فانی گُزرے گی اب نہ غم کا مداوا کئے بغیر

[طارق شاہ]

غزل​

فانی بدایونی​

​

گُزرے گی اب نہ غم کا مداوا کئے بغیر ​

بنتی نہیں اَجَل سے تقاضہ کئے بغیر ​

​

دل کامیابِ شوق ہے بے منّتِ نِگاہ ​

جلوے ہیں دِلفریب تماشا کئے بغیر ​

​

الله رے اعتمادِ محبّت، کہ آج تک ​

ہر درد کی دوا ہیں وہ اچھّا کئے بغیر​

​

وہ جان ہی نہیں جو نہ ہو جائے نذرِ دوست ​

دل ہی نہیں ہے اُس کی تمنّا کِئے بغیر ​

​

مُمکِن نہیں ہے راحتِ دُنیا کی آرزو ​

غم پر گُمانِ راحتِ دُنیا کئے بغیر ​

​

اِس ضبط و احتیاط سے رُسوا ہے رازِ عشق ​

پردے میں حُسنِ دوست ہے پردہ کئے بغیر ​

​

لازم سی ہے حیات، کہ فانی مفر نہیں ​

جینے کی تلخیوں کو گوارہ کئے بغیر​

​

فانی بدایونی​