محمد سعد
محفلین
بھائی کہاں غائب ہو جاتی ہیں ویڈیوز؟ میں تو جب بھی ہارپ کے متعلق کچھ ڈھونڈتا ہوں تو سنجیدہ سائنس دانوں کے مضامین سے زیادہ یہی سازشی کہانیاں اور سیاسی بیانات ملتے ہیں۔ صحیح سائنسی گفتگو دیکھنے کے لیے گوگل سکالر سرچ پر جانا پڑتا ہے۔ آپ لوگوں کا سب سے زیادہ زور اسی پر ہوتا ہے کہ فلاں ویڈیو کو غائب کر دیا گیا، فلاں شخص کو غائب کر دیا گیا۔ لیکن جب بھی معاملے کی تہہ تک پہنچنے کی کوشش کرو تو سب جھوٹ نکلتا ہے۔ کسی کا چینل کاپی رائٹ وائلیشن کی وجہ سے بند ہو جائے، وہ بھی یہی کہتا نظر آتا ہے کہ میرے خلاف کارروائی صرف ہارپ کو بچانے کے لیے کی گئی۔ اگر ایسا ہے تو پھر یہ جو گوگل ویب سرچ پر ان سازشی کہانیوں کا راج ہے، اس کی وضاحت کیسے کریں گے آپ؟
جناب فوج کا اس سے کام کیوں نہیں ہے۔ آپ کسی فوجی سے بات کر کے دیکھیں۔ وہ آپ کو اچھی طرح سمجھا دے گا کہ کسی جنگ کے دوران مواصلات کے ذرائع کی اہمیت کیا ہوتی ہے۔ اپنے مواصلاتی نظام کو بہتر بنانا اور دشمن کے نظام کو توڑنا کس طرح آپ کا پلڑا بھاری کر سکتا ہے۔
موسم میں کچھ حد تک تبدیلی بھی ممکن ہے۔ کیوں ممکن نہیں۔ مجھے یاد پڑتا ہے کہ بچپن میں پاکستان میں کہیں مصنوعی بارش کے تجربے کے متعلق پی ٹی وی پر کسی سائنس دان (یا شاید انجنئیر) کو بات کرتے دیکھا تھا۔ لیکن اس کا طریقۂ کار یہ نہیں ہوتا کہ ادھر آپ نے اپنے مقام کے اوپر ساڑھے تین میگاواٹ چھوڑے اور ادھر ہزاروں میل دور سیلاب آ گیا۔ اس کی تفصیل میرے مضمون اور اس دھاگے میں دو چار مزید مقامات پر آ چکی ہے چنانچہ دوبارہ بیان کرنے کی ضرورت نہیں۔
کمال کی بات یہ ہے کہ انہی لوگوں کو، جو ساڑھے تین میگاواٹ سے سیلابوں کی بات کرتے ہیں، اگر میں یہ کہوں کہ انسانوں کی مجموعی سرگرمیوں اور ان سے پھیلنے والی آلودگیوں کی وجہ سے زمین کی آب و ہوا کا توازن بگڑ رہا ہے، تو یہ ماننے کو تیار نہیں ہوں گے کہ "صرف چھے ارب انسانوں کی سرگرمی سے زمین کی آب و ہوا میں بگاڑ کیسے آ سکتا ہے؟"۔۔۔ ہے نا کمال کی بات؟
جی بالکل۔ حق فرمایا۔ جدید ٹیکنالوجی کے متعلق جاننے کے لیے مجھے واقعی ایسے لوگوں کی کتابیں پڑھنی چاہئیں جنہیں خود جدید ٹیکنالوجی سے اور ان کے پس پشت کارفرما اصولوں سے کوئی خاص واقفیت نہیں ہے۔
اب آپ کے چھاپے ہوئے مضامین کو باری باری دیکھیں گے جو دس پندرہ فیصد سچ اور باقی سب جھوٹ پر مشتمل ہیں۔
شروع میں نیکولا ٹیسلا کی کچھ باتوں کا ذکر ہے۔ میں نیکولا ٹیسلا کا بہت بڑا پنکھا ہوں لیکن جب کوئی اس کا نام استعمال کر کے اپنی بونگیاں مارے گا تو اس کو صرف ٹیسلا کے نام کی وجہ سے نہیں بخشوں گا۔ جیسے موسم میں تبدیلی لانے والی بات جو کہ غالباً ان صاحب کی اپنی بونگی ہے۔ کیونکہ کسی معتبر حوالے سے مجھے یہ نہیں ملا کہ ٹیسلا نے موسم میں تبدیلیاں لانے کے کسی پراجیکٹ کی بات کہی ہو۔
یہ بھی وضاحت کرتا چلوں کہ نیکولا ٹیسلا کو اپنی آخری عمر میں بہت زیادہ پریشانیوں کا سامنا کرنا پڑا تھا۔ جیسا کہ آپ کئی لوگوں کے ساتھ ہوتا دیکھ چکے ہوں گے کہ ان کو آخری عمر میں وہ مقام نہیں دیا جاتا جس کے وہ مستحق ہوتے ہیں۔ ایسے میں اس کو اگر کچھ بڑے بڑے دعوے کرنے کی ضرورت محسوس ہوئی اپنی تحقیق میں تعاون کے لیے سرمایہ کاروں کو متوجہ کرنے کے لیے، تو میں اس کی ضرورت سمجھ سکتا ہوں۔ جیسے اس کا یہ کہنا کہ چند دھماکوں کے ذریعے وہ زمین کو دو حصوں میں تقسیم کر سکتا ہے۔
شعاع کی جو بات ہے تو وہ واقعی ایک سنجیدہ پراجیکٹ تھا اس کا۔ لیکن آج کل میں ذراتی بیم کے بجائے لیزر کو زیادہ ترجیح ملتی دیکھ رہا ہوں، غالباً توانائی کی بچت کی وجہ سے۔ ہاں اس بیم کا اصول آئن پروپلشن میں استعمال ہونا شروع ہو گیا ہے خلائی جہازوں کو کم ایندھن میں زیادہ دور تک جانے کے قابل بنانے کے لیے۔
ٹیسلا کے "زلزلہ لانے والے آلے" کو متھ بسٹرز (Myth Busters) نے ایک پل پر آزمایا تھا لیکن اس قسم کے کوئی نتائج حاصل نہیں ہوئے جیسا ٹیسلا نے دعویٰ کیا تھا۔
آگے یہ کہا جاتا ہے کہ ہارپ 2.5 سے 10 میگاہرٹز کی فریکوینسی استعمال کرتا ہے۔ ان اعداد پر مجھے اعتراض نہیں۔ توجہ اس بات کی طرف دلانا چاہتا ہوں کہ انہی فریکوینسیز کو پیچھے یہی "روحانی بابا" صاحب ای ایل ایف یعنی ایکسٹریم لو فریکوینسی کے نام سے پکارتے ہیں۔ (اگر یہ اقتباس ان کی پوسٹ کا نہیں ہے تو معذرت کیونکہ ان دونوں میں کوئی خاص فرق نہیں ہے۔ ایک دوسرے کا چربہ پھر بھی میں نہیں کہوں گا کہ شاید آپ کو برا لگے۔)۔۔ اگر آپ برقی مقناطیسی سپیکٹرم سے کچھ حد تک واقف ہیں تو اس سے اندازہ لگا سکتے ہیں کہ ان مضامین میں جدید سائنس و ٹیکنالوجی کے متعلق سیکھنے کے کتنے "اعلیٰ" مواقع میسر ہیں۔
آگے فرمایا جاتا ہے کہ "ہارپ کے پیٹنٹ کے مطابق" یہ موسم میں تغیر لا سکتا ہے۔ میرے خیال میں آگے بڑھنے سے پہلے آپ یہاں کلک کر کے اس پیٹنٹ کو بذات خود دیکھ لیں تو آپ کو اندازہ ہو جانا چاہیے کہ کتنا سچ ہے اور کتنا جھوٹ۔ ہاں اگر آپ کو اس میں استعمال ہونے والی اصطلاحات کے معانی ہی نہ آتے ہوں تو یہ کوئی حیرت کی بات نہیں ہوگی کہ آپ "سائنسی دلائل" کے نام پر ان فراڈیوں کے جھانسے میں آ گئے۔
میزائلوں کو روکنا اور جہازوں کے راستے بدلنا، ان کا تعلق مواصلاتی نظاموں میں گڑبڑ کرنے سے ہے۔ اور شکر ہے کہ کچھ سچ بھی شامل کر دیا ان صاحب نے۔ میرے خیال میں ان مثالوں سے آپ کو سمجھ آ گئی ہوگی کہ مواصلاتی نظاموں کی کیا اہمیت ہوتی ہے اور آئنوسفئیر پر تحقیق فوج کے لیے کتنی اہم ہے۔ یہ بھی واضح ہونا چاہیے کہ یہ جو راستہ موڑنے اور اونچائی بدلنے کی بات کی ہے انہوں نے، یہ براہ راست نہیں ہوگا بلکہ پہلے اس کے پوزیشننگ سسٹم کو کنفیوز کیا جائے گا جس سے وہ خود ہی غلط فیصلے کرنے لگ جائے گا۔
الیکٹران سائیکلوٹران ریزننس (Electron Cyclotron Resonance) کو یہ صاحب "ذرات کا مرغولہ بنا کے بالائی کرۂ ارض کے قرینے یا سانچے میں ڈھالنا" کہہ رہے ہیں۔ اس پر میں کیا تبصرہ کروں۔ آپ خود ہی اس اصطلاح کی تفصیل دیکھ کر فیصلہ کر لیں کہ ان صاحب کو موضوع سے کتنی "علمی" قسم کی واقفیت ہے۔
آخر میں ایک بار پھر یہ دعویٰ کیا جاتا ہے کہ آئنوسفئیر میں ہلکی سی ہلچل سے ٹروپوسفئیر کا موسم بدلا جا سکتا ہے۔ اس کا پوسٹ مارٹم قبل از مرگ میرے مضمون میں آ چکا ہے۔
فی الحال میرے خیال میں اتنا بہت ہے۔ پھر ملتے ہیں، بریک کے بعد!
