آتشِ سوز ِجگر میں اب وہ شدت ہی نہیں

[La Alma]

آتشِ سوز ِجگر میں اب وہ شدت ہی نہیں
صحنِ جاں میں ہو چراغاں ایسی قسمت ہی نہیں

قصّہِ شوریدگانِ عشق سن کر کیا کریں
دل ہمارا گر شناسائے محبت ہی نہیں

یا خدا کس طور ہو آشفتہ حالی کا بیاں
ضعف ہے الفاظ میں کچھ معنویت ہی نہیں

گونجتی ہے گنبدِ ہستی میں کیسی بازگشت
ہم نوا ہم کو ملا ذوقِ سماعت ہی نہیں

یاد کی دہلیز پر یہ کون ہے ماتم کناں
اب ہمیں عہدِ کہن سےکوئی نسبت ہی نہیں

پردہِ چشم ِحزیں مطلوب ہے المٰی ہمیں
کس طرح ہو ضبط ممکن کوئی صورت ہی نہیں

​

 

[نور وجدان]

سارے اشعار پسند آئے ہیں ۔ مطلع تو بہت خوب

 

[عباد اللہ]

لاجواب

 

[کاشف اسرار احمد]

ماشا اللہ اچھی غزل ہے۔ اصلاح اساتذہ کا کام ہے۔ بس ایک بات عرض کرنا چاہونگا۔

یاد کی دہلیز پر یہ کون ہے ماتم کناں
اب ہمیں عہدِ کہن سےکوئی نسبت ہی نہیں ​

یہاں 'عہدِ کہن' کچھ پتھروں کے زمانے کی سی بات لگ رہی ہے۔ شاید آپ یوں کہنا چاہ رہیں ہیں۔
'عہدِ گزشتہ سے ہمیں اب کوئی نسبت ہی نہیں'
باقی غزل خوب ہے۔ ماشا اللہ۔

 

[صفی حیدر]

آتشِ سوز ِجگر میں اب وہ شدت ہی نہیں
صحنِ جاں میں ہو چراغاں ایسی قسمت ہی نہیں

عمدہ تخلیقی کاوش ہے ۔۔۔۔۔۔۔۔

 

[La Alma]

سارے اشعار پسند آئے ہیں ۔ مطلع تو بہت خوب

بہت شکریہ نور .آپ کو پسند آیا محنت وصول ہوئی

 

[La Alma]

لاجواب

نوازش .

ماشا اللہ اچھی غزل ہے۔ اصلاح اساتذہ کا کام ہے۔ بس ایک بات عرض کرنا چاہونگا۔

یہاں 'عہدِ کہن' کچھ پتھروں کے زمانے کی سی بات لگ رہی ہے۔ شاید آپ یوں کہنا چاہ رہیں ہیں۔
'عہدِ گزشتہ سے ہمیں اب کوئی نسبت ہی نہیں'
باقی غزل خوب ہے۔ ماشا اللہ۔

حوصلہ افزائی کے لیے مشکور ہوں .
آپ کی بات میں بھی وزن ہے . عہد ِکہن کو عہدِ ماضی سے بدل دیا ہے .
مصرع اب کچھ یوں ہے :
"عہدِ ماضی سے ہمیں اب کوئی نسبت ہی نہیں " .

عمدہ تخلیقی کاوش ہے ۔۔۔۔۔۔۔۔

بہت شکریہ .

 

[محمد فائق]

واہ واہ بہترین کلام

 

[ظہیراحمدظہیر]

بہت خوب!! کیا اچھے اشعار ہیں ! سلامت رہیئے !

 

[الف عین]

اچھی غزل ہے ماشاء اللہ۔ یہ شعر ذرا وضاحت چاہتا ہے۔ ہاں اگر ’ہم نوا ‘ پر ’!‘ لگا دیا جائے تو تخاطب کے ساتھ خوب ہو جاتا ہے۔ معلوم نہیں عزیزہ المیٰ کیا یہی کہنا چاہتی ہیں؟
گونجتی ہے گنبدِ ہستی میں کیسی بازگشت
ہم نوا ہم کو ملا ذوقِ سماعت ہی نہیں

 

[La Alma]

واہ واہ بہترین کلام

آپ کا بہت شکریہ .

بہت خوب!! کیا اچھے اشعار ہیں ! سلامت رہیئے !

بہت مہربانی .

 

[La Alma]

اچھی غزل ہے ماشاء اللہ۔ یہ شعر ذرا وضاحت چاہتا ہے۔ ہاں اگر ’ہم نوا ‘ پر ’!‘ لگا دیا جائے تو تخاطب کے ساتھ خوب ہو جاتا ہے۔ معلوم نہیں عزیزہ المیٰ کیا یہی کہنا چاہتی ہیں؟
گونجتی ہے گنبدِ ہستی میں کیسی بازگشت
ہم نوا ہم کو ملا ذوقِ سماعت ہی نہیں

پسندیدگی کے لیے بہت ممنون ہوں .
سر آپ درست سمجھے، یہاں ہمنوا سے تخاطب ہی ہے .