فانی ::::اُن کی کسی ادا پہ جفا کا گماں نہیں -- Fani Badayuni

طارق شاہ

محفلین


غزلِ
iz3h.jpg

شوکت علی خاں فانی بدایونی


اُن کی کسی ادا پہ جفا کا گماں نہیں
شوخی ہے جو بسلسلۂ امتحاں نہیں

دیکھا نہیں وہ جلوہ جو دیکھا ہُوا سا ہے
اِس طرح وہ عیاں ہیں، کہ گویا عیاں نہیں

نا مہربانیوں کا گِلہ تم سے کیا کریں !
ہم بھی کچھ اپنے حال پہ اب مہرباں نہیں

اب تک لگاوٹیں ہی سہی، لاگ تو نہیں
یہ کیا ہُوا، کہ مجھ سے وہ اب بدگماں نہیں

بربادِ صد بہار ہُوں، میری نگاہ میں!
جو آشنائے برق نہیں، آشیاں نہیں

ساری ہے دردِ دل مِری رگ رگ میں چارہ ساز
کیا پُوچھتا ہے درد کہاں ہے، کہاں نہیں

کل تک زبانِ خلق پہ ہوگی وہ داستاں
اب تک مِری زبان پہ، جو داستاں نہیں

تیرا کرم کہ تُو نے، وہ دل کو عطا کیا
جو غم، بقدرِ حوصلۂ آسماں نہیں

بجلی کہیں گِری ہو، مگر ہم قفس مجھے
ڈر ہے ، کہ اب کسی نے کہا، آشیاں نہیں

فانی، کوئی غم اور اُٹھائے ہوئے ہے کیا
دل پر ہنوز، بارِ محبّت گِراں نہیں

فانی بدایونی



 

صائمہ شاہ

محفلین
بہت خوب

نا مہربانیوں کا گِلہ تم سے کیا کریں !
ہم بھی کچھ اپنے حال پہ اب مہرباں نہیں

اب تک لگاوٹیں ہی سہی، لاگ تو نہیں
یہ کیا ہُوا، کہ مجھ سے وہ اب بدگماں نہیں
 
Top