جگر پھردل ہے قصدِ کوچۂ جاناں کئے ہوئے --- غزلِ جگرمُرادآبادی

[طارق شاہ]

غزل ​

جگرمُرادآبادی ​

​

پھردل ہے قصدِ کوچۂ جاناں کئے ہوئے ​

رگ رگ میں نیشِ عشق کو پنہاں کئے ہوئے​

​

پھر عُزلتِ خیال سے گھبرا رہا ہے دل ​

ہر وسعتِ خیال کو زنداں کئے ہوئے ​

​

پھرچشمِ شوق دیر سے لبریزِ شکوہ ہے ​

قطروں کو موج، موج کو طوفاں کئے ہوئے​

​

پھر جان بے قرار ہے آمادۂ فُغاں ​

سو حشر اک سکوت میں پنہاں کئے ہوئے ​

​

پھر کیفِ بیخودی میں بڑھا جا رہا ہوں میں ​

سب کچھ نثارِ شوقِ فراواں کئے ہوئے ​

​

پھر سُوئے خُلدِ حُسن کِنچھا جا رہا ہے دل ​

ہر جنّتِ نظارہ کو ویراں کئے ہوئے​

​

پھر بڑھ چلا ہے جوشِ طلب راہِ دوست میں ​

سو فتح ہرشکست پہ قرباں کئے ہوئے​

​

پھر بڑھ چَلِیں جنونِ تمنّا کی شورشیں ​

برہم نظامِ عالمِ امکاں کئے ہوئے​

​

پھرہے نگاہِ شوق کو دیدار کی ہوس​

مُدّت ہوئی ہے جرأتِ عصِیاں کئے ہوئے​

​

پھر لے چلی ہے وحشتِ دل شہرِحُسن میں ​

جنسِ گرانِ عشق کو ارزاں کئے ہوئے​

​

پھر جی یہ چاہتا ہے، کہ بیٹھے رہیں جگر! ​

اُن کی نظر سے بھی، اُنہیں پنہاں کئے ہوئے ​

جگرمُرادآبادی​

 

[سید زبیر]

پھر سُوئے خُلدِ حُسن کھچا جا رہا ہے دل
ہر جنّتِ نظارہ کو ویراں کئے ہوئے
زبردست ۔ ۔ ۔ بہت خوب

 

[طارق شاہ]

پھر سُوئے خُلدِ حُسن کھچا جا رہا ہے دل
ہر جنّتِ نظارہ کو ویراں کئے ہوئے
زبردست ۔ ۔ ۔ بہت خوب

سید صاحب !
دلی خوشی ہوئی جو جگر صاحب کے کلام سے یہ منتخبہ غزل آپ کو پسند آئی
اظہار خیال کے لئے سپاس گزار ہوں
بہت خوش رہیں

 

[مزمل شیخ بسمل]

واہ واہ۔ کیا بات ہے۔