چار دن کا ہے یہ جینا زندگی ہے مختصر غزل نمبر 114 شاعر امین شارؔق

[امین شارق]

الف عین سر
فاعِلاتن فاعِلاتن فاعِلاتن فاعِلن

چار دن کا ہے یہ جینا زندگی ہے مختصر
فکرِ عُقبیٰ کر کہ یہ دنیا تری ہے مختصر

کیوں نہ ہم جگنو کی صُورت راستے روشن کریں
چار سُو پھیلی ہے ظُلمت روشنی ہے مختصر

یہ اُجالے ہیں غنیمت پالو اپنی منزلیں
پھر اندھیری رات ہوگی چاندنی ہے مختصر

کہہ رہا تھا ایک بُلبل گُلستاں سے بات یہ
نِکہتِ گُل پر نہ اِترا تازگی ہے مختصر

کوئی دیوانے سے کہدے باز آئے عشق سے
لمبی ہے فُرقت کی شب اور وصل کی ہے مختصر

شمع کے دو چار چکر کاٹ کر ہی جان دی
آہ پروانے تری یہ دل لگی ہے مختصر

عشق فرمانے سے پہلے یاد رکھنا بات یہ
زندگی بھر کا ہے رونا اور ہنسی ہے مختصر

ایک دِن مل جائے گی چاہت تری تُو صبر کر
اے مرے دِل غم نہ کر یہ بے کلی ہے مختصر

آرزوئیں ختم کب ہوگی کبھی انسان کی؟
ہے کئی ارمان عُمرِ آدمی ہے مختصر

بیٹھ کر ساحل سے ہی نظارہِ سُورج کرو
ہے کسی طُوفاں کی آمد خامشی ہے مختصر

جام پی کر ایک دو جو گر پڑے مے کش نہیں
بادہ کش وہ کیا کہ جس کی بے خودی ہے مختصر

ہے ادب ہی پہلی سیڑھی کامیابی کی سُنو
لوگ کم ہی جانتے ہیں آگہی ہے مختصر

زندگی کی دو ہیں دنیا باطنی و ظاہری
باطنی دنیا بڑی ہے ظاہری ہے مختصر

آخرت میں سیرت و اعمال دیکھے جائیں گے
حُسن دنیا کا سُنو ہے عارضی ہے مختصر

زِندہ ہے وہ راہِ حق میں جس نے اپنی جان دی
اِس حقیقت کو یہ دنیا جانتی ہے مختصر

ہم نے سوچا تھا کئی اشعار ہونگے اور مگر
آپ کی شارؔق غزل یہ واقعی ہے مختصر​

 

[الف عین]

بڑی مختصر غزل ہے!

فکرِ عُقبیٰ کر کہ یہ دنیا تری ہے مختصر
.. درست

کیوں نہ ہم جگنو کی صُورت راستے روشن کریں
چار سُو پھیلی ہے ظُلمت روشنی ہے مختصر
.. روشنی کا مختصر ہونا سمجھ میں نہیں آیا

یہ اُجالے ہیں غنیمت پالو اپنی منزلیں
پھر اندھیری رات ہوگی چاندنی ہے مختصر
.. درست

کہہ رہا تھا ایک بُلبل گُلستاں سے بات یہ
نِکہتِ گُل پر نہ اِترا تازگی ہے مختصر
... درست

کوئی دیوانے سے کہدے باز آئے عشق سے
لمبی ہے فُرقت کی شب اور وصل کی ہے مختصر
.. لمبی کی ی کا اسقاط اچھا نہیں
ہجر کی شب تو ہے لمبی، وصل....
لیکن دونوں مصرعوں میں ربط کی کمی ہے

شمع کے دو چار چکر کاٹ کر ہی جان دی
آہ پروانے تری یہ دل لگی ہے مختصر
... تھیک

عشق فرمانے سے پہلے یاد رکھنا بات یہ
زندگی بھر کا ہے رونا اور ہنسی ہے مختصر
.. ٹھیک

ایک دِن مل جائے گی چاہت تری تُو صبر کر
اے مرے دِل غم نہ کر یہ بے کلی ہے مختصر
... درست

آرزوئیں ختم کب ہوگی کبھی انسان کی؟
ہے کئی ارمان عُمرِ آدمی ہے مختصر
.. ہو گی؟ ہوں گی درست یو گا جمع کے صیغے میں
اور کئی کے ساتھ بھی ہیں جمع کے صیغے میں آنا چاہیے

بیٹھ کر ساحل سے ہی نظارہِ سُورج کرو
ہے کسی طُوفاں کی آمد خامشی ہے مختصر
.. نظارۂ سورج غلط ترکیب ہے
خامشی بھی مختصر ہونا عجیب لگتا ہے

جام پی کر ایک دو جو گر پڑے مے کش نہیں
بادہ کش وہ کیا کہ جس کی بے خودی ہے مختصر
.. درست

ہے ادب ہی پہلی سیڑھی کامیابی کی سُنو
لوگ کم ہی جانتے ہیں آگہی ہے مختصر
... آگہی بھی مختصر ہونا محاورہ نہیں

زندگی کی دو ہیں دنیا باطنی و ظاہری
باطنی دنیا بڑی ہے ظاہری ہے مختصر
... دو دنیائیں کہنا چاہئے

آخرت میں سیرت و اعمال دیکھے جائیں گے
حُسن دنیا کا سُنو ہے عارضی ہے مختصر
.. حسن بھی مختصر ہونا خلاف محاورہ ہے

زِندہ ہے وہ راہِ حق میں جس نے اپنی جان دی
اِس حقیقت کو یہ دنیا جانتی ہے مختصر
... بے معنی لگتا ہے

ہم نے سوچا تھا کئی اشعار ہونگے اور مگر
آپ کی شارؔق غزل یہ واقعی ہے مختصر
.. اور مگر.. اچھا نہیں، کچھ اور کہو اس کی جگہ

 

[امین شارق]

جی استاد محترم دیکھتا ہوں۔۔

 

[امین شارق]

الف عین سر بہت نوزش ہے آپ نے توجہ دی۔
اصلاح کے بعد۔۔
کوئی دیوانے سے کہدے باز آئے عشق سے
ہجر کی شب تو ہے لمبی، وصل کی ہے مختصر
اصلاح کے بعد۔۔
آرزوئیں ختم کب ہوں گی کبھی انسان کی؟
ہیں کئی ارمان عُمرِ آدمی ہے مختصر
اصلاح کے بعد۔۔
ہم نے سوچا اور بھی اشعار ہوں گے دِلنشیں
آپ کی شارؔق غزل یہ واقعی ہے مختصر
یہاں یہ کہنا مقصود ہے کہ جہالت کے اندھیرے بہت زیادہ ہیں جبکہ علم کی روشنی کی بہت زیادہ کمی ہے تو ہمیں اپنی کوششوں سے یہ ظلمت دور کرنی چاہئے۔۔
چار سُو پھیلی ہے ظُلمت روشنی ہے مختصر
یہاں یہ کہنا مقصود ہے کہ یہ خاموشی جلد ختم ہوجائے گی۔۔
ہے کسی طُوفاں کی آمد خامشی ہے مختصر
یہاں یہ کہنا مقصود ہے کہ لوگوں میں اس بات کی آگاہی کم ہیں جو مصرعہ اول میں بیان کی گئی ہے۔۔
لوگ کم ہی جانتے ہیں آگہی ہے مختصر
دنیائیں تقطیع میں نہیں آرہا سر۔
.. دو دنیائیں کہنا چاہئے
یہاں یہ کہنا مقصود ہے کہ حُسنِ دنیا بہت جلد ختم ہونے والا ہے۔۔
حُسن دنیا کا سُنو ہے عارضی ہے مختصر
یہاں یہ کہنا مقصود ہے کہ جو حقیقت مصرعہ اول(قرآن مجید کی ایک آیت کی تشریح ہے) میں بیان کی گئی ہے اس کو لوگ کم جانتے ہیں غیر مسلم کو تو اس بات کا ادراک ہی نہیں ہے اور مسلم میں بھی سب لوگ نہیں جانتے ہوں گے
زِندہ ہے وہ راہِ حق میں جس نے اپنی جان دی
اِس حقیقت کو یہ دنیا جانتی ہے مختصر

 

[الف عین]

میرا مطلب یہی تھا کہ ہر شےکو مختصر کہنا محاورے کے خلاف ہے، چھوٹی ہے، کم ہے، تو درست ہوتا ۔ اگرچہ سمجھ میں تو آتا ہے، اور میں نے جی یہ سمجھ کرہی اعتراض کیا تھا کہ ردیف کا یہ استعمال ہی درست نہیں لگتا
پہلے تین اشعار تو درست ہو گئے لیکن باقی سارے نکالے جا سکتے ہیں