خورشید رضوی دل کو پیہم وہی اندوہ شماری کرنا ۔۔۔۔۔(خورشید رضوی)

نوید صادق

محفلین
غزل

دل کو پیہم وہی اندوہ شماری کرنا
ایک ساعت کو شب و روز پہ طاری کرنا

اب وہ آنکھیں نہیں ملتیں کہ جنہیں آتا تھا
خاک سے دل جو اٹے ہوں انہیں جاری کرنا

موت کی ایک علامت ہے ، اگر دیکھا جائے
روح کا چار عناصر پہ سواری کرنا

تو کہاں مرغِ چمن، فکرِ نشیمن میں پڑ ا
کہ ترا کام تو تھا نالۂ و زاری کرنا

ہوں میں وہ لالۂ صحرا کہ ہوا میرے سپرد
دشت میں پیرویٔ بادِ بہاری کرنا

اس سے پہلے کہ یہ سودا مرے سر میں نہ رہے
دستِ قاتل کو عطا ضربتِ کاری کرنا

یہ جو ٹپکا ہے زباں پر سو کرم ہے تیرا
اب رگ و پے میں اسے جاری و ساری کرنا

بخشنا لعل و جواہر سے سوا تابِ سخن
خاک کو انجمِ افلاک پہ بھاری کرنا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

(خورشید رضوی)
 
تو کہاں مرغِ چمن، فکرِ نشیمن میں پڑ ا
کہ ترا کام تو تھا نالۂ و زاری کرنا
ایک اور موتی نکلا!
واہ
نوید بھائی پھر شکریہ!
 
Top