اختر شیرانی وہ فتنہ کار، زیبِ شبستاں ہے آج کل ۔ اختر شیرانی

[فرخ منظور]

وہ فتنہ کار، زیبِ شبستاں ہے آج کل
کیوں محوِ خواب ، شورشِ دوراں ہے آج کل

ہے خوفِ محتسب بھی، خیالِ حساب بھی
لاہور گرچہ جنّتِ رنداں ہے آج کل

دنیا نے گو جلا کے ہمیں خاک کر دیا
پھر بھی دماغِ عشق، گلستاں ہے آج کل

پھر عقدۂ حیات و فنا ، زیرِ غور ہے
پھر زیبِ دوش ، گیسوئے پیچاں ہے آج کل

پھر ہنس رہی ہے ساری خدائی مرے لئے
پھر سامنے وہ چہرۂ خنداں ہے آج کل

پھر ابر چھا رہا ہے بہاریں لئے ہوئے
پھر سامنے وہ زلفِ پریشاں ہے آج کل

فصلِ بہار و رُوئے نگار و مئے کہن
حاصل ہر ایک طرح کا ساماں ہے آج کل

کہہ دو سحر سے ہم کو نہیں فرصتِ نظر
معمورِ حُسن و رنگ ، شبستاں ہے آج کل

ایمان کو عزیز رکھیں ہم تو کس طرح
پیشِ نظر وہ غارتِ ایماں ہے آج کل

بُھولا نہیں سبق ابھی دیرینہ عشق کا
اخترؔ کو گرچہ شکوۂ دوراں ہے آج کل

(اخترؔ شیرانی)​