برائے اصلاح - ہجر کے لمحے محبت کی سزا بن کر ملے

[فلسفی]

سر الف عین اور دیگر احباب سے اصلاح کی گذارش ہے۔

ہجر کے لمحے محبت کی سزا بن کر ملے
جس طرح آنسو ہمیں غم کی دوا بن کر ملے

ملحدوں جیسا نہ ہو کیوں اُس موحد کا مزاج؟
جس کو ہر انسان دنیا میں خدا بن کر ملے

اُنؓ کی عظمت پر ملائک رشک کرتے ہیں جنھیں
دولَت ایماں محمدؐ کی دعا بن کر ملے

آئینے میں عکس اپنا دیکھ کر دل نے کہا
اجنبی کیسے کسی سے آشنا بن کر ملے

اس گھڑی قربت کے لمحے یاد کر لینا ذرا
جب ہمارے بیچ رنجش فاصلہ بن کر ملے

روشنی کیسے چراغِ آرزو کی ہو وہاں
یاس کا سایا جہاں پر حادثہ بن کر ملے

نسبتیں محبوبؐ کے قدموں سے جس کو مل گئیں
اس چمن کے خار بھی پھر خوشنما بن کر ملے

ہاتھ میں سگریٹ پکڑائی جنھوں نے فلسفیؔ
وہ پرانے دوست بھی اب پارسا بن کر ملے​

 

[عدیل عبد الباسط]

زبردست جناب! بہت ہی عمدہ.

 

[عدیل عبد الباسط]

ملحدوں جیسا نہ ہو کیوں اُس موحد کا مزاج؟
جس کو ہر انسان دنیا میں خدا بن کر ملے​

بہت افسوس ناک حقیقت کا اظہار بہت سادہ مگر انتہائی جاندار انداز میں کیا ہے.
کاش! لوگوں کی رسائی ان انسان بن کر رہنے والے انسانوں تک بھی ہو جائے، جو گوشہ نشینی کی زندگیاں گزار رہے ہیں. جن کے دم قدم میں کارخانۂ عالم کی بقا کا راز مضمر ہے.

 

[عدیل عبد الباسط]

ہجر کے لمحے محبت کی سزا بن کر ملے
جس طرح آنسو ہمیں غم کی دوا بن کر ملے​

لڑی کے عنوان کے احترام میں ایک گزارش بھی کرتا چلوں.
"طرح" کی "ر" میرے خیال میں ساکن ہے. اگر میرا خیال درست ہے تو وزن کی صحت خطرے میں ہے. اس کی بحالی پر غور کیا جا سکتا ہے.
"فاصلہ" اور "حادثہ" کی دیگر قافیوں سے مماثلت بھی زیر بحث لائی جا سکتی ہے.

 

[ارشد چوہدری]

حسبِ روایت بہت خوبصورت----حادثہ--فاصلہ صوتی لحاظ سے ٹھیک ہیں اور استاد شعرا نے ایسے قافیے استمال کئے ہیں

 

[الف عین]

مجھے تو کوئی غلطی نظر نہیں آئی، سوائے اس شک کے
جس کو ہر انسان دنیا میں خدا بن کر ملے
شاید 'جس سے' محاورہ درست ہو گا، لیکن تنافر بھی پیدا ہو جائے گا

 

[فلسفی]

مجھے تو کوئی غلطی نظر نہیں آئی، سوائے اس شک کے
جس کو ہر انسان دنیا میں خدا بن کر ملے
شاید 'جس سے' محاورہ درست ہو گا، لیکن تنافر بھی پیدا ہو جائے گا

بہت شکریہ سر، "جس کو" بھی ہمارے ہاں تو بولا جاتا ہے۔ ممکن ہے جیسا آپ نے فرمایا کہ محاورتا درست نہیں۔ محاورے کی غلطی سے بہتر ہے کہ تنافر کو قبول کر لیا جائے۔ "جس سے" ہی کردیتا ہوں۔

 

[محمد تابش صدیقی]

لڑی کے عنوان کے احترام میں ایک گزارش بھی کرتا چلوں.
"طرح" کی "ر" میرے خیال میں ساکن ہے. اگر میرا خیال درست ہے تو وزن کی صحت خطرے میں ہے. اس کی بحالی پر غور کیا جا سکتا ہے.
"فاصلہ" اور "حادثہ" کی دیگر قافیوں سے مماثلت بھی زیر بحث لائی جا سکتی ہے.

طرح کے دونوں اوزان مستعمل ہیں
ہ پر ختم ہونے والے ایسے الفاظ جن کی اختتامی آواز الف کی ہو، وہ الف کے ساتھ قافیہ کے طور پر لائے جا سکتے ہیں۔

 

[محمد تابش صدیقی]

بہت خوب عظیم بھائی

 

[عدیل عبد الباسط]

طرح کے دونوں اوزان مستعمل ہیں
ہ پر ختم ہونے والے ایسے الفاظ جن کی اختتامی آواز الف کی ہو، وہ الف کے ساتھ قافیہ کے طور پر لائے جا سکتے ہیں۔

گزارش برائے تحقیق۔۔۔ ’’طرح‘‘ میں ر پر زبر کی کوئی مثال استاد شعراء کے کلام سے مل سکے تو مزید اطمینان کا باعث ہو گی۔

 

[محمد تابش صدیقی]

گزارش برائے تحقیق۔۔۔ ’’طرح‘‘ میں ر پر زبر کی کوئی مثال استاد شعراء کے کلام سے مل سکے تو مزید اطمینان کا باعث ہو گی۔

چھوڑا مہِ نخشب کی طرح دستِ قضا نے
خورشید ہنوز اس کے برابر نہ ہوا تھا
غالبؔ

 

[محمد تابش صدیقی]

کھلے گا کس طرح مضموں مرے مکتوب کا یا رب
قسم کھائی ہے اس کافر نے کاغذ کے جلانے کی
غالبؔ

 

[محمد تابش صدیقی]

پوجے سے اور پتھر ہوتے ہیں یہ صنم تو
اب کس طرح اطاعت ان کی کروں خدایا
میرؔ