وادیِ تیراہ

[سید شہزاد ناصر]

گھنے جنگلوں اور پہاڑی چراگاہوں کی وادی

وادئ پُر فریب
تحریر و تصاویر: عمر آفریدی

تاریخ میں تیراہ کا نام مغلوں، سکھوں اور انگریزوں کے خلاف شورشوں اور اغوا کی بعض مشہور وارداتوں کی نسبت سے درج ہے۔ سب سے مشہور واردات انیس سو تئیس میں عجب خان آفریدی کے ہاتھوں کوہاٹ چھاؤنی کے کمانڈنٹ میجر ایلیس کی بیٹی مولی ایلیس کا اغوا ہے۔ تیراہ میں آفریدی اور اورکزئی قبائل آباد ہیں۔

 

[سید شہزاد ناصر]

قلعہ نہ سہی قلعہ نما سہی

دشمن گیدڑ، تیاری شیر کی
دوستی میں جان دینا اور دشمنی میں جان لینا ان لوگوں کا شیوہ ہے۔ شاید یہ ہی سبب ہے کہ مکان امیر کا ہو یا غریب کا ہوتا قلعہ نما ہے جس کے کم سے کم دو کونوں پر برج ہوتے ہیں۔ یہ برج گھر کی حفاظت اور دشمن کو نشانہ بنانے کے کام آتے ہیں۔ کہاوت ہے کہ دشمن اگر گیدڑ ہو تو تیاری شیر کی کرو۔

 

[سید شہزاد ناصر]

چکی کے دو پاٹوں میں ہر چیز ریزہ ریزہ

کونسی چکی کا آٹا
تیراہ میں اب مل آٹے کی فراوانی ہے پھر بھی یہاں صدیوں پرانی پن چکیاں موجود ہیں۔ ڈھلوان سے نیچے بہنے والے پانی کا زورآور دھارا پتھر کے کئی من وزنی پاٹ کو پھرکنی کی طرح گھوماتا ہے۔ اور پھر کیا مکئی، کیا گیہوں اور کیا گھن، سب پِس جاتا ہے۔ یہاں کے محاورے میں دنیا ایک چکی کی طرح ہے جہاں ہر دانہ اپنی باری پر لڑھک کر پاٹ کے نیچے آجاتا ہے۔

 

[سید شہزاد ناصر]

گدھے، خچر اور ٹٹّو کا ’کوہ پیمائی‘ میں ثانی نہیں

دیسی ’سوزوکی‘
پُرپیچ درّوں اور دشوارگزار پہاڑی راستوں پر اب بھی گدھا، خچر اور ٹٹّو ہی باربرداری کے کام آتے ہیں۔ مقامی لوگ انہیں ’سوزوکی‘ کا نام دیتے ہیں۔

 

[سید شہزاد ناصر]

ایکسکیویٹر کی لمبی گردن تیراہ میں

دیر سے ہی سہی
اگرچہ گزشتہ پچیس تیس برسوں میں کچھ سرکاری سرپرستی اور کچھ اپنی مدد آپ کے تحت تیراہ کے غیر آفریدی علاقے میں سڑکیں بنیں تاہم افغانستان پر امریکی حملے کے بعد یہاں تعمیراتی کام کے لئے اضافی رقوم مختص کی گئیں۔ اب فرنٹیئر ورکس آرگنائزیشن کے جوان تیزی سے ان سڑکوں کو وسعت دے کر انہیں پختہ بنا رہے ہیں۔

 

[سید شہزاد ناصر]

پکی سڑک کے فائدے بڑے

بلیک ٹاپ
سترہ مئی دوہزار تین کو سمہ بازار ماموزئی میں پہلی بار سڑک پر تارکول بچھایا گیا۔ پختہ سڑک زخمیوں، بیماروں، بچوں اور عورتوں کے لئے یقیناً سفری سہولت کا باعث ہوگی۔
تاہم سڑک کے مخالفین کہتے ہیں کہ تیراہ ان کے لئے گھر کے آنگن کی طرح ہے جہاں صرف کنبہ کے لوگ ہوتے ہیں۔ سڑک کے بننے سے ’باہر‘ کے لوگوں کو بھی تیراہ تک رسائی مل جائے گی۔

 

[سید شہزاد ناصر]

گھنٹوں کا کام منٹوں میں مگر۔۔۔

جدّت کی طرف
ڈیزل اور پیٹرول سے چلنے والے انجن عام ہوتے جا رہے ہیں جو آٹے کی چکی اور آرامشین چلانے میں کام آتے ہیں۔ چینی ساختہ جنریٹرز اور سولر پینلز (شمسی شیشے) بھی بعض گھروں کو روشن کر رہے ہیں۔ آرا مشین گھنٹوں کا کام منٹوں میں تو کر دیتی ہے مگر خدشہ ہے کہ اب یہاں کے خوبصورت جنگلات تھوڑے عرصے کے مہمان ثابت ہونگے۔

 

[سید شہزاد ناصر]

!یا قربان

روح کی غذا
ہارمونیم اور ڈھول پر لوک گیت گانے والوں کی آواز شاید زیادہ سریلی نہیں البتہ اپنائیت سے لبریز ہے۔ یہ محفلیں اگرچہ کم منعقد ہوتی ہیں پھر بھی شوقین مزاج شادی بیاہ میں اس کا اہتمام کر لیتے ہیں۔

 

[سید شہزاد ناصر]

تیرہ اور چودہ سالہ بھائی اپنی شادی کے موقع پر باپ کے ساتھ

روزہ فرض، شادی واجب
شادی کے لئے لڑکے اور لڑکی کی موزوں عمر صرف سن بلوغ کی متقاضی ہے۔ سوال کیا جاتا ہے کہ روزے فرض ہوگئے ہیں۔ اگر جواب ہاں میں ہو، تو مشورہ دیا جاتا ہے کہ زمانہ ٹھیک نہیں بس جلد سے جلد شادی کردو، اب انتظار کس بات کا ہے۔ قبائلی معاشرے میں ناموس کے نام پر قتل کو سماجی طور پر تحفظ حاصل ہے اس لئے ’برائی‘ سے بچنے کا ایک طریقہ جلد شادی کو بھی سمجھا جاتا ہے۔

 

[سید شہزاد ناصر]

ذرہ نم ہو۔۔۔۔

علم کی جستجو میں
صبح کی ہوا کتنی ہی خوشگوار ہو تیراہ میں قدرے خنک ہوتی ہے۔ اس ٹھنڈ میں اس بچے کے کندھے پر کلاشنکوف کی جگہ کتابوں کا بستہ اس بات کا پتہ دیتا ہے کہ وہاں کے لوگ بھی علم کی پیاس محسوس کرنے لگے ہیں۔

 

[سید شہزاد ناصر]

جمعہ گل خان، گئے وقتوں کا نمائندہ

پرانے لوگ
آفریدیوں میں روایتی کلاہ پہنے کا رواج ختم ہوتا جا رہا ہے۔ اب خال خال کوئی سفید ریش ہی کلاہ پہنے نظر آتا ہے۔ تاہم تیراہ میں ننگے سر گھومنے کی سختی سے ممانعت ہے۔

 

[سید شہزاد ناصر]

مصری خان کے چپلی کباب ذائقہ میں لاثانی ہیں

مصری خان کے چپلی کباب
تیراہ میں مختلف مقامات پر جمعہ کے روز تجارتی میلے لگتے ہیں جن میں دور دور سے لوگ خرید و فروخت کے لئے آتے ہیں۔ اسی طرح کا میلہ ’مائدان‘ میں بھی لگتا ہے جہاں ضرورت کی تمام اشیاء ملتی ہیں۔ اور چپلی کباب تو ہر بچے، جوان اور بوڑھے کی مرغوب خوراک ہے۔

 

[سید شہزاد ناصر]

پہاڑی چشمے کا پانی گھر کے دروازے پر

نئے عہد کا دھارا
گزشہ دہائی کے دوران کئی لوگ دور دراز واقع چشموں کا پانی پائپ کے ذریعے گھروں تک لے آئیں ہیں۔ بظاہر یہ ایک اچھا کام ہے لیکن عورتوں کے لئے اس کا معمولی سا منفی پہلو اس وقت سامنے آیا جب ایک بچی نے اس منصوبہ کے کرتا دھرتا اسلام بادشاہ آفریدی سے کہا: ’آپ نے گھر گھر پانی پہنچا کر چشمہ کے کنارے جمنے والی ہماری محفل اجاڑ دی۔ اب میں اپنی سہیلیوں سے کیسے ملوں گی۔‘

 

[سید شہزاد ناصر]

مان سنگھ یہیں پلے بڑھے اور کاروبار کر رہے ہیں

تیراہ کے سکھ
یہاں سکھ اور کچھ تعداد میں ہندو خاندان کئی نسلوں سے آباد ہیں۔ گزشتہ نصف صدی تک پرچون کا کاروبار کلی طور پر ان ہی لوگوں کے ہاتھ میں تھا۔ اور اس کی وجہ یہ تھی کہ یہاں کی مقامی پختون آبادی ترازو تولنے کو معیوب سمجھتی تھی۔

 

[سید شہزاد ناصر]

وکیل خان اپنے ڈیپارٹمنٹل اسٹور میں

بیروزگاری کا اثر اقدار پر
اب ہوا کا رخ بدل چکا ہے۔ تعلیم اور ہنر کی کمی نے بیروزگاری میں اضافہ کر دیا ہے۔ لہذا اب عام لوگ بھی کاروبار کو برا نہیں سمجھتے۔ رقم (روپیہ) اب نئی اقدار رقم کر رہی ہے۔
ربط
http://www.bbc.co.uk/urdu/specials/227_Tirah/index.shtml

 

[عظیم اللہ قریشی]

جناب عالی کیا تیراہ کا چکر لگا کے آئے ہیں لیکن کیسے؟؟؟ادھرتو حالات بہت خراب ہیں

 

[سید شہزاد ناصر]

جناب عالی کیا تیراہ کا چکر لگا کے آئے ہیں لیکن کیسے؟؟؟ادھرتو حالات بہت خراب ہیں

جناب یہ سب انٹرنیٹ کا کمال ہے

 

[شمشاد]

بہت خوب سیر کروائی ہے شہزاد بھائی۔
شریک محفل کرنے کا شکریہ۔

 

[سید شہزاد ناصر]

بہت خوب سیر کروائی ہے شہزاد بھائی۔
شریک محفل کرنے کا شکریہ۔

آداب عرض ہے
سلامت رہیں

 

[محمد منیر یونس]

بہت عمدہ کاوش کی ہے آپ نے سید شہزاد ناصر صاحب،
وادی تیراہ واقعی ایک خوبصورت علاقہ ہے