے تھے رات بھر

میں بھٹکتا پھرتا ہوں دیر سے یونہی شہر شہر نگر نگر
کہاں کھو گیا مرا قافلہ کہاں رہ گئے مرے ہم سفر

جنہیں زندگی کا شعور تھا انہیں بے زری نے بچھا دیا
جو گراں تھے سینہ چاک پر وہی بن کے بیٹھے ہیں معتبر

مری بیکسی کا نہ غم کرو مگر اپنا فائدہ سوچ لو
تمہیں جس کی چھاوں عزیز ہے میں اُسی درخت کا ہوں ثمر

یہ بجا ہے آج اندھیرا ہے ذرا رت بدلنے کی دیر ہے
جو خزاں کے خوف سے خشک ہے وہی شاخ لائے گی برگ وبر

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

رات ڈھل رہی ہے
ناو چل رہی ہے

برف کے نگر میں
آگ جل رہی ہے

لوگ سو رہے ہیں
رت بدل رہی ہے

آج تو یہ دھرتی
خوں اگل رہی ہے

خواہشوں کی ڈالی
ہاتھ مل رہی ہے

جاہلوں کی کھیتی
پھول پھل رہی ہے

۔۔۔۔۔۔۔۔۔۔۔۔۔۔۔
​

 

[وہاب اعجاز خان]

غزل

کیا زمانہ تھا کہ ہم روز ملا کرتے تھے
رات بھر چاند کے ہمراہ پھرا کرتے تھے

جہاں تنہایاں سر پھوڑ کے سوجاتی ہیں
ان مکانوں میں عجب لوگ رہا کرتے تھے

کردیا آج زمانے نے انہیں بھی مجبور
کبھی یہ لوگ مرے دکھ کی دوا کرتے تھے

دیکھ کر جو ہمیں چپ چاپ گزر جاتا ہے
کبھی اُس شخص کو ہم پیار کیا کرتے تھے

اتفاقاتِ زمانہ بھی عجب ہیں ناصر
آج وہ دیکھ رہے ہیں جو سنا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

دل میں اور تو کیا رکھا ہے
تیرا درد چھپا رکھا ہے

اتنے دکھوں کی تیز ہوا میں
دل کا دیپ جلا رکھا ہے

دھوپ سے چہروں نے دنیا میں
کیااندھیر مچا رکھا ہے

اس نگری کے کچھ لوگوں نے
دکھ کا نام دوا رکھا ہے

وعدہء یار کی بات نہ چھیڑو
یہ دھوکا بھی کھا رکھا ہے

بھول بھی جاو بیتی باتیں
ان باتوں میں کیا رکھا ہے

چپ چپ کیوں رہتے ہو ناصر
یہ کیا روگ لگا رکھا ہے

۔۔۔۔۔۔۔۔۔۔۔۔​