الف سے اشعار

[سحر کائنات]

آ کہ اب تسلیم کرلیں تو نہیں تو میں سہی
کون مانے گا کہ ہم میں بے وفا کوئی نہیں

 

[سحر کائنات]

ایک مدت سے تیری یاد بھی آئی نہ ہمیں
اور ہم بھول گئے ہوں تجھے ایسا بھی نہیں

 

[سیما علی]

اب نہ وہ سنگِ ملامت ہیں نہ وہ طعنوں کا شور
تیری بستی میں یہ رونق بھی مِرے دَم تک رہی

شمیم جے پوری

 

[سیما علی]

اپنے گھر کی کھڑکی سے میں آسمان کو دیکھوں گا
جس پر تیرا نام لکھا ہے اُس تارے کو ڈھونڈوں گا

تم بھی ہر شب دیا جلا کر پلکوں کی دہلیز پہ رکھنا
میں بھی روز اک خواب تمہارے شہر کی جانب بھیجوں گا

امجد اسلام امجد

 

[سیما علی]

اُجالے اپنی یادوں کے ہمارے ساتھ رہنے دو
نہ جانے کس گلی میں زندگی کی شام ہو جائے

بشیر بدر

 

[شمشاد]

ان دو کے سوا کوئی فلک سے نہ ہوا پار
یا تیر مری آہ کا یا اس کی نظر کا
ولی اللہ محب

 

[سیما علی]

ادب نے دل کے تقاضے اٹھائے ہیں کیا کیا
ہوس نے شوق کے پہلو دبائے ہیں کیا کیا

یگانہ چنگیزی

 

[سیما علی]

آندھیاں رکیں کیوں کر زلزلے تھمیں کیوں کر
کارگاہ فطرت میں پاسبانیٔ رب کیا

 

[شمشاد]

تمہارا دل مرے دل کے برابر ہو نہیں سکتا
وہ شیشہ ہو نہیں سکتا یہ پتھر ہو نہیں سکتا
داغؔ دہلوی

 

[زوجہ اظہر]

ابھی کسی کی رہائش نہیں مرے دل میں
تمھارے بعد مرمت کا کام جاری ہے

 

[شمشاد]

اک طرز تغافل ہے سو وہ ان کو مبارک
اک عرض تمنا ہے سو ہم کرتے رہیں گے
فیض احمد فیض

 

[سیما علی]

اب اک ہجوم شکستہ دلاں ہے ساتھ اپنے
جنہیں کوئی نہ ملا، ہمسفر ہمارے ہوئے

 

[سیما علی]

آگ تھے ابتدائے عشق میں ہم
اب جو ہیں خاک انتہا ہے یہ
میر تقی میر

 

[سیما علی]

اب نہ وہ سنگِ ملامت ہیں نہ وہ طعنوں کا شور
تیری بستی میں یہ رونق بھی مِرے دَم تک رہی

شمیم جے پوری

 

[سیما علی]

اب ہے اپنا سامنا درپیش
ہر کسی سے گزر گیا ہوں میں

جون ایلیا

 

[سیما علی]

ان بتوں کو خدا سے کیا مطلب
توبہ توبہ، خدا خدا کیجیے

 

[سیما علی]

اب کر کے فراموش تو ناشاد کرو گے
پر ہم جو نہ ہوں گے تو بہت یاد کرو گے

میرتقی میر

 

[سیما علی]

آشفتگی نے نقش سویدا کیا درست
ظاہر ہوا کہ داغ کا سرمایہ دود تھا

مرزا غالب

 

[سیما علی]

اُس کے سب جھوٹ بھی سچ ہیں محسن
شرط اتنی ہے کہ، بولے تو سہی

 

[سیما علی]

اچّھی صُورت میں بھی خالق نے بھرا ہے جادُو
اپنے مُشتاق کو ، دِیوانہ بنا دیتی ہے

اکبر الٰہ آبادی