ساغر صدیقی گل ہوئی شمعِ شبستاں چاند تارے سو گئے - ساغر صدیقی

گل ہوئی شمعِ شبستاں چاند تارے سو گئے
موت کے پہلو میں شامِ غم کے مارے سو گئے

بے قراری میں بھی اکثر درد مندانِ جنوں
اے فریبِ آرزو تیرے سہارے سو گئے

کاروبارِ گرمئ دوراں کی ٹھنڈی راکھ میں
اے شگوفوں کے خداوندو! شرارے سو گئے

دے رہی ہے آج بھی موجِ حوادث لوریاں
شورشِ طوفاں سے گھبرا کے کنارے سو گئے

جن سے نغمے تھے وفاؤں کے سراپا زندگی
وہ محبت کی تلاوت کے اشارے سو گئے

کیا نہیں معلوم تجھ کو اے مرے مغموم دل
جن سے نظریں تھیں شگفتہ وہ نظارے سو گئے

جن کے دم سے بزمِ ساغرؔ تھی حریفِ کہکشاں
اے شبِ ہجراں کہاں وہ ماہ پارے سو گئے​
ساغر صدیقی
 
آخری تدوین:
Top