’’صدائے گریۂ ہمسایگاں ‘‘ سُنی کم ہے ۔۔۔۔۔۔۔خالد علیم

[نوید صادق]

غزل

’’صدائے گریۂ ہمسایگاں ‘‘ سُنی کم ہے
تو اصل یہ ہے کہ سینوں میں روشنی کم ہے

بلا کے تیز قدم تھے ہمارے ناقہ سوار
مگر ہماری ہی کچھ اس پہ آگہی کم ہے

سو یہ نہیں کہ ہمیں رفتگاں سے اُنس نہیں
سو بات یہ کہ ہماری بھی زندگی کم ہے

تمھارے پیشِ نظر ہم نہیں ‘ نہیں ممکن
ہمیں ہی وقت کی مہلت ملی ہوئی کم ہے

پہنچ سکے نہ ترے قریۂ نگاہ میں ہم
تو یہ سبب ہے کہ رستوں میں راستی کم ہے

یہ چاہتے ہوئے ہم تم ہوں ایک‘ ہو نہ سکے
تمھیں گلہ نہیں ‘ کیا یہ بھی بے بسی کم ہے ؟

ہماری گمشدگی کا بجا دو نقارہ
نئے جہاں کو بصارت ذرا ملی کم ہے

اَنا کی اندھی گلی سے گزرنے والوں کو
کہے یہ کون کہ اس میں سلامتی کم ہے

کسی کو رہ گزرِ عشق سے گزرنے پر
کہیں بھی کیا کہ کسی کی یہاں چلی کم ہے

ہوس کے دشت میں خالد مجھے نہ لے جاؤ
اس ایک سمت کو آمادگی مری کم ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خالد علیم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شکریہ ماہنامہ ’’بیاض‘‘ مئی 2009

 

[شاہ حسین]

سو یہ نہیں کہ ہمیں رفتگاں سے اُنس نہیں
سو بات یہ کہ ہماری بھی زندگی کم ہے

بہت خوب جناب نوید صاحب

 

[عمران شناور]

شکریہ نوید بھائی۔ بہت اچھے

 

[عین عین]

نہایت عمدہ

 

[محمد وارث]

سو یہ نہیں کہ ہمیں رفتگاں سے اُنس نہیں
سو بات یہ کہ ہماری بھی زندگی کم ہے

ہماری گمشدگی کا بجا دو نقارہ
نئے جہاں کو بصارت ذرا ملی کم ہے

ہوس کے دشت میں خالد مجھے نہ لے جاؤ
اس ایک سمت کو آمادگی مری کم ہے

لا جواب، واہ واہ واہ