لیاقت علی عاصم غزل ۔ عد و کا ذکر نہیں دوستوں کا نام نہیں ۔ لیاقت علی عاصم

محمداحمد

لائبریرین
غزل

عد و کا ذکر نہیں دوستوں کا نام نہیں
زباں پہ آج کوئی حرفِ انتقام نہیں

در و دریچہ کے داغ و چراغ اپنی جگہ
مجھے جلا کے نہ گُزری تو شام شام نہیں

چلو ٹھہر نہیں سکتے گزر تو سکتے ہو
کہیں کہیں سے شکستہ ہے دل تمام نہیں

جسے پکارتے پھرتے ہیں کُو بہ کُو ہم لوگ
وہ ایک عہدِ تمنّا ہے صرف نام نہیں

یہ خاکدانِ تعلق ہے پیش و پس میں نہ جا
حصولِ آتش و آب و ہوا مدام نہیں

کئی بُجھے ہوئے سینوں کو آگ ہے درکار
زباں پہ نام تمھارا برائے نام نہیں

لیاقت علی عاصم

 

مغزل

محفلین
سبحان اللہ سبحان اللہ، واہ بہت خوب انتخاب ہے ماشا اللہ

ایک شعر ہمیں یاد پڑتا ہے:

عدو تھے حلقہِ یاراں میں مثلِ موئے سپید
کہ ہم نے ایک نکالا تو دس نکل آئے
لیاقت علی عاصم
 
Top