اندھی آنکھوں والا راجہ گدھ مورے گھر آوے گا

[فاروق درویش]

اندھی آنکھوں والا راجہ گدھ مورے گھر آوے گا
زندہ لاشے بھوکے بچے دیکھ نہیں کچھ پاوے گا

کربل جیسی دھرتی موری دشت بنا ہے دیس مورا
پنگھٹ پر ہے شمر کا پہرہ پانی کون پلاوے گا

موم کی چھتری اوڑھے نکلے جگنو تپتے صحرا میں
دھوپ میں قتل ھوئے جو جگنو کون کسے دکھلاوے گا

آج مری مزدور کی چھوری داج ملا نہ دیگ پکی
راج محل کا راجہ پی کر رادھا خوب نچاوے گا

سرد رتوں کا چندا کاھے پریت کی جوت جگاوے ھے
سینے میں جو آگ بھری ھے دیکھے گا ڈر جاوے گا

لاکھوں رنگ سمیٹے دل میں کیا تصویر بناوے تو
مٹی کا باوا ھے مورکھ مٹی میں مل جاوے گا

دل کا دکھڑا لے بیٹھا درویش سجن کی محفل میں
جس نے من کی بات کہی یاں پگلے وہ پچھتاوے گا


فاروق درویش

 

[مغزل]

آپ کا کلام باصرہ نواز ہوا قبلہ رسید حاضر ہے ۔ انشا اللہ بشرطِ فرصت حاضر ہو کر اپنی مقدور بھر رائے سے آگاہ کروں گا۔ والسلام

 

[فاروق درویش]

برادر محترم م۔ م۔ مغل صاحب آپکی ناقدانہ رائے میرے لئے کسی عالم ِ سخن کی اصلاح سے کم تر نہیں ، اسی بہانے سیکھنے سکھانے کا عمل جاری رہنا چاہئے ۔۔۔۔۔۔۔۔۔ برادر کیا یہ مصرع درست ہو گا ۔۔۔۔۔۔۔۔۔۔۔۔۔۔ پنگھٹ پر ھے راج شمر کا پانی کون پلاوے گا ،، میرے مطابق ،، شمر،، فعل ھے ۔۔۔۔۔۔سو میں نے اسے ،، پنگھٹ پر ھے شمر کا پہرہ پانی کون پلاوے گا ۔،، میں تبدیل کر دیا ھے ۔۔۔۔۔ آپ کی رائے اور سینئر احباب کے تنقیدی کلمات کا منتظر رھوں گا

 

[الف عین]

اچھی غزل ہے فاروق اور پھر وہی بات کہوں گا کہ ماشاء اللہ آپ کا لب و لہجہ دور سے پہچانا جاتا ہے۔ آج کل ایسی ترقی پسندی کہاں دیکھنے کو ملتی ہے!!
شمر کا تلفظ درست باندھا گیا ہے۔ اگر ’پنگھٹ پر ھے راج شمر کا‘ ہوتا تو میں کہتا کہ شمر کا تلفظ غلط باندھا گیا ہے۔

 

[فاروق درویش]

جزاک اللہ برادر محترم عبید صاحب ۔۔۔۔۔۔۔۔۔۔۔۔۔ممنون ہوں آپ کی محبتوں ، حوصلہ افزائی اور شفقت کیلئے ۔۔۔۔۔۔۔۔۔۔۔۔۔ آپ جیسے صاحب ِ علم و سخن کی پسندیدگی مجھ مبتدی فقیر کیلئے کسی سند اور بیش بہا انعام سے کم ھر گز نہیں ۔۔۔۔۔۔۔ آپ کے دم سے ہی محفل کی رونقیں ہیں۔۔۔۔ دل سے دعا گو ہوں کہ آپ سدا سلامت رہیں، سدا آباد و خوش مراد رہیں اور مولائے کریم آپ کا دست ِ شفقت ہم سب پر سدا سلامت رکھے ۔۔۔۔۔۔۔۔۔۔۔۔۔۔۔۔ الہی اآمین

 

[ابن سعید]

اب جا کر اسے پڑھ کر سر دھننے کا موقع ملا ہے۔

 

[فاروق درویش]

جگ جگ جئیں برادر سعود ابن ِ سعید صاحب ۔۔۔۔۔۔۔۔۔۔۔۔ سدا خوش آباد

 

[مغزل]

فاردق درویش صاحب میں ماتراؤں کا علم نہیں کچھ زیادہ نہیں جانتا۔۔ لیکن مغل ہونے کے ناتے کچھ گا بجا کے محسوس کرسکتا ہوں۔
خارجی عوامل کا رخ جب داخل کا حصہ بننے کو سفر کرتا ہے تو خارج اور داخل کے توازن سے شعر گوئی ایک کڑا عذاب ہوتا ہے۔۔
بعضے لوگوں کے نزدیک یہ ٹھٹھول یا محض پُر گوئی پر دال کرتا ہے مگر اپنے جلے بغیر جہنم کا ذائقہ کون پاسکتا ہے۔ پھر مزید یہ کہ
لہجے میں تند و تیزی کے باوجود اقدار و روایات کے ساتھ کیف و انجذاب کو سرمستی کی حالت میں لطیف واسطے سے کثیف واسطے یعنی
قرطاس تک کے منتقل کرنے کے عمل میں کتنی ہی کیفیات اور جذبات سے محرومی کہیں جا کر خلّاقی کے دائروں میں رقص کرتی ہے۔
گیت کے مٹھاس بھرے لہجے میں غزل کی ہیت کے اہتمام کے ساتھ شہر آشوب کو آپ نے جس توازن سے بیان کیا ہے یہ محض اور
محض وارداتِ قلبی پر منتج ہے ، متذکرہ غزل کے ہر ہر مصرعے پر ہدیہ ِ تحسین قبول کیجے ، شمر اور شمَر کا معاملہ تو بخوبی نمٹ چکا ہے ۔
ہر شعر اپنی حیثیت میں غزل کا دائرہ پورا کرتا ہے۔۔ سو ہر شعر کو مقتبس کرنے سے پہلو برتتے ہوئے میں صرف ایک شعر پر اپنے
قلم کو رکنے کا حکم دوں کہ :
موم کی چھتری اوڑھے نکلے جگنو تپتے صحرا میں
دھوپ میں قتل ھوئے جو جگنو کون کسے دکھلاوے گا
میرے نزدیک حاصل ِ کلام ہے اور ایسا مصرع ایسا شعرلکھنا کم کم لوگوں کو ہی نصیب ہوتا ہے ۔ سو میری جانب سے مکمل غزل سمیت
مندرجہ بالا شعر پر صمیمِ قلب سے مبارکباد ، گر قبول افتد زہے عز و شرف۔
مالک و مولیٰ حرمتَ قلم اور اقلیمِ سخن میں بیش بہا اضافہ فرمائے آمین ۔

 

[محمد وارث]

خوب غزل ہے جناب فاروق صاحب۔

 

[فاروق درویش]

محترم م۔ م۔ مغل صاحب آپ کی تحریر پڑھ کر میں کچھ بھی نہیں کہہ سکوں گا سوائے اس کے یوں لگتا ھے کہ گویا دشت ِ بلا کے کسی غزال کا نافہ پھٹ پڑا ھو اور اس کی مسحور کن خوشبو سے چار سو بیاباں معطر ھو گئے ھوں یا مغلیہ مسند نشینوں کا کوئی لکھنوی اتالیق محو گفتگو ہو اور دل چاھے کہ خاموش و با ادب سنتے جائیں سر دھنتے جائیں۔۔۔۔۔۔۔۔۔۔ باخدا آپ کی یہ رنگین و مرصع اردو یاد دلاتی ھے مرزا رجب علی بیگ سرور کی ان تحریروں کی جن میں کھو جانے کو دل چاھتا ھے ۔۔۔۔۔۔۔۔۔ وگرنہ آج کے سخن ور تو اس حقیقی اردو اور رنگینی ء زبان سے کوسوں دور ہیں ۔۔۔۔۔ باقی رہ گئی بات اس غزل کی تو یہ آپ کی محبت ھے کہ آپ نے اس بندہ فقیر کی حوصلہ افزائی فرمائی ورنہ کہاں میں اور میری غزل ۔۔۔۔۔۔۔ اور کہاں آپ کے یہ محبت بھرے تعریفی کلمات ۔۔۔۔۔۔۔۔۔ سدا سلامت و آباد ، سدا خوش مرادر رہیں ۔۔۔۔۔۔۔۔۔۔۔

 

[فاروق درویش]

ممنون ھوں برادرم محد وارث صاحب ۔۔۔۔۔۔۔۔۔۔۔۔۔۔۔۔۔۔۔۔۔۔ جگ جگ جئیں ۔۔۔۔۔۔۔۔۔۔۔۔۔۔۔۔۔۔۔۔۔۔ سدا شاد و آباد

 

[سلمان دانش جی]

واہ !!!! استاد گرامی

 

[ایم اے راجا]

واہ واہ بہت خوب

 

[صفی حیدر]

واہ بہت خوب۔۔۔ لاجواب تخلیق ہے۔۔۔۔۔۔۔۔۔

 

[سعیدالرحمن سعید]

کمال ہے استاد جی۔ آپ کا انداز ہی سب سے الگ ہے