خواب کو گھول کے اشکوں میں بنائی ہوئی ہے۔ جواز جعفری

[شیزان]

خواب کو گھول کے اشکوں میں بنائی ہوئی ہے​

ایک تصویر جو آنکھوں میں سجائی ہوئی ہے​

​

مہکی مہکی ہوئی آتی ہے سرِ شام ہوا​

تازہ تازہ کہیں پھولوں کی چُنائی ہوئی ہے​

​

مجھ سے کترا کے گزر قافلۂ رنگ و بہار!​

کہ جُنوں خیزی مری، رنگ پہ آئی ہوئی ہے​

​

اِس لیے آنکھ بھر آئی ہے کہ مجھ کو یہ کتھا​

میرے بچپن میں مری ماں نے سُنائی ہوئی ہے​

​

پھر سرِ شام بدلنے لگا موسم کا مزاج​

جانتا ہے مری فصلوں میں کٹائی ہوئی ہے​

​

اُسی مدفن سے ملے گا مرے ماضی کا سراغ​

جس کھنڈر کی ابھی دو ہاتھ کھدائی ہوئی ہے​

​

ایک دن آئیں گے تعبیر کے پھل پُھول جواز​

قلمِ خاک سرِ چشم لگائی ہوئی ہے​

​

جواز جعفری​