طارق شاہ
محفلین
جہاں میں ہُوں !
آنند نرائن مُلّا
وہی حِرص و ہَوَس کا تنگ زِنداں ہے جہاں میں ہُوں
وہی اِنساں، وہی دُنیائے اِنساں ہے، جہاں میں ہُوں
تمنّا قید، ہمّت پابَجولاں ہے جہاں میں ہُوں
مجھے جکڑے ہُوئے زنجیرِ اِمکاں ہے جہاں میں ہُوں
کبھی شاید فرشتہ آدمِ خاکی بھی بن جائے
ابھی تو بھیس میں اِنساں کے شیطاں ہے جہاں میں ہُوں
کسی قِیمت پہ بھی اِنسانِیَت ڈُھونڈے نہیں مِلتی
مگر جنسِ خُدائی اب بھی ارزاں ہے جہاں میں ہُوں
اُفق پر ہوں تو ہوں دھندلے سے کچھ جلوے مُسرّت کے
ابھی راحت فقط اِک خواب، ارماں ہے جہاں میں ہُوں
غَرَض مندی کی پُوجا عام ہے یُوں ہر شوالے میں
محبّت، اپنی فِطرت پر پشیماں ہے جہاں میں ہُوں
ابھی رُوئے حقِیقت پر پڑا ہے پردۂ اِیماں
ابھی اِنساں فقط ہندو مُسلماں ہے جہاں میں ہُوں
نظر میں ہیں تصوّر کے وہی موہوم نظّارے
ابھی اِنساں حقِیقت سے گُریزاں ہے جہاں میں ہُوں
خدا وہ دِن تو لائے، سوز بھی اِک ساز بن جائے
ابھی ہر ساز میں اِک سوز پِنہاں ہے جہاں میں ہُوں
مجھے بھی شوقِ آزادی ہے، لیکن کیا کروں ملّا
وہی دُنیائے برق و باد و باراں ہے، جہاں میں ہُوں
پنڈت آنند نرائن مُلّا