منیر نیازی انتخاب از منیر نیازی

[پیاسا صحرا]

کار اصل زیست

کوئی آئے باغ میں اس طرح
کوئی دید جیسے بہار میں
کوئی رنگ دار سحر اڑے
کسی گوشئہ شب تار میں
کوئی یاد اس میں ہو اس طرح
کوئی رنج جیسے خمار میں
کوئی زندگی کسی خواب میں
کوئی کام کوچئہ یار میں​

 

[پیاسا صحرا]

سارے آسمان پر بادل چھائے ہیں

مجھے اپنا گھر بھول گیا ہے
میں گھر سے باہر ضرورت کی کوئی چیز لینے کے لیے نکلا تھا
گھر سے باہر نکلنے کے بعد مجھے اپنا گھر بھول گیاہے
اب میں اسے تلاش کررہا ہوں
اسے کیسے تلاش کروں
اکّا دکّا کوئی درخت ،
کبھی کبھی ، کہیں کہیں کو شناسا چہرہ،
اور دور دراز میں کہیں کوئی مانوس عمارت _______
سمجھ میں نہیں آتا
ایسے نامکمل نشانوں کی معرفت اپنے گھر تک کیسے پہنچوں گا
میرے آس پاس خواب کی کیفیت ہے
اور میرا دل گھر واپس جانے کو چاہتا ہے

 

[پیاسا صحرا]

ایک وعدہ جو مجھ سے کیا گیا ہے

اس کڑی مسافت میں
راہگزار آفت میں
اک طویل نفرت کی
بے کنار عادت میں
بے شمار نسلوں کی
بے وفا وراثت میں
منتظر ہیں میرے بھی
میرے ہم سفر کے بھی
ایک دن مسرت کا
ایک شب محبت کی
اک مقام راحت کا
اک فضا حفاظت کی
اک خیال دائم کا
ایک سوچ ثابت

 

[پیاسا صحرا]

خزاں ایک بہار رنگ موسم ہے

درختوں سے پتے جھڑ رہے ہیں
کبھی ایک کرکے ہوا کے مطابق
کبھی اچانک بے شمار ہوا کے مطابق
خزاں کے بہاروں میں خوب دلکشی ہے
وسوسوں اور وہموں سے بھری ہوئی
اور آوارہ خیالی اور اکساہٹوں سے بھری ہوئی
اور بے شمار خوشیوں سے بھری ہوئی
درختوں سے پتے جھڑ رہے ہیں
کبھی ایک کرکے______

 

[پیاسا صحرا]

بھیروں

ایک ہی سرکی دو شکلیں ہیں
جینے کی بھی مرنے کی بھی
دکھ بھی ہو اس سر کو سن کر
خوشی سی جی کو مرنے کی بھی
ملنے کی بھی گھڑی
بین فراق میں کرنے کی بھی

 

[پیاسا صحرا]

یہ ہمارا گھر
یہ ہمارا گھر ہے ساتھی یا خوشی کا باغ ہے
یہ کئی رشتوں کی باہم دوستی کا باغ ہے
شام جب آتی ہے اپنے گھر کے صحن و بام پر
جگمگا اٹھتا ہے دل قدرت کے اس انعام پر
جیسے یہ آنگن ہمارا روشنی کا باغ ہے
اک جزیرہ سا ہے یہ بحر جہاں کے درمیاں
مسکراہٹ روح کی آہ و فغاں کے درمیاں
وقت کی بے چینیوں میں پر سکوں احساس ہے
اجنبی بستی میں کوئی اپنا جیسے پاس ہے
عمر کے باغ ہر دور میں اک تازگی کا باغ ہے
رات کے آخر پہ صبح زندگی کا باغ ہے

 

[پیاسا صحرا]

کتاب کو بھی خبر ہوتی ہے

اسے کون پڑھ رہا ہے
خراب نظروں سے وہ اپنا اصل باب چھپا جاتی ہے
عورت کو بھی خبر ہوتی ہے
اسے کون دیکھ رہا ہے
خراب نظروں سے وہ اپنا اصل آپ چھپا رہی ہے

 

[پیاسا صحرا]

ملتے جلتے زمانے

شام تھی اور شام کے دوران یہ سب کچھ ہوا
دائیں جانب بیٹھے میرے دوست نے مجھ سے کہا
"بائیں جانب دیکھنا ‘ منظر ہے کیسا دلربا "
گہری ہوتی جارہی اس شام میں اس شہر کے آغاز کا
جا بجا روشن نشانوں سے مزین اک سیہ کہسار سا
میں نے یہ پہلے بھی دیکھا تھا یہی منظر
کہیں پہلے پرانے خواب میں
منزلوں پر منزلیں آبادیوں کی ‘
اور ان میں
جا بجا روشن دیے
میں نے اپنے دوست سے ‘
اس سلسلے میں اور کچھ باتیں نہ کہیں
بس یونہی خاموش بیٹھا
اس پرانے خواب کو تکتا رہا
کتنا چلتے اور
کتنا تھکتے اور
منزل آخر مل ہی جاتی
آس اک رکھتے اور
اس بستی میں جو کچھ دیکھا
دیکھ نہ سکتے اور
ایک بھی خواب جو پورا ہوتا
خواب نہ تکتے اور

 

[پیاسا صحرا]

فجر کے وقت کی اداسی

چاند میرے گھر کی دیوار پر
اس کے آگے جامن کے پتے
اس کے پیچھے اذانوں کی صدائیں
اور وہ کوئٹے جانے والی گاڑی میں
اپنے خیالوں میں کھوئی ہوئی

 

[پیاسا صحرا]

سندری ایک درخت ہے جس پر کوئی طائر نہیں بیٹھتا

سندریاں ہی سندریاں تھیں
سندر بن میں دور تک
ایک بڑے دریاسے لے کر
اک سمت مستور تک
ایک ادا جو میں نے دیکھی
سندریوں کی خاموشی کے
بہت ہرے اسرار میں
جس پر شام اتری تھی جیسے
سیاہی سرخ غبار میں
اک طائر بھی وہاں نہیں تھا
انبوہ اشجار میں
بوندا باندی میں کسی گھنے شجر تلے
زمانے کو بھول کر‘
بیٹھ کر سوچنے کی گھڑی ہے
اور دروازے پر ہورہی دستک کا جواب دینا ہے مجھے

 

[پیاسا صحرا]

بے رنگ زیست میں حسن اتفاقات

کسی نیم باز سے شہر میں
کسی ایسی شکل کو دیکھنا
جسے یاد کرتے تھے ہم کبھی
کبھی خود پرستوں کے درمیاں
کسی محفل شب شہر میں
کسی ایسی شکل کو دیکھنا
جسے دیکھنا تھا ہمیں کبھی
سر صبح ، ابر بہار میں
وہ جھلک سی برق بہار کی
سر بام دامن یار سی
جو میرے خیال میں تھی کہیں
کہیں ایک ایسے مقام پر
جو ہے دور سب کی نگاہ سے
کوئی زخم دل کی پکار ہے
جو سنی نہیں ہے کسی نے بھی

 

[پیاسا صحرا]

کسی سوچے ہوئے کو ملنا نیند میں

نیند میں چلتے ہوئے
شہروں مکانوں اور پہاڑوں اور زمانوں سے گزرکر
وسعت حیراں میں رک کر
اس کو دیکھیں
کیاہے وہ________
دیکھنا، ملنا اسے اور دیر تک ملتے ہی رہنا
نیند میں رک کر اسے
جاگنے سے خوب ہے ملنا اسے
اور ساتھ رہنا نیند میں

 

[الف عین]

یہ کس کتاب سے ٹائپ کر رہے ہیں شاید کچھ نظمیں تو میری ای بکس میں بھی مشترک ہیں۔ ویسے زیادہ تر تو نئی ہیں۔ اگر نئی ای بک بنائی جائے تو اس کا نام بھی تجویز کر دیں۔ ‌

 

[پیاسا صحرا]

یہ کس کتاب سے ٹائپ کر رہے ہیں شاید کچھ نظمیں تو میری ای بکس میں بھی مشترک ہیں۔ ویسے زیادہ تر تو نئی ہیں۔ اگر نئی ای بک بنائی جائے تو اس کا نام بھی تجویز کر دیں۔ ‌

استادِ گرامی یہ سب کلیات سے ٹائپ کر رہا ہوں ۔ باقی اگر کوئی ای بک بنائیں تو نام بھی آپ ہی تجویز کر دیجیے گا۔

 

[پیاسا صحرا]

روشنی

تھکی تھکی گلوں کی بو
بھٹک رہی ہے جو بہ جو

چھلک رہے ہیں چار سو
لبوں کے رس بھرے سبو

ہوا چلی تو چل پریں
کہانیاں سی کو بکو

لب مہ و نجوم پر
رکی رکی سی گفتگو

یہ اک خلائے دم بخود
یہ اک جہان آرزو

گئے دنوں کی روشنی
کہاں ہے تو، کہاں ہے تو

 

[پیاسا صحرا]

باز گشت

یہ صدا
یہ صدائے بازگشت
بیکراں وسعت کی آوارہ پری
سست رو جھیلوں کے پار
نم زدہ پیڑوں کے پھیلے بازوؤں کے آس پاس
ایک غم دیدہ پرند
گیت گاتا ہے مری ویران شاموں کے لیے۔
ٴ

 

[پیاسا صحرا]

برسات

آہ! یہ بارانی رات
مینہ، ہوا، طوفان، رقصِ صاعات
شش جہت پر تیرگی امڈی ہوئی
ایک سناٹے میں گم ہے بزم گاہ حادثات
آسماں پر بادلوں کے قافلے بڑھتے ہوئے
اور مری کھڑکی کے نیچے کانپتے پیڑوں کے ہات
چار سو آوارہ ہیں
بھولے ، بسرے واقعات
جھکڑوں کے شور میں
جانے کتنی دور سے
سن رہا ہوں تیری بات

 

[پیاسا صحرا]

گزر گاہ پر تماشا
کھلی سڑک ویران پڑی تھی
بہت عجیب تھی شام

اونچا قد اور چال نرالی
نظریں خوں آشام

سارے بدن پر مچا ہوا تھا
رنگوں کا کہرام

لال ہونٹ یوں دہک رہے تھے
جیسے لہو کا جام

ایسا غسن تھا اس لڑکی میں
ٹھٹھک گئے سب لوگ

کیسے خوش خوش چلے تھے گھر کو
لگ گیا کیسا روگ

 

[پیاسا صحرا]

ایک خوش باش لڑکی

کبھی چور آنکھوں سے دیکھ لیا
کبھی بے دھیانی کا زہر دیا
کبھی ہونٹوں سے سرگوشی کی
کبھی چال چلی خاموشی کی
جب جانے لگے تو روک لیا
جب بڑھنے لگے تو ٹوک دیا
اور جب بھی کوئی سوال کیا
اس نے ہنس کر ہی ٹال