اس بات سے کچھ متفق اور کچھ غیر متفق ہوں۔ یاد رہے کہ ہمارا ازلی دشمن مکار ہے، موقع ملنے پر ضرب لگانے سے کبھی نہیں چُوکے گا۔ پراکسی کبھی ختم نا ہونے والی چیز ہے، بس اس پراکسی میں سے ’مقامی اثاثوں‘ کو ’غیر مقامی اثاثوں‘ سے بدلنے کی ضرورت ہے۔ دو سال قبل اپنی ہی لکھی ایک پوسٹ کا اقتباس دے رہا ہوں۔
مزید یہ کہ آپ کے الفاظ یہ بھی ہیں، "
زمانہ امن ہو تو عقلمند وہی ہوتا ہے جو دشمن کو اس کے اپنے ہی گھر میں انگیج کر کے رکھے۔ اور اس کی مثال آج سے پندرہ سال پہلے اور ابھی تک کے پاکستان سے زیادہ کیا دی جا سکتی ہے۔"
--------------------------------------------------------------------------------------------------------------
ہندوستان نے یہ جو بیانیہ اختیار کیا ہے، اس میں فقط یہی جھول ہے کہ اگر کشمیری بذاتِ خود ہتھیار اٹھا لیتے ہیں تو اُس کے لیے یہ بات دردِ سر بن جاتی ہے تاہم اس کا کیا علاج کہ کشمیر میں ہتھیار اٹھانے والوں کا لنک ہندوستان پاکستان سے جوڑ دیتا ہے۔ ہماری دانست میں کشمیر میں جنگِ آزادی کے حوالے سے کوئی فطری اٹھان موجود نہیں ہے۔ کشمیریوں کی اکثریت پاکستان اور ہندوستان کے ساتھ شامل ہونے کے حوالے سے خود تذبذب کا شکار ہے۔ وہاں، آزادی کے لیے ایک ایسی تحریک سامنے نہیں آ رہی ہے جو کہ ہندوستان کو ہلا کر رکھ دے۔ ہندوستان کا خیال ہے کہ اگر پاکستان کشمیر میں مداخلت نہ کرے تو وہاں کے معاملات ہندوستان بخوبی چلا سکتا ہے۔ امر واقعہ یہ ہے کہ کشمیری ہندوستان کے لیے نرم گوشہ نہیں رکھتے ہیں تاہم وہ بوجوہ لڑنے جھگڑنے میں بھی دلچسپی نہیں رکھتے ہیں۔ اس طرح تو یہ معاملہ معلق رہے گا۔ بہتر ہو گا کہ ہندوستان اور پاکستان پراکسی وار سے ہٹ کر اب سنجیدگی سے دوستانہ تعلقات کے لیے قیام کے لیے کوششیں کریں۔یہاں یہ بات کرنا بہت ضروری ہے کہ مودی کے اندر وژن کا شدید فقدان ہے اور وہ ہندوستان کا ایک بدترین ترجمان ہے۔ جو سچ پوچھیں تو دراصل واجپائی اور مودی میں بہت فرق ہے اور اب تو ہمیں بھی واجپائی کی قدر محسوس ہو رہی ہے کہ پچھلی صدی کے آخر میں جو کچھ پاک و ہند کی سیاسی قوتیں کرنے جا رہی تھیں، وہ ناقابل یقین اور قریب قریب معجزانہ پیش رفت تھی۔ تاریخ میں ایسے مواقع بار بار نہیں آیا کرتے تاہم اس کا کیا کریں کہ ہمیں کارگل مچانے کا بہت شوق تھا۔ جب اس طرح کے مس ایڈونچر ہوتے ہیں تو پھر اس کے نتائج بھی بھگتنا پڑتے ہیں۔ اب ہم ہندوستان کو کیا انگیج کریں گے کہ ان کا بیانیہ پوری دنیا میں شد و مد سے دہرایا جا رہا ہے۔اس دور میں بات تو محض پرسیپشن کی ہوتی ہے؛ اس جنگ میں ہمیں ناکامی کا سامنا ہے۔ ہم بے سمتی کا شکار ہیں اور بدقسمتی سے حالات و واقعات ہمارے رخ کا تعین کر رہے ہیں۔
