باذوق
محفلین
بسم اللہ الرحمٰن الرحیم
سید مودودی (رحمہ اللہ) کی معروف کتاب
مسئلہ قومیت
سے کچھ مفید اقتباسات ۔
================
فرمانِ باری تعالیٰ ہے :
الْاَرْضَ لِلّهِ ( ترجمہ : زمین اللہ کی ہے ! )
(سورہ : الاعراف ۔ آیت : ١٢٨)
اللہ تعالیٰ نے نوعِ انسانی کو زمین پر اپنی خلافت سے سرفراز کیا ہے۔ اور یہ قطعی کوئی ضروری نہیں ہے کہ انسان ایک خطّہ کا بندہ بن کر رہ جائے۔ یہ وسیع زمین انسان کے لئے بالکل کھلی ہوئی ہے۔ ایک جگہ اس کے لئے تنگ ہو تو دوسری جگہ چلا جائے، جہاں جائے گا اللہ تعالیٰ کی نعمتوں کو موجود پائے گا !
ترجمہ : ۔۔۔۔۔۔ کیا اللہ کی زمین وسیع اور کشادہ نہ تھی کہ تم اس میں ہجرت کر کے چلے جاتے۔۔۔۔۔۔
(سورہ : النساء ٤ ۔ آیت : ٩٧)
ترجمہ : ۔۔۔۔۔۔ جو کوئی اللہ کی راہ میں ہجرت کرے گا وہ زمین میں وافر جگہ اور کشائش پائے گا۔۔۔۔۔۔
(سورہ : النساء ٤ ۔ آیت : ١٠٠)
آپ پورے قرآن کو دیکھ جائیے۔ اس میں ایک لفظ بھی آپ کو وطنیت یا نسلیت کی تائید میں نہیں ملے گا۔
قرآن کی دعوت کا خطاب تو پوری نوعِ انسانی سے ہے۔ تمام روئے زمین کی انسانی مخلوق کو وہ خیر و صلاح کی طرف بلاتا ہے۔
اس میں نہ کسی قوم کی تخصیص ہے اور نہ کسی سرزمین کی۔
اس نے اگر کسی زمین کے ساتھ خاص تعلق پیدا کیا ہے تو وہ صرف ''مکّہ'' کی زمین ہے۔ لیکن اس کے متعلق بھی صاف کہہ دیا کہ:
سَوَآءَ نِ الْعاکِفُ فِیْہِ وَ الْبَادِ ٭ (سورہ : الحج ٢٢ ۔ آیت : ٢٥)
(معانی / مفہوم : ۔۔۔۔۔۔ مکّہ کے اصلی باشندے اور باہر والے مسلمان برابر ہیں ۔۔۔۔۔۔ )
وطنیت اور نسلیت کی جتنی تعریفیں کی گئی ہیں ان کے لئے کوئی عقلی بنیاد نہیں ہے۔
یہ صرف مادّی تفریقیں ہیں جن کا ہر دائرہ ، زاویہٴ نظر کی ہر وسعت پر ٹوٹ جاتا ہے۔
علم و عرفان کی روشنی جس قدر پھیلتی ہے، بصیرت کی رسائی جس قدر بڑھتی ہے، قلب میں جتنی جتنی وسعت پیدا ہوتی جاتی ہے ، یہ حِسّی اور مادّی پردے اٹھتے چلے جاتے ہیں اور بالآخر 'وطنیت' اور 'نسلیت' کو '' آفاقیت'' کے لئے جگہ خالی کرنا پڑتی ہے۔
اور یہ بالکل وہی بات ہے جو اسلام کہتا ہے۔
اسلام نے انسان اور انسان کے درمیان کسی مادّی اور حِسّی فرق کو تسلیم نہیں کیا ہے۔وہ کہتا ہے کہ سب انسان ایک ہی اصل سے ہیں۔
ترجمہ : اللہ نے تم کو ایک ہی جان سے پیدا کیا۔ پھر اس سے اس کا جوڑ پیدا کیا، اور ان دونوں سے بہت سے مردوں اور عورتوں کو [دنیا میں] پھیلا دیا ۔۔۔۔۔۔
( سورہ : النساء ٤ ۔ آیت : ١)
اس کے بعد نسل اور خاندان کے اختلاف کی بھی یہ حقیقت بتا دی کہ:
ترجمہ : اے لوگو! ہم نے تم کو ایک مرد اور ایک عورت سے پیدا کیا اور تم کو گروہ اور قبائل بنا دیا تاکہ تم آپس میں پہچانے جاؤ۔ مگر درحقیقت معزز تو تم میں وہی ہے جو زیادہ پرہیزگار ہے۔
( سورہ : الحجرٰت ٤٩ ۔ آیت : ١٣)
یعنی یہ قوم اور قبائل کا اختلاف محض تعارف کے لئے ہے۔
آپس کے حسد، ایک دوسرے پر تفاخر، ایک دوسرے سے جھگڑنے کے لئے نہیں ہے۔ اس اختلاف میں انسانی اصل کی وحدت کو بھول نہ جانا۔ تم میں اگر کوئی حقیقی تفریق ہے تو وہ اخلاق و اعمال کی، نیکی اور بدی کی بنا پر ہے !
اللہ اور اس کے رسول (صلی اللہ علیہ وسلم) نے جاہلیت کی اُن تمام محدود مادّی ، حِسّی اور وہمی بنیادوں کو جن پر دنیا کی مختلف قومیتوں کی عمارتیں قائم کی گئی تھیں، ڈھا دیا۔
وطن، رنگ، نسل، زبان، معیشت اور سیاست کی غیر عقلی تفریقوں کو، جن کے سبب انسان نے اپنی جہالت اور نادانی کی وجہ سے 'انسانیت' کو تقسیم کر رکھا تھا، مٹا دیا۔
اور انسانیت کے مادّے میں تمام انسانوں کو برابر اور ایک دوسرے کا ہم مرتبہ قرار دے دیا!
اسلام نے خالص عقلی بنیادوں پر ایک نئی قومیّت تعمیر کی۔ اس قومیّت کی بنا بھی امتیاز پر تھی، مگر مادّی اور غرضی امتیاز پر نہیں بلکہ روحانی اور جوہری امتیاز پر!
اس نے انسان کے سامنے ایک فطری صداقت پیش کی جس کا نام ''اسلام'' ہے !!
اسلام نے خدا کی بندگی اور اطاعت ، نفس کی پاکیزگی اور طہارت، عمل کی نیکی اور پرہیزگاری کی طرف ساری نوعِ بشری کو دعوت دی۔ پھر کہہ دیا کہ جو اس دعوت کو قبول کر لے وہ ایک 'جماعت' سے ہے۔ اور جو اس کو ردّ کرے وہ دوسری 'جماعت' سے ہے۔
ایک جماعت 'ایمان اور اسلام' کی ہے اور اس کے سب افراد ایک 'امّت' ہیں۔
وَکَذٰلِکَ جَعَلْنٰکُمْ اُمَّۃً وَّ سَطاً ۔ ( سورہ : البقرہ ٢ ۔ آیت : ١٤٣)
اور دوسری جماعت 'کفر اور گمراہی' کی ہے اور اس کے متبعین اپنے اختلافات کے باوجود ایک گروہ ہیں۔
وَللٰہُ لاَ یَھْدِیْ الْقَوْمَ الْکٰفِرِیْنَ ۔ ( سورہ : البقرہ ٢ ۔ آیت : ٢٦٤)
وطن کا اختلاف بھی ان دو جماعتوں کے درمیان وجہٴ امتیاز نہیں ہے۔ کیوں کہ یہاں امتیاز 'حق اور باطل' کی بنیاد پر ہے اور ظاہر ہے حق اور باطل کا کوئی وطن نہیں ہوتا۔
اسلام کہتا ہے کہ اگر تمھارے دین اور تمھارے وطن میں دشمنی ہو جائے تو دین کی خاطر وطن کو چھوڑ کر نکل جاؤ۔ جو شخص دین کی محبت پر وطن کی محبت کو قربان کر کے ہجرت نہ کرے وہ منافق ہے۔ اس سے تمھارا کوئی تعلق نہیں۔
ترجمہ : ۔۔۔۔۔۔ پس جب تک یہ اسلام کی خاطر وطن نہ چھوڑیں، اِن میں سے کسی کو حقیقی دوست نہ بناؤ۔
(سورہ : النساء ٤ ۔ آیت ٨٩)
اسی طرح اسلام اور کفر کے اختلاف سے خون کے قریب ترین رشتے بھی کٹ جاتے ہیں۔ ماں، باپ ، بھائی، بیٹے صرف اِس لئے جدا ہو جاتے ہیں کہ وہ اسلام کے مخالف ہیں۔ ہم نسل قوم کو اس لئے چھوڑ دیا جاتا ہے کہ وہ خدا سے دشمنی رکھتی ہے۔ وطن کو اس لئے خیرباد کہا جاتا ہے کہ وہاں اسلام اور کفر میں عداوت ہے۔
گویا اسلام دنیا کی ہر چیز پر مقدّم ہے۔
ہر چیز اسلام پر قربان کی جا سکتی ہے ۔۔۔۔۔۔ مگر ۔۔۔۔۔۔ اسلام کو کسی چیز پر قربان نہیں کیا جا سکتا !!
