دعا

[زیرک]

صاف قلقل سے صدا آتی ہےآمیں، آمیں
اپنے ساقی کو جو ہم رِند دعا دیتے ہیں​

 

[زیرک]

مِرا کہا کبھی سیدھا نہیں پڑا انجم
مِری دعا سے بچو، میری بد دعا لے لو
انجم سلیمی​

 

[زیرک]

دعا کرو کہ سلامت رہے مری ہمت
یہ اک چراغ کئی آندھیوں پہ بھاری ہے
وسیم بریلوی​

 

[زیرک]

دعائیں تو ہم ساتھ لائے ہیں اپنے
مگر گاؤں میں اپنی ماں چھوڑ آئے
عطش اعظمی​

 

[زیرک]

اب کہاں ایسی طبیعت والے
چوٹ کھا کر جو دعا کرتے تھے​

 

[زیرک]

میری ماں کی یہ دعاؤں کا ہے صدقہ عابد
میرے دشمن کا ہر اک وار خطا ہوتا ہے
عابد کمالوی​

 

[جاسمن]

یہ سچ نہیں کسی کی ہمیں بددعا لگی
ہم لوگ تو کسی کی دعاؤں سے چل بسے

اختر ملک

 

[سیما علی]

دعا سلام بہت ہے کلام رہنے دے!!!!!!!
جو لوگ عام ہیں ان کو تو عام رہنے دے

راحیل فاروق

 

[سیما علی]

چلو دعا کریں مل کے خدائے واحد سے
ہمارے در پہ بھی دستک دے انقلاب کوئی

صفدر ہمدانی

 

[سیما علی]

فقیرِ شہر نے دی ہے دعا بوقت سحر!!!!!!!!
تمہاری شب میں بھی اترے گا ماہتاب کوئی

صفدر ہمدانی

 

[سیما علی]

صفدر رہوں میں اسکی نگاہوں میں سرخرو
رب سے دعا یہ کرتا رہا ہوں تمام رات


صفدر ہمدانی

 

[سیما علی]

ہے دعا یاد مگر حرف دعا یاد نہیں
میرے نغمات کو انداز نوا یاد نہیں


ساغر صدیقی

 

[سیما علی]

کوئی چارہ نہیں دعا کے سوا
کوئی سنتا نہیں خدا کے سوا

حفیظ جالندھری

 

[سیما علی]

میں کسی کے دست طلب میں ہوں تو کسی کے حرف دعا میں ہوں
میں نصیب ہوں کسی اور کا مجھے مانگتا کوئی اور ہے!!!!!!!!!!!!


سلیم کوثر

 

[مومن فرحین]

وہ میرے حق میں دعا کر کے پریشان سا تھا
میں نے افلاک سے آمین بلا لی واپس

 

[جاسمن]

یہ میری عمر مرے ماہ وسال دے اُس کو
مِرے خدا مِرے دُکھ سے نکال دے اُس کو

وہ چُپ کھڑا ہے کئی دن سے تیری خاطر تو
کواڑکھول دے اذنِ سوال دے اُس کو

عذاب بد نظری کا جِسے شعور نہ ہو
یہ میری آنکھیں‘ مِرے خّدخال دے اُس کو

وہ جس کا حرفِ دُعا روشنی ہے میرے لیے
میں بُجھ بھی جاؤں تو مولا اُجال دے اُس کو

نوشی گیلانی