جادو کا کھلونا ۔۔۔از ۔۔۔ محمد احمدؔ

محمداحمد نے 'آپ کی تحریریں' کی ذیل میں اس موضوع کا آغاز کیا، ‏مارچ 29, 2018

  1. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    جادو کا کھلونا
    محمد احمد

    آج تو میں اِس دنیا کو انفرینڈ کر ہی دوں گا۔

    میں نے آج پھر تلملاتے ہوئے کہا۔ ویسے ہی جیسے ہر بار زخم کھا کر ہاتھ ڈریسنگ باکس میں رکھے مرہم و نشتر کی طرف بڑھتا ہے کہ اب کچھ علاج ہونا ہی چاہیے۔ لیکن بقول راشد:

    زہرِ غم کی نگہِ دوست بھی تریاق نہیں
    جا ترے درد کا درماں دلِ صد چاک نہیں

    ن ۔م راشد

    خیر ! نہ جانے کس جھونک میں اُڑتا ہوا میں اُس کی پروفائل تک پہنچ گیا۔ کیا حسین پروفائل تھی، میں ہمیشہ کی طرح مبہوت ہو کر رہ گیا۔ لیکن پھر قاصر کی نصیحت یاد آئی۔

    حسین سانپ کے نقش و نگار خوب سہی
    نگاہ زہر پہ رکھ، خوشنما بدن پہ نہ جا


    وہی پھولوں سا بدن، اور وہی ڈستی خوشبو! میں نے گھبرا کر نظریں چاروں طرف دوڑائیں۔

    کہاں ہے؟ ان فرینڈ کا بٹن کہاں ہے؟ کوئی نیلا، کوئی سُرخ بٹن! کہ جسے پوری قوت سے ضرب لگا کر ہی دل کو کچھ تسکین ملے۔ کہ جس پر کلک کرتے ہوئے انگشت تلوار بن جائے اور دل اس زور سے دھڑکے کہ گرج آسمان میں سنائی دے۔

    لیکن نہیں یہاں تو کوئی بٹن ہے ہی نہیں! کیسے انفرینڈ کروں؟ کیسے جان چھڑاؤں؟ آخر کیسے؟

    کہاں ہیں جون ایلیا، جو کہتے تھے کہ

    ترکِ تعلقات کوئی مسئلہ نہیں
    یہ تو وہ راستہ ہے کہ بس چل پڑے کوئی


    پھر تو، پھر تو لیاقت علی عاصم ہی اچھے رہے:

    عاجز تھا بے عجز نبھائی، رسمِ جُدائی میں نے بھی
    اُس نے مجھ سے ہاتھ چُھڑایا، جان چھڑائی میں نے بھی


    ۔۔۔۔
    مگر نہیں ! یہاں تو کوئی انفرینڈ کا بٹن ہی نہیں ہے۔ ہاں ایک بٹن ہے اور کہتا ہے کہ دوستی کی درخواست بھیجو! یا حیرت!

    ہم سے نہیں رشتہ بھی، ہم سے نہیں ملتا بھی
    ہے پاس وہ بیٹھا بھی، دھوکہ ہو تو ایسا ہو

    ابن انشاء

    لیجے ایک نئی کشمکش! ہم تو ترکِ دوستی کو تُلے بیٹھے تھے، لیکن کون سا دوست؟ کہاں کا دوست؟ یہاں کوئی دوست ہے ہی نہیں کہ جس سے ترک دوستی کی جائے۔ کہ جس پر تین حرف بھیجے جا سکیں۔ صد حیف کہ دل کے تپتے صحرا کو اوس کے تین قطرے بھی نصیب نہیں!

    دیکھیں اب کہ امتحان میں سُرخ رو ہوتا ہے کون
    وہ بھی کچھ سوچے ہوئے ہیں، ہم بھی کچھ ٹھانے ہوئے

    کلیم عاجز

    ماؤس کرسر ایک وحشت لئے اسکرین پر اِدھر سے اُدھر غزالِ دشت کی مانند بھٹک رہا ہے۔ کسی کل چین نہیں پڑتا ۔ ایک بٹن واپسی کا بھی ہے لیکن وہ شاید ڈس ایبل ہے یا کرسر وہاں پہنچنا ہی نہیں جانتا۔

    کسی کے ہاتھ کا نکلا ہوا وہ تیر ہوں میں
    حدف کو چھو نہ سکا اور کمان سے بھی گیا

    شاہد کبیر

    اک کشمکش ہے۔ کہیں اندر سے صدا آتی ہے کہ اب جا۔ دفع ہو جا۔ آیا تھا ترکِ دوستی کرنے۔ جو تیرا دوست کبھی تھا ہی نہیں اُس سے کیا ترک راہ و رسم کرے گا۔ ہے کوئی عقل تجھے۔ لیکن ماؤس کرسر، ماؤس کرسر ہے کہ دیوانوں کی طرح ایک نیلے بٹن کا طواف کر رہا ہے اور نیلا بٹن اُسے اپنے مرکز کی سمت کھینچ رہا ہے۔

    دائرے اِنکار کے، اِقرار کی سرگوشیاں
    یہ اگر ٹوٹیں کبھی تو فاصلہ رہ جائے گا

    افتخار امام صدیقی

    ارے ! ارے یہ کیا! ماؤس کا تیر نیلے بٹن کے بیچوں بیچ پہنچ گیا ہے، وہی نیلا بٹن جو کہتا ہے کہ دوستی کی درخواست بھیجو۔ دوستی کی درخواست! اس ناہنجار دنیا کو۔ جو کسی اور کا ہونے دے، نہ اپنا رکھے۔ نہیں! میں تو ترکِ دنیا کا ارادہ کرکے یہاں پہنچا تھا۔ پھر میں دوستی کی درخواست کیونکر بھیجنے لگا۔ آخر کیوں!

    نہ جانےیہ کیسی کشش تھی جو میری نحیف انگلی کو خود رفتہ کر گئی۔ میں! میں دوستی کی درخواست بھیج چکا تھا۔ اُسی دنیا کو کہ جس سے جان چھڑانے آیا تھا۔ وہی دنیا جس پر تین حروف بھیجنے تھے۔ آنسوؤں کے دو تین تپتے قطرے میرے صحرا ایسے سینے پر گرے اور صحرا یکایک بادِ صر صر کی زد میں آکر آگ بگولہ ہو گیا۔ وائے حسرت!!!

    دنیا جسے کہتے ہیں جادو کا کھلونا ہے
    مل جائے تو مٹی ہے، کھو جائے تو سونا ہے

    ندا فاضلی
     
    • زبردست زبردست × 13
    • پسندیدہ پسندیدہ × 6
  2. یاز

    یاز محفلین

    مراسلے:
    18,114
    جھنڈا:
    Pakistan
    موڈ:
    Confused
    بہت خوب جناب۔
     
    • دوستانہ دوستانہ × 1
    • متفق متفق × 1
  3. محمد تابش صدیقی

    محمد تابش صدیقی منتظم

    مراسلے:
    25,531
    جھنڈا:
    Pakistan
    موڈ:
    Breezy
    لاجواب۔
    اس انشائیہ کا تاثر تو شاعری کو مات دے رہا ہے۔ جی تو چاہ رہا تھا کہ شاعری کے زمرہ میں منتقل کر دوں۔ :)
     
    • پسندیدہ پسندیدہ × 1
    • دوستانہ دوستانہ × 1
    • متفق متفق × 1
  4. سین خے

    سین خے محفلین

    مراسلے:
    2,329
    جھنڈا:
    Pakistan
    موڈ:
    Cheerful
    بہت خوب :)
     
    • دوستانہ دوستانہ × 1
  5. ظہیراحمدظہیر

    ظہیراحمدظہیر محفلین

    مراسلے:
    3,506
    جھنڈا:
    Pakistan
    موڈ:
    Busy
    کیا نثرِ لطیف ہے !
    بہت خوب احمد بھائی !
    اختصار و اجمال اس تحریر کی جان ہے ! شاید ہی کوئی بھرتی کا جملہ ہو۔ واہ ! کمال! بہت لطف آیا پڑھ کر !
     
    • متفق متفق × 2
    • دوستانہ دوستانہ × 1
  6. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت شکریہ تابش بھائی!

    اچھے شاعروں کی اچھی شاعری کا کمال ہے۔ :)
     
    • دوستانہ دوستانہ × 1
  7. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت نوازش!

    حوصلہ افزائی کے لئے ممنون ہوں۔ :)
     
  8. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت شکریہ!

    جیتی رہیے۔ :)
     
    • دوستانہ دوستانہ × 1
  9. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت بہت نوازش ظہیر بھائی!

    حوصلہ افزائی کے لئے ممنون ہوں۔ :)
     
  10. نمرہ

    نمرہ محفلین

    مراسلے:
    602
    جھنڈا:
    Pakistan
    موڈ:
    Paranoid
    خوبصورت تحریر ہے۔ خورشید رضوی کا شعر یاد آ گیا :

    ہم کہ اپنی راہ کا پتھر سمجھتے ہیں اسے
    ہم سے جانے کس لیے دنیا نہ ٹھکرائی گئی
     
    • پسندیدہ پسندیدہ × 2
  11. با ادب

    با ادب محفلین

    مراسلے:
    711
    جھنڈا:
    Pakistan
    موڈ:
    Persnickety
    بہترین اور لاجواب
     
    • پسندیدہ پسندیدہ × 1
  12. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت شکریہ!

    اور خوبصورت شعر شریک کرنے کا بھی بہت شکریہ۔
     
    • پسندیدہ پسندیدہ × 1
  13. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت شکریہ!

    جیتی رہیے آپی۔۔۔! :)
     
    • پسندیدہ پسندیدہ × 1
  14. عبد الرحمن

    عبد الرحمن لائبریرین

    مراسلے:
    1,983
    جھنڈا:
    Pakistan
    موڈ:
    Pensive
    ہمیشہ کی طرح لا جواب تحریر احمد بھائی! اور اشعار کے انتخاب نے کہانی کو جا بجا مختلف رنگوں سے مزین کردیا ہے۔

    ویسے آپ کے افسانے عامر خان کی فلموں کی طرح ہیں۔ سال میں ایک مرتبہ آتے ہیں اور سابقہ سارے ریکارڈ توڑ دیتے ہیں۔ :) :)
     
    • پسندیدہ پسندیدہ × 2
  15. شکیب

    شکیب محفلین

    مراسلے:
    1,798
    جھنڈا:
    India
    موڈ:
    Breezy
    کیا خوب علامات اور اشارے استعمال کیے ہیں، زبردست احمد بھائی!
     
    • پسندیدہ پسندیدہ × 1
  16. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    واہ واہ!

    اسی قسم کی داد تو چاہیے تھی ہمیں! دل خوش ہو گیا۔ :)

    تفنن برطرف ! آپ کی ذرہ نوازی کا بے حد شکریہ!
     
    • دوستانہ دوستانہ × 1
  17. محمداحمد

    محمداحمد لائبریرین

    مراسلے:
    22,600
    جھنڈا:
    Pakistan
    موڈ:
    Amazed
    بہت شکریہ شکیب بھائی!
     
  18. آوازِ دوست

    آوازِ دوست محفلین

    مراسلے:
    1,906
    جھنڈا:
    Pakistan
    موڈ:
    Relaxed
    سبحان اللّہ !!! احمد بھائی۔ کیا خوب لکھا ہے۔
     
    • دوستانہ دوستانہ × 1
    • متفق متفق × 1
  19. نایاب

    نایاب لائبریرین

    مراسلے:
    13,421
    جھنڈا:
    Pakistan
    موڈ:
    Goofy
    واہہہ
    بہت خوب
    آخر انفرینڈ کرنے کا بٹن بھی مل ہی گیا نا ؟
    بہت سی دعاؤں بھری داد
    بہت دعائیں
     
    • دوستانہ دوستانہ × 1
  20. عبد الرحمن

    عبد الرحمن لائبریرین

    مراسلے:
    1,983
    جھنڈا:
    Pakistan
    موڈ:
    Pensive
    پہلے بتاتے نا ایسی شاباشی سے پھولے نہیں سماتے۔ چلیں آئندہ خیال رکھوں گا۔ :)

    ویسے مذاق برطرف، حقیقت میں آپ کی تحاریر کا لفظ لفظ انفرادیت سے بھرپور ہے۔
     
    • دوستانہ دوستانہ × 1

اس صفحے کی تشہیر