فن لینڈ سے نکلے اب دو ہفتے ہو چکے تھے۔ آج اس ٹرپ کا آخری دن تھا۔صبح سویرے بیدار ہونے اور ناشتہ کرنے کے بعد واپسی کی تیاری میں مصروف ہو گئے۔ کھڑکیوں سے آتی ہوئی تازہ ہوا بہت خوش گوار احساس دے رہی تھی، سر سبز و شاداب باغات آنکھوں کو جلاوت اور روح کو طراوت بخش رہے تھے۔ کھڑکی سے نیچے باغات میں پھل توڑ کر اکٹھا کرتے ہوئے کریسٹا اور اس کے شوہر کی گفتگو بھی کبھی کبھی سنائی دے دیتی۔ تمام سامان باندھا جا چکا تھا۔کریسٹا نے بہت زیادہ تاکید کی تھی کہ جانے سے پہلے اس سے ضرور مل کر جائیں۔ سامان گاڑی میں رکھنے کے بعد ہم نزدیکی باغ میں چلے گئے جہاں کریسٹا موجود تھی۔
ہم نے جیسے ہی اسے بتایا کہ ہم رختِ سفر باندھ چکے ہیں تو اس نے فورا اپنے شوہر ڈیوڈ اور بیٹے مائیکل کو آواز دی۔ ڈیوڈ لکڑی کا ایک بہت بڑا کریٹ اپنے گلے میں لٹکائے آلو بخارے توڑنے میں مصروف تھا اور مائیکل گھر کے صحن میں لکڑیوں کے ساتھ بر سرِ پیکار تھا۔۔دونوں سے ہلکی پھلکی گفتگو ہوئی اور انہوں نے اجازت چاہی۔ کریسٹا نے ہمارے لیے آج بھی تازہ آلو بخارے توڑ رکھے تھے، جسے اس نے گاڑی میں رکھوا دیا اور ہم سب کو ساتھ لیکر حسن اور سارہ کے ساتھ کیا ہوا ایک وعدہ پورا کرنے چل دی۔ ان لوگوں نے ہرن پال رکھے تھے جو کہ جنگل سے متصل ایک وسیع فارم میں موجود تھے۔ کریسٹا نے بچوں سے وعدہ کیا تھا کہ جانے سے پہلے ہرن ضرور دکھائے گی۔
فارم میں موجود ہرن
