ساغر صدیقی دلوں کو اجالو! سحر ہو گئی ہے

[فرحان محمد خان]

دلوں کو اجالو! سحر ہو گئی ہے
نگاہیں ملا لو ! سحر ہو گئی ہے

اٹھو ! کشتیِ زیست کو ظلمتوں کے
بھنور سے نکالو ! سحر ہو گئی ہے

سنوارو یہ زلفیں کہ شب کٹ چکی ہے
یہ آنچل سنبھالو ! سحر ہو گئی ہے

شکستہ امیدوں کی پروائیوں کو
گلے سے لگا لو ! سحر ہو گئی ہے

پگھلنے لگا ہے ضمیرِ مشیت
اٹھو! سونے والو ! سحر ہو گئی ہے

بہاروں کے ساغرؔ سے اے مہ جمالو
ضیائیں اچھالو ! سحر ہو گئی ہے​

ساغرؔ صدیقی​