مصطفیٰ زیدی تری تلاش میں ہر رہنما سے باتیں کیں ۔ مصطفیٰ زیدی

[فرخ منظور]

تری تلاش میں ہر رہنما سے باتیں کیں
خلا سے ربط بڑھایا ہوا سے باتیں کیں

کبھی ستاروں نے بھیجا ہمیں کوئی پیغام
تو مدّتوں میں کسی آشنا سے باتیں کیں

ہماری خیر مناؤ کہ آج خود اُس نے
بڑے خلوص، بڑی التجا سے باتیں کیں

گناہ گار تو رمزِ حریم تک پہنچے
ثواب والوں نے بانگِ درا سے باتیں کیں

بہت سے وہ تھے جنہوں نے بتوں سے فیض اٹھائے
بہت سے وہ تھے جنہوں نے خدا سے باتیں کیں

نہ جانے کب سے سناتے تھے اس کو ہم احوال
نظر اٹھائی تو پھر ابتدا سے باتیں کیں

ہزار شعر کہے یوں تو کہنے والوں نے
کسی کسی نے دلِ مبتلا سے باتیں کیں

(مصطفیٰ زیدی از موج مری صدف صدف)
​

 

[بے الف اذان]

واہ ! بے حد خوبصورت غزل ۔ ۔ ۔