ظہیراحمدظہیر
لائبریرین
"اب اور کیا کہوں!" کہنے کی میری باری ہے!! آپ نے تو انتہائی خوشگوار حیرت سے دوچار کردیا! اللہ آپ کو سلامت رکھے، ہمیشہ سکھی رہیں ! اپنی جنت میں آباد رہیں!
تبصرہ اس لیے مشکل ہے کہ ماضی میں دو تین قریبی یار دوست تو کئی بار میرا "خاکہ" لکھ چکے ہیں لیکن ایک ادیبہ کے قلم سے یہ واقعہ پہلی بار صادر ہوتے دیکھا ہے اور وہ بھی اس قدر حسنِ ظن اور عقیدت کے ساتھ !
یہ شکر کا موقع ہے ۔ اللہ کریم آپ کے قلم کو مزید توانائی بخشے! آمین ۔ اگر آپ کی اس نگارش پرایک سے زیادہ ردِ عمل دیا جاسکتا تو اس کے مختلف حصوں پر زبردست ، متفق ، دوستانہ ، پر مزاح اور پھر دوبارہ زبردست کی ریٹنگ دی جاسکتی تھی۔
پسندیدہ کی ریٹنگ اس لیے ممکن نہیں کہ پھر اسے خود پسندی میں شمار کیا جاتا۔ اور آپ تو جانتی ہیں کہ میں اگرچہ غالب سے بڑا اور میر سے تھوڑا چھوٹا شاعر ہوں لیکن خود پسند بالکل بھی نہیں ہوں۔
تفنن برطرف ، آپ کی شاعری پر نقد و نظر میرے لیے ہمیشہ باعثِ تسکینِ ذوق رہا۔ تراش خراش کی سعی تو کوہِ نور ہی پر کی جاتی ہے ۔ بے جوہر سنگ ریزوں پر کوئی اپنا وقت صرف نہیں کرتا ۔ مجھے خوشی ہے کہ محفل کے ان صفحات پر آپ کی شاعری کے توسط سے میں اپنی آواز اور بہت سارے سیکھنے والوں تک پہنچا سکا۔ میرا عقیدہ ہے کہ تعلیم و تعلم کے کسی بھی سلسلے میں استفادہ دو طرفہ ہوتا ہے۔ بعض اوقات کسی نکتے پر نقد و نظر کی خاطر تنقید نگار کو بھی سوچنا اور تحقیق کرنا پڑتی ہے۔ میری ذاتی رائے یہ ہے کہ آپ کی شاعری میں بے انتہا امکانات ہیں ۔ اگر زندگی فرصت اور مہلت دے تو شاعری ترک مت کیجیے گا۔ زیادہ تعریف اس لیے نہیں لکھتا کہ یہ آپ کی نہیں میری تعریف کا دھاگا ہے ۔
ہاہاہاہاہا! ہاہا !
آپ نے ایک ہفتے میں تین بار بے ساختہ ہنسادیا!
اگر آپ اسی رفتار سے ہنساتی رہیں تو میں احتجاجاً اپنی دائمی سنجیدگی سے تائب ہونے کے بارے میں سنجیدگی سے سوچوں گا۔
چونکہ آپ نے یہ بھیانک راز فاش کر ہی دیا ہے کہ میں شعر و ادب کے بارے میں فری فنڈ مشورے اور کھنچائی کا کوئی بھی موقع ہاتھ سے جانے نہیں دیتا تو آپ کی اس تحریر کی کھنچائی تو یہ ہے کہ :
اےادیبۂ ذہین و فطین کام کرنے کی مشین المصروف بہ تعلیم ِزبانِ فرنگ المعروف بہ صابرہ امین! اتنے عمدہ اور نستعلیق ادب پارے کا عنوان انگریزی میں رکھنا چہ معنی؟! آپ فوراً سے پیشتر اس کا عنوان بدل کر "ہم زاد " رکھنے کے بارے میں سوچیں اور اس خاکسار کو مزید خوش ہونے اور شکریے کا موقع دیں ۔
فری فنڈمشورہ یہ ہے کہ لکھنا مت چھوڑیے گا ۔ کچھ لوگوں کو اپنی بات کہنے اور اسے دوسروں تک بخوبی پہنچانے کا ایک سلیقہ قدرت کی طرف سے فطری طور پر عطا ہوتا ہے ۔ اس کی قدر کرنا چاہیے۔ میں یہ مشورہ آپ کو اس لیے دیتا ہوں کہ اب فصیح اردو رو بہ زوال نظر آتی ہے ، سوشل میڈیا کی آمد سے ہر قسم اور ہر طرح کی زبان لکھنے والے منظرِ عام آچکے ہیں ۔ ایسے میں وہ لوگ کہ جو بچپن ہی سے علم دوست و ادب دوست گھرانوں میں معیاری اردو سے آشنا ہوئے او ر اس خوبصورت زبان میں لکھنے پڑھنے کا شوق ان کی شخصیت کا حصہ بن گیا تو انہیں قلم ایک طرف ر کھ کر اس سے منہ نہیں موڑنا چاہیے ۔ اگر میری بات گراں نہ گزرے تو یہاں تک کہوں گا کہ ان پر لکھنا لازم ہے کہ یہ اردوکا قرض ہےان پر۔
چونکہ آپ نے یہ تحریر مجھ گوشہ نشین اور گمنام کے بارے میں لکھ کر ایک بدعت اپنے سر لے لی ہے تو اس موقع کا فائدہ اٹھاتے ہوئے اپنے بارے میں یہاں وہی بات دہراؤں گا کہ جو ہمیشہ کہتا آیا ہوں ۔ میں چراغ سے چراغ جلانے والے اُس قدیم اور بے غرض سلسلے کا حصہ ہوں کہ جو اب معدوم ہوتا نظر آتا ہے۔ میں چاہتا ہوں کہ بجھنے سے پہلے اپنی روشنی بانٹتا جاؤں ۔
یہ سلسلہ ہے وہی لو سے لو جلانے کا
بجھے ہوؤں کا جنم ہے نئے چراغوں میں
جو رنگارنگی میرے دامن میں نظر آتی ہے ماضی کے گلستانوں کی عطا ہے ۔ میری کوشش ہے کہ اپنے دامن کے پھول اپنی راہ گزر پر جہاں تک بکھیرسکتا ہوں بکھیرتا جاؤں۔ محفل کے بند ہونے کا مجھے یہی ایک پچھتاواہے کہ جو کام مجھے کرنا تھا وہ کماحقہ نہیں کرسکا۔ بہرحال ، ملکِ خدا تنگ نیست۔ زندگی نے مہلت دی تو ہم کسی اور کوچے میں اپنی فقیرانہ صدا لگاتے رہیں گے۔
صابرہ امین ، اس قدر پذیرائی اور ذرہ نوازی کے لیے آپ کا بہت بہت بہت بہت شکریہ ! میں دست بستہ سر خمیدہ ممنون ہوں ۔ محفل کے دروازے کسی بھی وقت بند ہوسکتے ہیں۔ پھر شاید کہا سنا معاف کہنے کا بھی موقع نہ ملے۔ پانچ سالوں پر محیط گفت و شنید اور تعلیم وتعلم کے اس سلسلے میں اگر میری کوئی بات گراں گزری ہو تو میں تہِ دل سے معافی کا خواستگار ہوں ۔ بندہ بشر ہوں ۔ زبان کا برا ہوسکتا ہوں لیکن بخدا دل کا برا نہیں ۔ امید ہے کہ آپ اپنی دریا دلی سے کام لیتے ہوئے مجھے معاف فرمائیں گی ۔ 🙏
