تنہا

[شمشاد]

یہ راستہ تو ہے تنہائیوں کا اب لیکن
نہ جانے کون مرے ساتھ ساتھ چلتا ہے
(نزہت عباسی)

 

[شمشاد]

محبت میں تو‌ خوشبو ہے ، ہمیشہ ساتھ چلتی ہے
کوئی انسان تنہائی میں بھی ، تنہا نہیں رہتا

 

[نوید صادق]

اب صلح کر بھی لیں محب تنہائیوں سے وحشتیں
وہ میرا سایہ ہی سہی اک شے نظر آئی تو ہے

شاعر: محب عارفی

 

[شمشاد]

بعد یک عمر کہیں تم کو جو تنہا پایا
ڈرتے ڈرتے ہی کچھ احوال سنایا ہم نے

 

[راجہ صاحب]

دیارِ غیر میں اب دور تک تنہائی ہے
یہ اجنبی در و دیوار کچھ تو بولیں آج

 

[شمشاد]

ہم نے تو دل میں بسائے تیری یادوں کے نگر
تو نے لیکن شہر میں یادوں کو تنہا کر دیا
(نزھت عباسی)

 

[ہما]

ایک محفل میں‌کئی محفلیں ہوتی ہیں شریک
جسکو بھی پاس سے دیکھو گے تنہا ہو گا ​

 

[راجہ صاحب]

گاڑی میں ہوں تنہا محو سفر اور نیند نہیں ہے آنکھوں میں
بھولے بسرے ارمانوں کے خوابوں کی زمیں ہے آنکھوں میں

 

[پاکستانی]

سینکڑوں رنج و الم، درد و مصیبت، شب غم
کتنی ہنگامہ طلب ہے میری تنہائی بھی۔۔۔۔!

 

[راجہ صاحب]

وہ پھر سماج نے دو پیار کرنے والوں کو
سزا کے طور پر بخشی طویل تنہائی

 

[شمشاد]

اجنبی شہر کے اجنبی راستے، میری تنہائی پر مسکراتے رہے
میں بہت دیر تک یونہی چلتا رہا ، تم بہت دیر تک یاد آتے رہے
(راہی معصوم رضا)

 

[راجہ صاحب]

تیرے قصے میری باتیں اشکوں کی پیہم برساتیں
ہجر کی تنہا کالی راتیں، یہ میرا انجام ہوا

سرور

 

[شمشاد]

عکس تو موجود تھا پر عکس تنہائی کا تھا
آئینہ تو تھا مگر اس میں تیرا چہرا نہ تھا
(عدیم ہاشمی)

 

[راجہ صاحب]

خدا معلوم کیوں، جس دل میں تم ہو
وہ تنہا رہ کے بھی تنہا نہیں ہے

سرور عالم راز سرور

 

[شمشاد]

باغِ ارم میں تنہا تھے ہم اپنی فکر و فہم کے ساتھ
آنچل جب کوئی لہرایا ساری کہانی ختم ہوئی
(سعد اللہ شاہ)

 

[راجہ صاحب]

تم نے تو تھک کے دشت میں خیمے لگا لئے
تنہا کٹے کسی کا سفر، تم کو اس سے کیا

پروین شاکر

 

[شمشاد]

اِس کا سوچا بھی نہ تھا اب کے جو تنہا گزری
وہ قیامت ہی غنیمت تھی جو یکجا گزری
(احمد فراز)

 

[راجہ صاحب]

یہاں بھی ہو گئے اغیار انجمن آراء
میں اپنے دل کی بھری محفلوں میں تنہا ہوں

 

[شمشاد]

کون ہوتا ہے کسی کا شبِ تنہائی میں
غمِ فرقت ہی غمِ عشق کو بہلائے گا
(احمد راہی)

 

[راجہ صاحب]

زندگی شاید اسی کا نام ہے
دوریاں، مجبوریاں، تنہائیاں