اشعار - حروف تہجی کے لحاظ سے

[گُلِ یاسمیں]

دمک رہا ہے ایک چاند سا جبیں پہ اب تلک
گریزپا محبتوں کا کوئی پل ٹھہر گیا
پروین شاکر

 

[سیما علی]

ڈر تو مجھے کس کا ہے کہ میں کچھ نہیں کہتا
پر حال یہ افشاں ہے کہ میں کچھ نہیں کہتا
(مومن)

 

[سیما علی]

ذرا سی بات پے ہر رسم توڑ آیا تھا
دلِ تباہ نے بھی کیا مزاج پایا تھا
(جان نثار اختر)

 

[سیما علی]

رات جب پھول کے رخسار پہ دھیرے سے جھکی
چاند نے جھکے کے کہا اور ذرا آہستہ

پروین شاکر

 

[سیما علی]

ڑ کو ڑ پڑھتے ہوئے اٹکتی ہے زباں میری
خدایا اب تو کردے مشکل آساں میری

 

[گُلِ یاسمیں]

زمیں کے حلقے سے نکلا تو چاند پچھتایا
کشش بچھانے لگا ہے ہر اگلا سیارہ

پروین شاکر

 

[سیما علی]

زندگی پاؤں نہ دھر جانبِ انجام ابھی
میرے ذمے ہیں ادھورے سے کئی کام ابھی
ابھی تازہ ہے بہت گھاؤ بچھڑ جانے کا
گھیر لیتی ہے تیری یاد سر ِشام ابھی

 

[سیما علی]

ژرف بینی تری لائق تحسین ہے مگر
ژرف تخیل ہمارا بھی ژولیدہ نہیں

 

[سیما علی]

سُلگ رہی ہیں نہ جانے کس آنچ سے آنکھیں
نہ آنسوؤں کی طلب ہے نہ رتجگوں کی جلن

 

[سیما علی]

شعلہ درد بجھے دیر ہوئی ہے لیکن
وہی تابندگی دیدہ تر ہے کہ جو تھی

 

[سیما علی]

صحرا و کوہ سے نہیں اٹھی صدائے درد
وہ قیس و کوہ کن کے ٹھکانے کِدھر گئے
۔۔۔۔۔۔۔۔
اختر شیرانی

 

[سیما علی]

ضو فشاں میرے صنم خانہ افکار میں ہے
لبِ معصوم کوئی ،لعلِ بدخشاں کوئی

 

[سیما علی]

طرزؔ! بہت دن جھیل چکے تم دنیا کی زنجیروں کو
توڑ کے پنجرہ اب تو تمہیں ہے دیس پیا کے جانا جی

 

[سیما علی]

ظلم سہنا بھی ہوا ظلم ہی،اک حد کے بعد
خامشی بھی تو ہوئی پشت پناہی کی طرح

 

[سیما علی]

عشق میں کیا بچائیے، عشق میں کیا لٹائیے
آلِ نبیؐ نے لکھ دیا، سارا نصاب ریت پر

 

[سیما علی]

غرورِ ہستی نے مار‌ڈالاوگرنہ ہم لوگ جی ہی لیتے
کسی کی آنکھ کا نور ہو کر،کس کے دل کا قرار بن کر

 

[سیما علی]

فاصلے ایسے بھی ہوں گے یہ کبھی سوچا نہ تھا
سامنے بیٹھا تھا میرے اور وہ میرا نہ تھا
(عدیم ہاشمی)

 

[سیما علی]

قصے تیری نظر نے سنائے نہ پھر کبھی
ہم نے بھی دل کے داغ دکھائے نہ پھر کبھی
(ناصر کاظمی)

 

[سیما علی]

کہوں کس سے قصۂ درد و غم، کوئی ہمنشیں ہے نہ یار ہے
جو انیس ہے تری یاد ہے، جو شفیق ہے دلِ زار ہے

اکبر الہ آبادی

 

[سیما علی]

گوشہ آنکھوں کے دریچوں میں جو نم سا ہوگا
دِل کی گہرائی میں رِستا ہوا غم سا ہوگا